Fjala e ministrit të Mbrojtjes në Ceremoninë e Krijimit të Komandës Kibernetike dhe Ndërlidhjes

Fjala e ministrit të Mbrojtjes në Ceremoninë e Krijimit të Komandës Kibernetike dhe Ndërlidhjes, mbajtur në mjediset e komandës.

I nderuar shef i Shtabit të Përgjithshëm të Forcave të Armatosura;
të nderuar komandantë, gjeneralë, nënoficerë, oficerë në të gjitha gradat dhe cilësitë tuaja,
i nderuar gjeneralmajor John Phillips,
e nderuar Nensi,
të nderuar zonja dhe zotërinj,
Mbrojtja kibernetike, siç e përmendën me vend parafolësit, prej më shumë se dhjetë vitesh, tashmë është pjesë e domeneve të luftës dhe është një zgjerim i terrenit të luftës faktikisht dhe një komponent kyç në të gjitha platformat dhe politikat e NATO dhe të gjitha vendeve aleate.

Po ashtu, sulmet kibernetike të vitit 2022 ndaj Shqipërisë, shërbyen si një kujtesë e fuqishme se, në një botë gjithnjë e më të digjitalizuar, mbrojtja e hapësirës kibernetike është po aq e rëndësishme sa mbrojtja e integritetit territorial të vendit.
Këto zhvillime, të mbështetura edhe në përvojat e tjera të NATO-s, e bënë të domosdoshëm dhe krejt të natyrshme, në fakt, krijimin e Komandës Kibernetike dhe Ndërlidhjes, të cilën themelojmë sot.

Jo vetëm e natyrshme, sepse na duhet më shumë ndërveprim mes forcave operacionale që ndërmarrin veprimtari që lidhen me mbrojtjen kibernetike dhe me komunikimin digjital, e natyrshme sepse ky është një domen ku padyshim bashkëpunimi mes komponentit ushtarak dhe komponentit civil është ndoshta çelësi i suksesit.

Krijimi i kësaj komande, përbën një hap historik dhe thekson edhe njëherë angazhimin e Shqipërisë në modernizimin e infrastrukturës së saj të sigurisë kibernetike duke konfirmuar rolin tonë gjithnjë e më aktiv në arkitekturën rajonale dhe brenda Aleancës për sa i përket politikave të sigurisë kibernetike.

Krijimi i kësaj komande vjen gjithashtu, pas një sërë hapash të ndërmarra gjatë 5 - vjeçarit të fundit nën tutelën, nën mbështetjen, nën trajnimin e partnerëve tanë, aleatëve tanë strategjikë Shtetet e Bashkuara të Amerikës. Dhe këtu gjej rastin të shpreh edhe mirënjohjen time të thellë për gjeneral Phillips, si dhe të gjithë komandantët e përfshirë ndër vite, qoftë në ndërtimin e Njësisë Kibernetike, qoftë në stërvitjet e përmuajshme që bëjmë duke theksuar këtu edhe njëherë, se nëqoftëse ka një komandë në Forcat tona të Armatosura, e cila ka në ADN-ën e vetë bashkëpunimin strategjik me Shtetet e Bashkuara, është padyshim Komanda Kibernetike.

Tashmë kjo komandë e re, me një qasje shumë inovative dhe proaktive, por edhe më një historik dhe eksperiencë të vyer në fakt, sepse duhet të theksojmë këtu se elementët e parë ndërlidhës në Forcat e Armatosura shqiptare janë themeluar në vitin vitit e largët 1931, duke dëshmuar kësisoj se në Forcat tonë të Armatosura kemi një eksperiencë të vyer dhe jo vetëm nga këndvështrimi i elementëve të komunikimit dhe ndërlidhjes, por edhe nga këndvështrimi se si këto komponentë ndërveprojnë me forcat e tjera.

Kalimi në nivel komande do të sjellë një sërë avantazhesh të rëndësishme, në drejtim të rritjes së efikasitetit operativ dhe të kapaciteteve të mbrojtjes kibernetike dhe komunikimit të sigurt, ku ndër të tjera do doja të theksoja:

1. Rritjen e reagimit, sa më i shpejtë, sa më efikas, sa më I koordinuar ndaj kërcënimeve kibernetike dhe këtu, dua të theksoj se, këto kërcënime janë të përditshme dhe nëqoftëse ka një terren të përditshëm ku ne përballemi me kërcënimet dhe bëjmë luftë praktikisht në terrenin e komunikimeve digjitale dhe kibernetike është pa dyshim ky dimension.
2. E dyta, përmirësimin e bashkëpunimit ndërinstitucional; e përmenda edhe pak më parë, çelësi i suksesit, komponenti ndërveprueshmëria, midis komponentit civil dhe ushtarak, ndaj në strukturën e Komandës Kibernetike presim që të përbëhet prej të paktën 40% prej ekspertësh civil në fushën kibernetike,
3. Formulimin dhe zbatimin i strategjive të qëndrueshme dhe afatgjata në menaxhimin e kërcënimeve kibernetike;
4. Pika e katërt, zhvillimin dhe implementimin e taktikave, teknikave, procedurave dhe sistemeve dhe patjetër që, një detyrë parësore e kësaj komande është që të ndërmarrë edhe një sërë investimesh duke vijuar bashkëpunimin e shkëlqyer me Shtetet e Bashkuara edhe në këndvështrimin e rritjes së kapaciteteve të mëtejshme
5. Dhe së fundmi elementi i dijes dhe i zhvillimit të aftësive të specializuara të personelit, ku besoj se na duhet të investojmë edhe më shumë.

Jam bindur se kjo komandë nën drejtimin e gjeneral Dodës, do të bëhet një komponent shumë i rëndësishëm i Forcave të Armatosura dhe do të garantojë një mjedis kibernetik dhe komunikim të sigurt në të tri nivelet e komandim-kontrollit, duke lehtësuar shkëmbimin e informacionit dhe duke pasur një standardizim dhe ndërveprueshmëri shumë më të lartë seç kemi sot me aleatët tanë në NATO.

Në mbyllje, dëshiroj të shpreh mirënjohjen time për të gjithë ju që keni kontribuar në këtë proces transformimi, si një hap historik dhe t’ju uroj një punë sa më të mbarë në drejtimin e gjeneral Dosës, të cilin përfitoj nga rasti, ta uroj edhe për marrjen e detyrës.

Ju faleminderit dhe na priftë e mbara!