Fjala e ministrit të Mbrojtjes Pirro Vengu para Kuvendit të Shqipërisë

e mërkurë, 28 janar 2026 09:15

Fjala e ministrit të Mbrojtjes Pirro Vengu para Kuvendit të Shqipërisë

Faleminderit zonja kryetare e seancës!

Të nderuar kolegë,

Projektligji për import-eskportin dhe tranzitin e armëve të zjarrit, nuk është një nismë e izoluar, do përpiqem ta prezantoj shkurtimisht, është pjesë e një pakete të gjerë ligjore, e cila synon të forcojë kuadrin rregullator të industrisë së mbrojtjes dhe veçanërisht kontrollin e mallrave me përdorim të dyfishtë civil dhe ushtarak.

Përmes mekanizmave të parashikuar në këtë projekt-ligj synojmë të garantojmë integritetin e të gjithë zinxhirit: nga prodhimi, tregtimi, eksporti, tranziti i armëve të zjarrit, duke rritur sigurinë, transparencën, bashkëveprimin e institucioneve ligj-zbatuese.

Ky është një ligj plotësisht i ri, i cili transpozon në mënyrë të plotë rregulloren e Bashkimit Evropian, pa transpozim selektiv dhe pa asnjë kompromis.

Ai e vendos Shqipërinë në të njëjtin standard ligjor me vendet anëtare të BE-së në një fushë kyçe për sigurinë publike dhe madje sigurinë kombëtare. Projektligji forcon mekanizmin e kontrollit shtetëror, pa krijuar institucione të reja dhe vlen ta theksojë këtë pikë.
Ai mbështetet në eksperiencën 17-vjeçare të Autoritetit Shtetëror të Kontrollit të Eksporteve një agjenci varësie e Ministrisë së Mbrojtjes, me kapacitete të konsoliduara profesionale dhe bashkëpunim të qëndrueshëm me agjensitë simotra dhe agjensi ligjzbatuese ndërkombëtare.

Një risi thelbësore e këtij projekt-ligji është krijimi i një mekanizmi licencimi elektronik, të sigurt, të enkriptuar, i cili rrit sigurinë e të dhënave dhe efikasitetin e procesit të autorizimeve.

Paralelisht, projektligji rrit bashkëveprimin mes agjensive ligjzbatuese dhe mundëson krijimin e një baze të dhënash unike ndërinstitucionale, në shërbim të origjinës deri dhe te përdoruesi fundor. Sa i përket risive kryesore, elementi i parë gjurmueshmëria e avancuar për çdo armë zjarrit. Pika e dytë kontrolli përpara dhe pas dërgesës, forcim i kontrollit gjatë gjithë zinxhirit të furnizimit, administrim elektronik të autorizimeve sikundër patjetër dhe masa parandaluese edhe sanksione për të mbyllur çdo hapësirë abuzimi.

Është e rëndësishme të theksohet se projektligji nuk sjell kosto shtesë për buxhetin e shtetit dhe detyrimet nga zbatimi i tij do të përmbushen brenda kapaciteteve ekzistuese institucionale. Së fundi projektligji është pjesë e piketave ndërmjetëme në procesin e negociatave me Bashkimin Evropian ndaj edhe përfaqëson një hap të matshëm drejt përmbushjes së tyre.

Për të gjitha këto arsye, dhe duke falënderuar anëtarët e Komisionit të Mbrojtjes dhe Çështjeve të Brendshme, të Komisionit të Ligjeve dhe Komisionit për Europën dhe Punët e Jashtme, të cilët e mbështetën këtë iniciativë në frymë konsensuale përtej ndasive partiake.

Ju ftoj të gjithë që ta mbështesni.
Ju falemnderit!