“Mburoja e Arbrit-26”, Grup Batalioni i Këmbësorisë së Lehtë certifikohet “I aftë për mision”, fjala përshëndetëse e ministrit të Mbrojtjes, z. Ermal Nufi

e hënë, 21 shtator 2026 16:55

Përshëndetje të gjithëve!

I nderuar zoti President i Republikës, Komandant i Përgjithshëm i Forcave të Armatosura, 

E nderuar Gjenerale Mays,

I nderuar Shef i Shtabit të Përgjithshëm të Forcave të Armatosura, Gjenerallejtënant Kingji,

I nderuar Gjeneral Çuni,

Komandantë,

Atashe, partnerë,

Të dashur ushtarë, nënoficerë, oficerë, civilë, pjesëmarrës në stërvitjen “Mburoja e Arbrit-26”!

Sot përmbyllim një proces të rëndësishëm për Forcën Tokësore dhe për Forcat e Armatosura të Republikës së Shqipërisë.

Në rajonin stërvitor të Bizës, Grup Batalioni i Këmbësorisë së Lehtë u përball me një proces të plotë rigoroz vlerësimi.

“Mburoja e Arbrit-26” nuk ishte thjesht një seri aktivitetesh stërvitore. Ajo ishte një provë konkrete e aftësisë sonë për të planëzuar, komanduar, dislokuar dhe zhvilluar operacione në një mjedis operacional kompleks, duke zbatuar standardet dhe procedurat e NATO-s.

Në një strukturë ushtarake moderne, aftësia ushtarake nuk matet vetëm me pajisjet që disponojmë apo nga numri i forcave që kemi në dispozicion. 

Ajo matet, mbi të gjitha, mbi aftësinë për t’i bashkuar këto kapacitete në një forcë të vetme, të komanduar, të koordinuar, të aftë për të përmbushur misionin. 

“Mburoja e Arbrit-26” ishte pikërisht një provë e tillë.

Të gjithë elementët e stërvitjes u zhvilluan në kuadër të një procesi vlerësues të strukturuar sipas fushave të CREVAL, duke e kryer këtë stërvitje të plotë në kohë reale, të kapaciteteve tona dhe jo thjesht një aktivitet demonstrues.

Sot, rezultati flet qartë: Grup Batalioni i Këmbësorisë së Lehtë është i certifikuar “I aftë për mision” dhe kjo është një arritje për të cilën ne duhet të jemi krenarë. 

Por, ndër të tjera, ajo është një përgjegjësi.

Përgjegjësi për të ruajtur standardin.

Përgjegjësi për ta kthyer këtë përvojë në një kapacitet të qëndrueshëm operacional.

Një përgjegjësi për të qenë të gatshëm ta dëshmojmë këtë aftësi në mision sa herë që na kërkohet.

Fakti që ky certifikim kombëtar u zhvillua nën monitorimin e përfaqësuesve të NATO-s, e bën edhe më domethënëse stërvitjen. 

Prandaj, në këtë moment, më lejoni të shpreh mirënjohjen time për aleatët dhe partnerët tanë, të cilët kanë qenë dhe mbeten pjesë e rëndësishme e rrugëtimit tonë drejt forcimit të kapaciteteve, standardizimit dhe ndërveprueshmërisë. 

Shqipëria është dhe do të mbetet një aleate e angazhuar, që kontribuon me përgjegjësi në Aleancë dhe punon vazhdimisht për të rritur aftësinë e saj. 

Në këtë drejtim, modernizimi i Forcave të Armatosura është një proces i pandalshëm.  

Një ushtri moderne kërkon njerëz të mirë-trajnuar, të motivuar, teknologji moderne, sisteme të avancuara të komandim-kontrollit, kapacitete të përmirësuara të zbulimit, të informacionit, mobilitetit, mbrojtje dhe aftësi për të vepruar në të gjitha dimensionet.

Modernizimi që po ndërmarrim synon pikërisht këtë: të ndërtojmë Forca të Armatosura më të afta, më të lëvizshme, më të mbrojtura, më teknologjike, të plotësuara e në ndërveprueshmëri me forcat e vendeve aleate.

Modernizimi nuk është vetëm çështje pajisjesh. Ai është, mbi të gjitha, një transformim i mënyrës se si ne mendojmë, se si ne planëzojmë, stërvitemi apo veprojmë. 

Në këtë kuadër, “Mburoja e Arbrit-26” është një shembull konkret i këtij transformimi: standarde më të larta, procedura më të konsoliduara, integrim më i madh i forcave dhe një fokus i qartë të gatishmërisë reale për mision. 

Si gjithmonë, kapacitetet njerëzore janë ata që qëndrojnë mbi çdo standard, procedurë apo vlerësim. 

Prandaj, me shumë përulje dhe krenari, dua të shpreh vlerësimin tim për çdo ushtarak dhe civil dhe për çdo strukturë që u angazhua në “Mburoja e Arbrit-26”.

Mirënjohje, padyshim, për komandantët që drejtuan, Shtabet që planëzuan dhe koordinuan, për instruktorët, vlerësuesit - mbi të gjitha, për çdo oficer, nënoficer dhe ushtar që e ktheu këtë plani në veprim.

Certifikimi që morët sot nuk është vetëm një rezultat i një procesi vlerësimi. Është dëshmia e punës, disiplinës, përgatitjes dhe profesionalizmit tuaj. 

Detyra jonë tashmë është që këtë rezultat ta konsolidojmë, ta zhvillojmë e ta çojmë edhe më tej!

Një forcë e aftë për mision nuk përcaktohet vetëm nga një certifikatë, por nga aftësia për të  përmbushur misionin atëherë kur vendi dhe detyra e kërkojnë atë. 

Sot, Grup Batalioni i Këmbësorisë së Lehtë ka dhënë provën e tij. Ndërkohë, nesër, standardi do të jetë akoma edhe më i lartë!

Urime edhe njëherë të gjithë pjesëmarrësve në “Mburojën e Arbrit-26”! 

Mirënjohje dhe falënderimet më të sinqerta për aleatët dhe partnerët tanë në këtë rrugëtim të rëndësishëm!

Dy fjalë do t’i them edhe në anglisht për miqtë tanë.

Thank you so much for all participants from the National Guard of New Jersey, the Attachés representing here all the different nations of NATO.

Let me reiterate that this moment is a proud one, not only for the Armed Forces of the Republic of Albania, but also for all the Alliance.

In this difficult and challenging time, we prove yet again that we are ready to be side by side to fight for our values, for freedom, and for democracy. 

Respekt për të gjithë burrat dhe gratë e Forcave të Armatosura të Republikës së Shqipërisë!

Respekt për gjithsecilin prej jush që na keni bërë krenarë sot në këtë stërvitje!

Gjuha me të cilën flasim është gjuha e zemrës, gjuha e mendjes, gjuha e shpirtit shqiptar, i cili është kurdo gati për mbrojtjen e Atdheut dhe të familjeve tona. 

Urime dhe suksese!