40 mjete taktike të prodhuara nga industria shqiptare i shtohen Forcave të Armatosura, fjala e ministrit të Mbrojtjes, z. Ermal Nufi

e premte, 31 korrik 2026 16:06

I nderuar zoti kryeministër,

I nderuar shef i Shtabit të Përgjithshëm të Forcave të Armatosura,

Të nderuar partnerë, bashkëpunëtorë të pranishëm,  

Sot është një ditë krenarie për Industrinë e Mbrojtjes së Shqipërisë!

Një kapitull i hapur tashmë që ndërton një të ardhme akoma më të mirë për modernizimin e Forcave të Armatosura. 

Një ogur pozitiv ku këta 40 mjete taktike janë sot kontribut i qartë në forcimin e kapaciteteve të Forcave të Armatosura. 

Ndër të tjera, sot jemi dëshmitarë më shumë se kurrë të asaj që Shqipëria po ndërton diçka që deri para shumë vitesh e kemi konsideruar një objektiv ambicioz: aftësinë për të zhvilluar kapacitete vendase në industrinë e mbrojtjes.

Angazhimet e reja të NATO 3.0, si dhe mjedisi i sigurisë çdo ditë e më shumë paraqet pasiguri dhe ka shtuar nevojën për të pasur një industri vendase dhe për të pasur mundësinë e prodhimit të gjithë kapaciteteve dhe nevojave të Forcave të Armatosura në territorin e Republikës së Shqipërisë.

Vendimet e marra nga NATO dhe rritja e investimeve në mbrojtje shoqërohen me një tjetër mesazh të rëndësishëm: Vendet aleate duhet të forcojnë bazën e industrisë së tyre vendase, të zhvillojnë teknologji, të krijojnë kapacitete prodhuese që i shërbejnë sigurisë kolektive. 

Si aleate e përgjegjshme, Shqipëria është plotësisht e angazhuar në këtë drejtim. Përmes vizionit të kryeministrit në vitin 2024 dhe në kuadër të angazhimeve të ndërmarra, që me themelimin e shoqërisë “KAYO”, si dhe me ndërtimin, ngritjen dhe miratimin e ligjit për Industrisë e Mbrojtjes, janë hedhur hapat e parë, që sot mund të kemi një shtrat të besueshëm, ku mund të mbështetemi, pikërisht për ndërtimin e kësaj industrie.

Partneriteti ndërmjet shoqërisë KAYO dhe shoqërisë TIMAK është shembull konkret i produktit të dalë pikërisht nga këto dy ligje, nga ligji për KAYO-n dhe ligjit për industrinë e mbrojtjes, dhe pjesë e këtij vizioni të çmuar janë vetëm të parët e zhvillimit të një industrie të suksesshme të mbrojtjes.

Ky partneritet konkret, midis KAYO dhe TIMAK, ka lindur shoqërinë “Timak Defence”, e cila sot, tre muaj përpara afatit dorëzon 40 mjetet e para të prodhuara në Republikën e Shqipërisë. Janë 35 mjete të vogla 4+1 dhe janë 5 kamionë vetëshkarkues, të cilët iu dorëzohen përpara afatit Forcave tona të Armatosura.

Ne jemi krenarë për frytin e këtij bashkëpunimi, për cilësinë e mjeteve që dorëzohen, janë mjete të fjalës së fundit, 4+1, Toyota, Land Cruiser dhe kamionët vetëshkarkues “Man”. Sot Forcat e Armatosura kanë kapacitete serioze në përmbushjen e detyrave operacionale.

Objektivi ynë mbetet plotësisht i qartë! Ne duam të ndërtojmë një industri moderne të mbrojtjes, të aftë të përmbushë nevojat e institucioneve tona dhe të gjithë angazhimeve që ne kemi në kuadër të Aleancës së Atlantikut të Veriut, por njëkohësisht edhe të integrojmë zinxhirët ndërkombëtarë të furnizimit, duke përmbushur standardet më të larta të cilësisë dhe të besueshmërisë.

Kjo nuk është një ambicie afatshkurtër! Është një investim strategjik për ardhmen e vendit! Mjetet taktike që bëhen sot pjesë e Forcave tona të Armatosura janë pjesë e këtij rrugëtimi. Ata do të mbështesin misionet e tyre dhe do të përfaqësojnë aftësitë e industrisë shqiptare për të prodhuar sipas standardeve që koha kërkon.

Për ne është vetëm një fillim i mbarë, sikurse edhe me të tjera produkte të rëndësishme bashkëpunimi ku shoqëria KAYO është e angazhuar. Përpara kemi të tjera projekte që do t’i zgjerojnë kapacitetet prodhuese, dhe do të sjellin teknologji të reja, do ta bëjnë industrinë shqiptare të mbrojtjes një faktor gjithnjë e më të rëndësishëm në sigurinë kombëtare dhe në zhvillimin ekonomik.

Më lejoni të falënderoj sot përzemërsisht të gjithë ata që kanë kontribuar në realizimin e këtyre dy loteve që sot paraqiten.

Ne me kënaqësi do të presim deri në fund të këtij viti, edhe 50 mjete të tjera nga shoqëria “Timak Defence”, që vijnë për Forcat e Armatosura. Vitin që vjen, vijnë dhe kapacitetet e tjera: autobote, zjarrfikëse për Forcat e Armatosura, të cilat gjithashtu janë të fjalës së fundit, kapacitetet zgjerojnë akoma edhe më tej të gjithë operacionet e emergjencave civile në territorin e Republikës.

Rezultatet që shohim sot janë fryt i bashkëpunimit, profesionalizmit dhe besimit në këtë sektor në Shqipëri.

Sot ne jemi më të sigurt se kurrë se ne mund të ndërtojmë kapacitete të qëndrueshme duke parë nga e ardhmja dhe për t’iu përgjigjur të gjitha sfidave të së ardhmes. Unë do të mbyll fjalën time duke falënderuar Kryeministrin e Republikës për besimin që më dha vite më përpara kur më bëri kryetar të bordit të KAYO-s, si përfaqësues i Kryeministrisë në atë kohë. Ka qenë nder i jashtëzakonshëm për mua që së bashku me z. Ardi Veliu, z. Dorian Tola dhe znj. Arjeta Puca si bashkëpunëtore, si dhe me Shtabin e Përgjithshëm, kemi arritur sot të sjellim këto produkte që i dorëzohen Forcave të Armatosura.

Është një moment i jashtëzakonshëm krenarie, i cili na bën të gjithëve të shohim drejt një të ardhmeje të sigurt. Sot në Shqipëri jemi të aftë t’i bëjmë këto mjete, sot kemi rivitalizuar një kompleks në periferi të Tiranës që dikur prodhonte autotraktorë, ndërsa sot prodhon mjete të blinduara, sot prodhon mjete taktike.

Në fund të vitit do të sjellim mjete 8+1. Kjo është ajo që ne arrijmë të bëjmë nëse kemi besim tek vizioni dhe këmbëngulja tek rezultatet.

Faleminderit të gjithëve!