Fjala përshëndetëse e ministrit të Mbrojtjes në kuadër të festimeve të 16 - vjetorit të anëtarësimit të Republikës së Shqipërisë në NATO

e shtunë, 05 prill 2025 15:30

Fjala përshëndetëse e ministrit të Mbrojtjes në kuadër të festimeve të 16 - vjetorit të anëtarësimit të Republikës së Shqipërisë në NATO, mbajtur në  ambientet e Forcave të Regjimentit të Operacioneve Speciale në Zall-Herr ...

I nderuar zoti Kryeministër,
i nderuar Shef i Shtabit të Përgjithshëm,
të nderuar gjeneralë, oficerë, detarë, drejtor dhe personel të emergjencave civile, në të gjitha gradat dhe cilësitë tuaja,

muajt e fundit kemi publikuar disa data të historisë sonë, që nga 80 - vjetori i Çlirimit, 80 - vjetori i shkollës ushtarake “Skënderbej” dhe së shpeji festojmë edhe 100 - vjetorin e Flotës, po sa herë festojmë këto data na kthehen në mëndje ato data që shënuan rënien e institucioneve të Mbrojtjes dhe të sigurisë nën peshën dërmuese të neglizhencës së politikës.

Sa herë nderojmë themelimin e një shkolle, na duhet të kujtojmë edhe faktin që ai institucion ushtarak është mbyllur me vendime arbitrare dhe të pakuptimta. Madje edhe përvjetorët e parë të anëtarësimit në NATO nuk arritën të largonin as neglizhencën me argumentin se tashmë na mbronte Aleanca dhe as hijen e përvjetorëve të shkatërrimit, një shkatërrim sistematik i industrisë dhe shkollimit ushtarak, me arsyetimin se demokracia dhe ekonomia e tregut ishin të vetëmjaftueshme. Sigurisht, ky përvjetor i 16 -të i anëtarësimit tonë në Aleancën më të fuqishme dhe më jetëgjatë të historisë moderne, na gjen në një situatë krejt tjetër dhe nuk ka simbol më të mirë të ringritjes, se sa Regjimenti i Forcave Speciale ku gjendemi sot.

Një ringritje e trefishtë, fillimisht në rrafshin e bashkëpunimit politik për sigurinë dhe mbrojtjen; në rajon kemi treguar se mund të udhëheqim një seri iniciativash në dobi të stabilitetit dhe integrimit Euroatlantik.

Linjëzimi ynë më BE, që nuk vjen vetëm me fjalë, por me vepra në rrafshin e angazhimit ushtarak. Këtë vit 500 ushtarakë shqiptarë do të gjenden në misione jashtë vendit dhe, pika e tretë, një transformim në rrafshin operacional në të gjithë spektrin e forcave të luftimit siç patëm mundësinë ta dëshmonim sot.

Prandaj edhe në cilësinë e udhëheqësit të kësaj skuadre të Mbrojtjes dua të nderoj sot mbi të gjitha punë dhe përpjekjen, sakrificën, e çdo efektivi, familjeve tuaja dhe padyshim punën dhe ndjenjën e lartë të përgjegjësisë që tregoni çdo ditë në të gjithë zinxhirin e komandimit të Forcave të Armatosura dhe të Emergjencave Civile.

Është fakt se në këto dy vitet e fundit, ndoshta për herë të parë në historinë tonë bashkëkohore, mund të themi se Mbrojtja dhe Siguria nuk kanë më probleme burimesh financiare apo investimesh. Sfida jonë tashmë është që këto resurse t’i shpenzojmë në mënyrë eficiente duke krijuar qëndrueshmëri, zhvillim ekonomik dhe punësim, falë dy parimeve: parimi i parë përdorimi i dyfishtë sa herë investojmë në një kapacitet civil ndihmojmë dhe një kapacitet ushtarak dhe anasjelltas dhe parimi i dytë preferenca për industrinë ushtarake vendase.

Këto janë parimet e ringritjes së pakthyeshme të mbrojtjes dhe sigurisë kombëtare, ky është angazhimi i kësaj qeverie dhe dua ta mbyll fjalën time duke falënderuar kryeministrin, për vëmendjen e shtuar që ka treguar dhe po tregon çdo ditë ndaj Forcave të Armatosura.

Ju faleminderit!

Faleminderit!