Fjala e ministrit të Mbrojtjes, z. Pirro Vengu me rastin e nënshkrimit të "Deklaratës së Përbashkët të Bashkëpunimit në fushën e Mbrojtjes” ndërmjet Shqipërisë, Kroacisë dhe Republikës së Kosovës.

e martë, 18 mars 2025 11:31

Mirëmëngjes të gjithëve,

mirë se keni ardhur në Ministrinë e Mbrojtjes. Është një kënaqësi e posaçme sot të mirëpres dy miq shumë të vyer nga dy vende aleate shumë të veçanta, veçanërisht z. Ejupi nga Kosova dhe për herë të parë, në fakt, në vendin tonë na nderon me vizitën e tij miku im Ivan, ministri i Mbrojtjes i Kroacisë dhe njëherazi zëvendëskryeministër i Kroacisë.

Pas disa konsultimesh në rrafshin trepalësh, të cilat janë iniciuar që prej ministerialit të fundit të NATO-s, vendosëm që bashkërisht, për disa arsye, të nënshkruanim një deklaratë partneriteti bashkëpunimi në fushën e Sigurisë dhe Mbrojtjes. Them për disa arsye, sepse Kosova, Shqipëria dhe Kroacia ndajnë një vlerësim të njëmend qoftë të kërcënimeve në rajon, qoftë edhe të rreziqeve që i kanosen Europës Juglindore në këto momente të veçanta, qoftë nga pikëpamja e sigurisë, qoftë nga pikëpamja e zhvillimeve në zonën lindore të kontinentit tonë, qoftë edhe nga pikëpamja se si NATO duhet të ketë një vëmendje të posaçme ndaj rajonit tonë.

Deklarata përkthen në fakt, jo vetëm një vullnet politik, por gjithashtu edhe disa prioritete që ne ndajmë sëbashku, që kryesisht kanë të bëjnë me rëndësinë që të tre vendet tona i japin ringritjes së industrisë ushtarake dhe nevojën që në këtë shtyllë të sigurisë kombëtare të vendeve tona ne të bashkëpunojmë edhe më thellë, edhe më gjerë.

Pika e dytë ka të bëjë me bashkëpunimin që Forcat tona të Armatosura duhet të zhdërvjelltësojmë, qoftë nga këndvështrimi i stërvitjeve, qoftë nga këndvështrimi i modernizimit të kapaciteteve dhe besoj, se edhe Shqipëria dhe Kosova kanë këtu se çfarë të mësojnë nga një aleat i vyer si Kroacia, e cila prej vitesh tashmë ka një rritje dhe një modernizim domethënës nga këndvështrimi i Forcave të saj të Armatosura. Siç e thashë, është një deklaratë që çel siparin e një bashkëpunimi më të thelluar.

Gjithashtu kemi marrë nga partnerë dhe aleatë të ndryshëm edhe shprehje interesi, ditët e fundit, për aleatë të tjerë që t’i bashkohen kësaj iniciative, sepse si dy vende anëtare të NATO-s, që kanë edhe një interes dhe një mbështetje të posaçme ndaj Kosovës, si një shtet i pavarur dhe një shtet që kontribuon tashmë në sigurinë e mbarë rajonit, ishte aleat krejt i natyrshëm dhe jam shumë i gëzuar që mundëm ta konkretizonim këtë bashkëpunim sot në Tiranë.

Do t’i jap fjalën kolegëve dhe fillojmë me Ivanin, pastaj më pas dhe Ejupi do të shprehë edhe ai pikëpamjet e tij.