Akademia e Forcave të Armatosura, nisja e vitit të ri akademik 2026-2027, fjala përshëndetëse e ministrit të Mbrojtjes, z. Ermal Nufi

e martë, 06 tetor 2026 17:10

I nderuar Shef i Shtabit të Përgjithshëm të Forcave të Armatosura, Gjenerallejtënant Kingji,

I nderuar Komandant i Akademisë së Forcave të Armatosura, Gjeneral Major Dimo,

Të nderuar gjeneralë, pjesëmarrës, akademikë, komandantë, drejtues, ushtarakë,

Të dashur kadetë dhe studentë,

Urimet më të mira për fillimin e këtij viti të ri akademik!

Dhe ku më mirë këto urime se në shtëpinë e re të Akademisë së Forcave të Armatosura këtu në Tiranë.

Në një godinë të re me një standard bashkëkohor, një kampus i ri sipas standardeve më të mira ndërkombëtare, i cili simbolizon më shumë se një hapësirë moderne për të studiuar apo për të fituar dije akademike.

Simbolizon, në fakt një dëshmi tjetër se çfarë Forcat e Armatosura po ndërtojnë: një Forcë të Armatosur moderne, profesionale, të aftë për të përballuar sfidat e së ardhmes dhe mbi të gjitha, të mbështetura tek njerëzit.

Në këtë vit të ri akademik, 289 studentë nisin rrugëtimin e tyre në Akademinë e Forcave të Armatosura.

Janë 289 kontekste, histori dhe rrugëtime të ndryshme që takohen në një pikë, në një qëllim të përbashkët: përgatitja për t’i shërbyer Atdheut.

Besoj se ky fakt jua shton përgjegjësinë edhe më shumë për të investuar tek vetja, për ta parë uniformën që mbani veshur më shumë se sa një uniformë, ta shikoni si një besim që Republika e Shqipërisë dhe qytetarët e saj kanë vendosur tek ju.

Kjo është pikërisht dhe arsyeja pse arsimimi ushtarak dhe modernizimi i tij mbeten përherë një prioritet i padiskutueshëm i Qeverisë Shqiptare.

Kampusi i ri ku ndodhemi sot është pjesë e këtij vizioni dhe pjesë e këtij transformimi dhe ai ende nuk ka përfunduar me të gjithë elementët e tij. Kjo godinë është e para.

Duhet të jemi të vetëdijshëm se një ndërtesë moderne nuk është qëllim në vetvete, pasi ajo duhet të mbushet me dije, me kërkim, me inovacion, me njerëz që kanë ambicien për të qenë sot më të mirë se sa dje, dhe nesër më të mirë se sa sot.

Këtu qëndron dhe përgjegjësia jonë: që të ndërtojmë një sistem arsimor ushtarak që i përgjigjet nevojave të Forcave të Armatosura të sotme dhe që përgatit njerëzit për sfidat e së ardhmes.
Të ndërtojmë një sistem cilësor, konkurrues dhe plotësisht të ndërveprueshëm me standardet euroatlantike, sepse Shqipëria, si një aleate e përkushtuar e NATO-s, tashmë nuk është vetëm konsumatore, por edhe kontributore e saj. Ne duam të jemi pjesë e kësaj Aleance jo vetëm si përfitues, por si anëtare gjithnjë e më e aftë për të kontribuar në të.

Dhe këtë po bëjmë dita-ditës, ndërsa në këtë rrugëtim, pjesë e të cilit është pa diskutim edhe vëmendja serioze që ne i kemi kushtuar Akademisë së Forcave të Armatosura për të ndihmuar në ndërtimin dhe fuqizimin e kapaciteteve tona, të cilat janë të afta të mendojnë, planifikojnë dhe të marrin vendime së bashku me aleatët e NATO-s, që kërkojnë gjithnjë e më shumë ndërveprueshmëri.

Po jetojmë në një kohë ku mjedisi i sigurisë ka ndryshuar rrënjësisht dhe të gjithë jemi të vetëdijshëm që kjo nuk është një deklaratë politike, por është një realitet. Gjërat që deri dje i dinim të sigurta, sot nuk janë më.

Inteligjenca artificiale, kërcënimet kibernetike, teknologjitë e reja po ndryshojnë mënyrën se si zhvillohen edhe konfliktet, edhe operacionet ushtarake. Prandaj, këto ndryshime kërkojnë gjithnjë e më shumë ushtarakë të mirë-arsimuar, që nuk duhet vetëm të dinë se si të përdorin teknologjinë, por edhe të kuptojnë se si ajo ndryshon mënyrën tonë të të menduarit, të planifikimit dhe të vendimmarrjes.

Në këtë drejtim, ndaj bindjen se investimi në arsim është investim në sigurinë kombëtare.

Presidenti i Shteteve të Bashkuara, Kennedy e ka përmbledhur shumë bukur atë që thotë “Lidershipi dhe të mësuarit janë të pandashëm”.

E kjo është pikërisht ajo që duhet të kultivojmë edhe këtu: njerëz që mësojnë për të udhëhequr dhe që udhëheqin duke mësuar edhe të tjerë.

Kjo e bën Akademinë e Forcave të Armatosura më shumë se një institucion arsimor, e shndërron atë në qendrën e dijes, të mendimit strategjik, të kërkimit shkencor, të inovacionit dhe të lidershipit.

Kjo Akademi është vendi ku formohen oficerët që do të drejtojnë Forcat e Armatosura të së nesërmes, por është gjithashtu vendi ku studiohet sfida e sotme, atë që ne sot e kemi përballë.

Më lejoni të falënderoj gjithashtu përzemërsisht e t’iu uroj një vit sa më të mbarë akademik të gjithë pedagogëve, instruktorëve dhe stafit akademik të Akademisë së Forcave të Armatosura!

Puna juaj është e veçantë dhe ka përherë një vlerë të jashtëzakonshme!

Ju nuk transmetoni thjesht dije, por formoni njerëz që nesër do të mbajnë një përgjegjësi për sigurinë dhe mbrojtjen e vendit!

Në fund, por jo më pak nga rëndësia, mirënjohje të veçantë për çdo familje që sot mbështet gjithsecilin prej jush këtu në Akademinë e Forcave të Armatosura! Një mbështetje e pakursyer në rrugëtimin që ju keni zgjedhur!

Unë personalisht, do ta ruaj të sinqertë bindjen se nga kjo Akademi do të dalin gjithmonë oficerë të zotë, profesionistë të shkëlqyer dhe liderë të denjë për uniformën, për Forcat e Armatosura të Republikës së Shqipërisë! Prandaj edhe njëherë ju uroj një vit sa më të mbarë akademik për të gjithë!

Ushtria shqiptare ndër vite, ka pasur numra shumë herë më të mëdhenj seç i ka sot, dhe ka pasur reforma nga më të ndryshmet, por është besnikëria, këmbëngulja, përkushtimi i oficerëve, i Forcave të Armatosura që kanë bërë të mundur të ruhet jo vetëm bërthama e Ushtrisë Shqiptare, por të transmetohet edhe dija.

Juve ju jepet një sfidë tjetër, që atë dije, atë besim, atë përkushtim, atë këmbëngulje në Forcat e Armatosura të mund ta shumëfishoni, duke bërë pjesë të saj edhe dijen e brezit tuaj e dijen e një lufte, e cila nuk është vetëm konvencionale, por është shumëformëshe.

Prandaj edhe njëherë suksese, mbarësi për vitin akademik dhe ju priftë e mbara në rrugëtimin tuaj!

Faleminderit!