Ministri i Mbrojtjes, Ermal Nufi, intervistë për Euronews Albania

e premte, 10 korrik 2026 18:29

Ministri i Mbrojtjes, Ermal Nufi, në një intervistë për Euronews Albania me Thimi Samarxhiun, ka folur lidhur me përzgjedhjen e Tiranës si mikpritëse e krerëve të NATO-s në samitin e ardhshëm. Gjatë fjalës së tij, ai u shpreh se samiti do të zhvillohet brenda vitit 2027 ose në fillim të vitit 2028, por theksoi se kjo do të vendoset nga liderët e shteteve.

Gazetari: Zoti ministër, kënaqësi t’ju kem në këtë lidhje të drejtpërdrejtë. Faleminderit shumë që gjetët kohë për këtë intervistë në Euronews Albania. Në radhë të parë, po ju pyes menjëherë: si shkoi samiti?

Ministri Nufi: Përshëndetje, Thimi. Samiti shkoi goxha mirë.

Është një nga samitet më të forta të NATO-s në vitet e fundit. Samiti i Ankarasë, në dallim nga Samiti i Hagës, ishte samiti në të cilin ajo që u garantua në Hagë, në lidhje me shpenzimet ushtarake, do të provohej në realizimin e angazhimeve dhe të ndërmarrjeve që shtetet kishin marrë përsipër. Të 32 shtetet anëtare kishin marrë angazhime.

Samiti i Ankarasë ishte një samit i cili pati angazhime shumë të forta nga të gjitha shtetet anëtare, në lidhje me shpenzimet ushtarake dhe përmbushjen e detyrimeve në raport me Aleancën.

Samiti i Ankarasë ishte definitivisht samiti i cili garantoi jo vetëm unitetin e Aleancës, por edhe vendosmërinë e saj për të qenë e gatshme kurdoherë përballë çdo lloj situate, për të mbrojtur qytetarët e Aleancës dhe për të mbrojtur vlerat që e bëjnë bashkë këtë Aleancë.

Gazetari: Zoti ministër, të paktën për ne qytetarët që nuk jemi në fushën e mbrojtjes, u duk sikur samiti ndau dy epoka: NATO përpara Ankarasë dhe NATO pas Ankarasë. Pra, a mund ta themi kështu, që ka ndryshuar NATO me këtë samit?

Ministri Nufi: Je krejt i saktë në pikëpamjen tënde dhe në atë që po konkludon. Në NATO tashmë është e njohur ajo që të gjithë aleatët e kanë kuptuar: ne sot po flasim për një NATO 3.0. Pra, NATO 1.0 ishte NATO-ja e parë, e cila i bëri ballë Luftës së Ftohtë.

NATO 2.0 ishte NATO-ja gjatë një periudhe goxha të relaksuar për sa i përket mjedisit të sigurisë dhe tani jemi në një NATO 3.0, një doktrinë e cila është nxjerrë në pah nga administrata Trump dhe administrata amerikane dhe është përqafuar nga të gjitha vendet anëtare.

Flasim për një Aleancë e cila sot, më shumë se kurrë, është e vendosur që jo vetëm të kryejë shpenzimet ushtarake deri në 5% të GDP-së vjetore të këtyre vendeve, por të jetë e gatshme për të gjitha situatat në raport me të gjitha kërcënimet.

NATO 3.0 është doktrina e re e NATO-s. Është një NATO e cila është e aftë t’i bëjë ballë ushtarakisht çdo lloj situate. Sot nuk jetojmë më në një epokë e cila mund të konsiderohet e qetë. Sot jetojmë në një epokë ku krizat janë evidente.

Kemi situatën në Iran, bllokimin e Ngushticës së Hormuzit, kemi situatën në Jemen, kemi situatën që po zhvillohet në vende të tjera të botës, në raport me krizat që janë në Afrikë. Pamë atë që ndodhi në Venezuelë, me largimin e një diktatori dhe instalimin e një qeverie më të relaksuar në raport me interesat amerikane, jo vetëm në Amerikën e Jugut, por kudo.

Besojmë shumë fort që të gjitha këto situata dhe skenarë janë të tilla që Aleanca ka nevojë të jetë patjetër e angazhuar.

Një detaj interesant dhe shumë i fortë është pjesëmarrja në Ministerialin e Mbrojtjes në Ankara e katër vendeve të Paqësorit dhe Indo-Paqësorit, konkretisht Japonisë, Koresë së Jugut, Australisë dhe Zelandës së Re. Katër vende shumë të forta, me angazhim shumë të fortë për sa i përket stabilitetit edhe në Indo-Paqësor.

Fakti që ato ishin të pranishme në Ministerialin e Mbrojtjes së NATO-s tregon shumë. Janë vende demokratike, të cilat ndajnë të njëjtat vlera me ne dhe që përqafojnë të njëjtat shqetësime sigurie që përqafojmë edhe ne. E gjithë situata botërore tani është drejt një polarizimi.

Ne vazhdojmë të qëndrojmë përkrah një Aleanceje që, sot që flasim, është aleanca ushtarake më e fortë në botë, NATO. Ne jemi krenarë që jemi pjesë e Aleancës dhe Republika e Shqipërisë ka ndërmarrë çdo hap të mundshëm për të garantuar përmbushjen e angazhimeve të saj në raport me Aleancën.

Një nga angazhimet e ndërmarra në Samitin e fundit të Hagës është shpenzimi i 5% deri në vitin 2035. Dhe ne këtë, Thimi, e shohim edhe tek akti i fundit normativ i miratuar nga qeveria shqiptare, i cili i çoi shpenzimet për mbrojtjen në 2.2%, për sa i përket shpenzimeve që janë të lidhura ngushtësisht me mbrojtjen.

Pra, shpenzime që lidhen me infrastrukturën e mbrojtjes, me armët, me sistemet e mbrojtjes dhe pastaj 0.4% që aktualisht ndodhet në buxhetin e mbrojtjes, pa llogaritur këtu shpenzimet e tjera që ne kemi tek AKSK-ja, pra tek Agjencia Kombëtare e Sigurisë Kibernetike, apo tek shpenzimet që ne kemi për infrastrukturat kritike, te Korridori 8, që bëjnë pjesë në mobilitetin e kërkuar nga NATO.

Tashmë Korridori 8 është pjesë e planeve të NATO-s dhe zhvillimi i tij është jashtëzakonisht vital, sa i përket sigurisë kombëtare, por edhe benefiteve që sjell.

Gazetari: Meqë e përmendët, zoti ministër, Korridorin 8, se pa dyshim jam totalisht dakord me ju. Unë e kam ndjekur nga afër atë që po ndodh, sepse realisht është një projekt që i duhet NATO-s. Meqë e përmendët, dua të ndalem pak te Korridori 8. Në çfarë faze jemi, zoti ministër? Si po shkon Korridori 8?

Ministri Nufi: Korridori 8, duhet të kesh parasysh, është i ndarë në dy shtylla kryesore. Është pjesa e infrastrukturës, që është infrastruktura rrugore, dhe pjesa e infrastrukturës ushtarake. Pra, janë dy nocione të ndryshme. Pjesa e infrastrukturës mbulohet nga Ministria e Infrastrukturës dhe Energjisë.

Gazetari: Jo, pjesën ushtarake dua. Pjesën ushtarake dua nga ju.

Ministri Nufi: Puna vazhdon me ritme shumë të shpejta, me ritme shumë të mira. Pjesa ushtarake është pjesë e kapaciteteve të kërkuara nga NATO për Republikën e Shqipërisë.

Ministria e Mbrojtjes, në planin e vet për shpenzimin e parave që alokohen për mbrojtjen, lidhet edhe me blerjen e sistemeve antiraketore, blerjen e qendrave mobile, blerjen e të gjitha pajisjeve të nevojshme apo mjeteve të nevojshme për garantimin e sigurisë së lëvizshmërisë në këtë Korridor 8.

Janë pjesë e planeve të Ministrisë së Mbrojtjes, janë pjesë e atyre sistemeve që do të prokurohen dhe do të sillen në Republikën e Shqipërisë për të garantuar mobilitetin e sigurt dhe të pacenuar përgjatë gjithë korridorit.

Gazetari: OK, faleminderit për këtë sqarim, zoti ministër. Ndërkohë, ndalem pak edhe njëherë te Samiti. Si ishte Shqipëria në sytë e aleatëve? Çfarë u tha për Shqipërinë në takimet me dyer të mbyllura? Pra, si ishte vlerësimi për Shqipërinë? Sepse jemi një vend i vogël, duhet ta pranojmë. Nuk është se jemi nga kontribuesit kryesorë në NATO, por me atë që kemi, gjithmonë kemi qenë aty. Çfarë u tha për Shqipërinë?

Ministri Nufi: Shqipëria është e vërtetë që është vend i vogël në krahasim me shumë vende të tjera brenda Aleancës, por gjithsecili vend brenda Aleancës ka rëndësinë e vet strategjike, ka impaktin e vet strategjik në raport me pozicionimin brenda Aleancës.

Republika e Shqipërisë, pavarësisht se e vogël ndoshta për sa i përket sipërfaqes dhe numrit të popullsisë, ka një kontribut në Aleancë që është i konsiderueshëm. Kjo vjen së pari për shkak të pozicionit gjeografik dhe gjeostrategjik të saj.

Është porta hyrëse për në Ballkan për sa i përket detit Adriatik. Korridori 8 është infrastrukturë kritike e NATO-s. Është momenti ku të gjithë trupat futen në drejtim të Bullgarisë dhe Detit të Zi.

Siç e dini, sot Deti i Zi është në një situatë të tensionuar. Lufta në Ukrainë e ka impaktuar patjetër gjithë situatën në Detin e Zi. Në luftën në Ukrainë kemi parë edhe incidentin me dron që ndodhi në Rumani, në mes të një qyteti, për shkak se tashmë ne e dimë që lufta në Ukrainë ka zhvilluar shumë edhe luftën nëpërmjet dronëve.

Garancia e sigurisë së të gjithë qytetarëve të NATO-s është e një niveli parësor sa i përket sistemeve që ne kemi në Aleancë. Ne pamë një raketë që u rrëzua në Turqi nga forcat aleate.

Ju garantoj që Shqipëria ka pozicionin e saj, Shqipëria ka angazhimet e saj. Ajo që patjetër u bë me dije në Aleancë dhe ajo që njihet nga Aleanca është fakti që Shqipëria tashmë është në atë që quhet “shtegu i besueshëm i shpenzimeve”.

Ne kemi marrë një commitment, pra kemi marrë një angazhim që deri në vitin 2035 do të kemi 5% të Produktit të Brendshëm Bruto si shpenzime për Ministrinë e Mbrojtjes dhe për mbrojtjen, të ndara respektivisht në 3.5% shpenzime që lidhen specifikisht me mbrojtjen dhe 1.5% me shpenzime që janë të lidhura me mbrojtjen, që mund të jenë shpenzime për infrastrukturën kritike, shpenzime për sigurinë kibernetike apo në fusha të tjera.

Shqipëria është në shtegun e besueshëm. Shqipëria sot është në 2.2% të GDP-së, sa i përket shpenzimeve të mbrojtjes të alokuara në buxhetin e Ministrisë së Mbrojtjes, ka 0.4% po në buxhetin e mbrojtjes dhe ka shpenzime të tjera që janë tek ministritë e tjera.

Jemi në rrugën e duhur, jemi në një shteg i cili shkon në rritje sa i përket përmbushjes së angazhimeve.

Themi një gjë që është shumë e rëndësishme për t’u përmendur: shumë nga vendet anëtare të NATO-s e kanë arritur që sot atë që quhet angazhimi i Hagës për 5% për buxhetin e mbrojtjes dhe kjo nuk është e rastësishme.

Dallohet që ka një angazhim të madh nga të gjitha shtetet e Europës që ai rialokim brenda Europës i trupave amerikane të mbushet, dhe ajo është mbushur plotësisht nga trupat e vetë dhe nga sistemet e vetë aleatëve këtu në kontinentin europian.

Aleanca është më e fortë dhe vendosmëria e shteteve të Aleancës është më e fortë se kurrë më parë. Shqipëria, në masën e saj, edhe pse të vogël, është besnike ndaj Aleancës, është besnike dhe është e përgjegjshme në raport me mbrojtjen e qytetarëve shqiptarë.

Detyra e gjithsecilit prej shteteve, pavarësisht përmasës, është që të përmbushë atë që ka si objektiv nga Aleanca.

Një shtet si Shqipëria ka objektiv nga Aleanca pesë sisteme. Një shtet si Polonia mund të ketë 180 sisteme. Nuk ka rëndësi. E rëndësishme është që gjithsecili vend të bëjë pjesën e vet, të ndarë nga Aleanca.

Shqipëria performon në mënyrë të jashtëzakonshme sa i përket trupave që ka në misionet ushtarake në KFOR, trupave që ka në Bullgari, trupave që ka në Letoni, trupave që ka për çminim dhe për të cilat ne jemi një nga vendet më të specializuara, mund të thoja, për sa i përket trupave EOD, e të tjera me radhë.

Angazhimi ynë ngelet: aleat besnik, aleat i fortë dhe i sigurt në masën tonë kombëtare.

Gazetari: Zoti ministër, duke u ndalur pak te armatimet e reja, pak ditë më parë pamë një lajm për blerjen e topave obusë nga Turqia. Cilat janë objektivat e ardhshme? Pra, për rigjenerimin e armatimit, të mjeteve ushtarake, të sistemeve mbrojtëse. Çfarë duhet të presim në muajt në vijim, në vitin në vijim? Cilat janë objektivat e Ministrisë së Mbrojtjes për shtimin e kapaciteteve luftarake të Forcave të Armatosura?

Ministri Nufi: Situata sot në Forcat e Armatosura të Republikës së Shqipërisë mund të konsiderohet e mirë.

Gazetari: Jo shumë e mirë ama, se thatë e mirë. Jeni edhe ju kritik që nuk është shumë e mirë?

Ministri Nufi: Nuk themi shumë e mirë, sepse nuk duam të mburremi dhe nuk duam të ngremë një stekë më lart se ç’është. Por ajo që është e vërteta është që situata në Forcat e Armatosura është e mirë.

Me të gjitha këto shpenzime të mbrojtjes që qeveria ka alokuar për mbrojtjen, ne shkojmë drejt rritjes dhe modernizimit të Forcave të Armatosura me sistemet më të fundit.

Ne, në qeverinë shqiptare dhe në Ministrinë e Mbrojtjes, jemi kurdoherë me këmbë në tokë kur flasim për sigurinë kombëtare. Nuk bëjmë deklarata që mund të konsiderohen të nesërmen të nxituara apo jashtë realitetit.

Gazetari: Për këtë ju vlerësoj personalisht. Një vlerësim nga ana ime: nuk bëni deklarata që pastaj kthehen në meme, siç janë bërë shumë kohët e fundit. Për këtë ju përgëzoj personalisht.

Ministri Nufi: Faleminderit. E vlerësoj shumë.

Qasja që ka qeveria shqiptare për mbrojtjen është qasje konkrete, me këmbë në tokë, reale. Buxheti i Republikës së Shqipërisë është dyfishuar që nga koha që PS-ja e ka marrë pushtetin, por nevojat në Republikën e Shqipërisë janë po ashtu shumë të mëdha dhe qeveria shqiptare e rishikon këtë buxhet sipas të gjitha ministrive.

Në përputhje me Samitin e Hagës dhe me angazhimin në Hagë, kemi mbajtur fjalën. Jemi në 2.6% të GDP-së si buxhet tek Ministria e Mbrojtjes, pa llogaritur shpenzimet e tjera dhe ministritë e tjera.

Kjo është një angazhim konkret për të mbajtur fjalën ndaj Aleancës, por edhe për të rritur atë që quhet gjendja e përgjithshme e mbrojtjes në Republikën e Shqipërisë.

Të gjitha këto shpenzime që janë alokuar tek mbrojtja me aktin e fundit normativ, të gjitha shpenzimet që Shqipëria ka vendosur të kryejë për mbrojtjen, pjesa më e madhe e tyre shkon për modernizimin e Forcave të Armatosura, për modernizimin e sistemeve, në përputhje me objektivat e kapaciteteve të vendosura nga NATO.

Pra, e kam thënë edhe në deklarata të tjera për shtyp: Republika e Shqipërisë nuk ka një qasje individuale në raport me mbrojtjen. Jo. Dhe këtë nuk e ka asnjë shtet në NATO.

Të gjitha shtetet e NATO-s ndodhen në një framework të përgjithshëm, në një strategji të përgjithshme dhe gjithsecilit prej tyre i vendosen kapacitete nga NATO.

NATO, sa i përket mbrojtjes, ka një aleancë ushtarake, një Komitet Ushtarak që drejtohet nga një gjeneral në NATO.

Ka një komandë tjetër qendrore, Supreme Allied Command, që ndodhet në Mons, e cila është qendra ku komandohet e gjithë Aleanca dhe ku ndahen çdo vit me Aleancën jo vetëm kapacitetet që i duhen çdo shteti, por edhe ndarja apo rishpërndarja e trupave në misione të ndryshme brenda Aleancës.

Shqipëria ecën në atë shteg.

Shpenzimet ushtarake për sisteme dhe modernizim shkojnë në atë shteg, drejt atyre kapaciteteve të vendosura nga Aleanca.

Besoj që kjo është strategjia e duhur. Pra, jo një qasje individuale e shteteve në raport me mbrojtjen, por një qasje kolektive e drejtuar në mënyrë strategjike nga Aleanca dhe e koordinuar mes të gjitha shteteve, në mënyrë që postura e përgjithshme, pra gjendja e përgjithshme e të gjitha Forcave të Armatosura në Europë, të jetë e tillë që t’i bëjë ballë çdo lloj shqetësimi apo çdo lloj kërcënimi për sigurinë e Aleancës.

Ngjarje si ajo e Rumanisë, sidomos ngjarja e Turqisë, pra rrëzimi i kësaj rakete nga forcat aleate, janë fakte konkrete të gatishmërisë dhe sigurisë që Aleanca i jep të gjithë qytetarëve.

Janë 1 miliard njerëz që mbrohen nga kjo Aleancë. Janë 1 miliard njerëz që jetojnë çdo ditë të sigurt, zhvillojnë biznes çdo ditë në mënyrë të sigurt, për shkak të të gjitha shpenzimeve dhe angazhimeve që kanë qeveritë brenda Aleancës.

Gazetari: E kuptoj, por nuk më thatë ku duhet të fokusohet, ose më saktë, ku po fokusohet Forca e Armatosur, në çfarë lloj kapacitetesh për t’i ndryshuar, për t’i modernizuar. Cilat janë kapacitetet? Pra, sistemet antiajrore apo, nuk e di, raketat? Javelinët i kemi, topat obusë i kemi tashmë. Çfarë sistemesh, ku do duhet të fokusohemi?

Ministri Nufi: Javelinët i kemi marrë. Këto janë detaje teknike. Jo se doja ta evitoja pyetjen, por janë gjëra që lidhen kryesisht me specifikat teknike të specialistëve të ushtrisë që janë gjithmonë në Forcat e Armatosura.

Është Shtabi i Përgjithshëm i cili është përgjegjës dhe vendos se cilat janë sistemet që merren, që blihen.

Ato që ne mund të themi dhe që kanë dalë si fakte publike janë që ne, me Shtetet e Bashkuara të Amerikës, kemi marrë një kredi që do të finalizohet shumë shpejt dhe do të nënshkruhet, do të kalojë edhe në Parlament, për blerjen e helikopterëve Black Hawk, për blerjen e një sistemi mbrojtës tokësor shumë të avancuar, për integrimin e sistemeve në një rrjet të sigurt komunikimi.

Sistemet e tjera antiajrore që do të merren në Republikën e Shqipërisë, që janë medium/short range, janë shumë të nevojshme.

Ju thashë, nuk po hyjmë në detaje për t’i ndarë specifikisht, sepse ato i përkasin Shtabit dhe lidhen edhe me çështje që ndoshta janë teknike të tyre.

Gazetari: Ndoshta janë edhe sekrete, se disa gjëra nuk thuhen të gjitha. Kështu që, të jemi korrektë, dua të pyes për të sqaruar.

Ministri Nufi: Të falënderoj për mirëkuptimin.

Gazetari: Jo, pa dyshim. E vlerësoj. Pa dyshim, unë e ndjek ushtrinë dhe Forcat e Armatosura realisht janë një nga institucionet që unë i vlerësoj më shumë. E kam thënë gjithmonë dhe i vlerësoj shumë, sepse në dimër, në verë, ata janë ata që shuajnë zjarret dhe janë ata që shpëtojnë familjet që janë nën ujë.

Kështu që unë kam një respekt maksimal për Forcat e Armatosura, personalisht. Por, zoti ministër, do të pyes në fund çfarë duhet bërë më shumë.

Ministri Nufi: Shërbimi i tyre është i jashtëzakonshëm.

Gazetari: Jo, totalisht dakord. Kam shumë më shumë për të thënë për ta.

Për të sqaruar njëherë e mirë këtë historinë e Samitit të ardhshëm. Pse u la pa datë? Se është bërë shumë zhurmë e madhe për Samitin e ardhshëm që do të bëhet në Tiranë. Ma sqaroni pak tani, zoti ministër, këtë histori.

Ministri Nufi: Unë mbi tavolinën time kam deklaratën e Samitit të Ankarasë dhe duhet të kuptojmë se si funksionon Aleanca.

Aleanca ka ministerialet që janë për ministrat e Mbrojtjes, ka ministerialet që janë për ministrat e Punëve të Jashtme, që përfaqësojnë pastaj vullnetin politik, dhe janë edhe samitet që janë për të gjitha shtetet.

Në çdo samit Aleanca angazhohet në terma konkretë.

Në Samitin e Hagës ne u angazhuam që do të kryejmë shpenzime për mbrojtjen në masën 5% deri në vitin 2035. Do të krijonim atë që quhej “credible path”, ku çdo shtet do të deklaronte se si do të ecte në raport me shpenzimet vjetore në buxhetin e shtetit.

Dhe në Samitin e Ankarasë ishte samiti ku krerët e shteteve deklaruan çfarë kishte ndodhur konkretisht.

Mund të them, pa detaje, se ka shtete që kanë mbi 6% të kryera që këtë vit.

Gazetari: Po, i kanë kapacitetet, normale.

Ministri Nufi: Patjetër. Kanë edhe rrezik ndoshta më të madh se shumë të tjerë.

Ajo që është e nevojshme të kuptojmë dhe ajo që mund të themi ne është që Samiti i ardhshëm është pikërisht për të parë këto shpenzime që ne kemi alokuar.

Pra, në Hagë dhamë fjalën që do të vëmë shpenzimet, në Ankara u deklaruan sa shpenzime janë dhënë. Në Samitin e ardhshëm, që do të zhvillohet në Tiranë, do të jetë samiti kur do të diskutohet konkretisht ku jemi me ekzekutimin konkret të këtyre parave, ku jemi me sistemet konkrete, ku jemi me prodhimin e tyre, ku jemi me vendosjen e tyre.

Normalisht që për t’u kryer këto shpenzime, për t’u kryer këto prokurime, për të ardhur këto sisteme, mund të duhen më shumë se 12 muaj, mund të duhen 18 muaj, mund të duhen 24 muaj dhe është për krerët e NATO-s që të vendosin kur do të jetë samiti i radhës.

Është një situatë që po evoluon në mënyrë të vazhdueshme. Është një situatë sigurie e cila është shqetësuese për situatën në Europë.

Një gjë që mund ta them nga Samiti i NATO-s është që shqetësimi i 32 shteteve është fakti që lufta në Ukrainë vazhdon dhe që lufta në Ukrainë është kaq shqetësuese, sepse po flasim për konflikte që ndodhin në Lindjen e Mesme apo konflikte të tjera që mund të jenë nëpër botë.

Pra, është një situatë sigurie e cila mund të ketë nevojë për një samit pas gjashtë muajsh, mund të ketë nevojë për një samit pas 12 muajsh. Pra, varet nga çfarë duam të arrijmë në samitin e radhës.

Nuk ka samit pa një deklaratë. Nuk ka samit që të mos ketë një deklaratë me pika konkrete.

Fakti që samiti zhvillohet në Tiranë nuk është vendosur specifikisht në këtë samit dhe e tha vetë Sekretari Rutte.

Fakti që samiti i ardhshëm pas Ankarasë do të zhvillohej në Tiranë është vendosur që në Hagë.

Në këtë samit u ritheksua angazhimi për shpenzimet ushtarake. U tha në mënyrë të qartë: uniteti i Aleancës është më i fortë se kurrë. Dhe ky ishte një mesazh për të gjithë ata që janë ndoshta me mendime të kundërta me Aleancën, ndajnë vlera të kundërta me Aleancën dhe kanë qëllime jomiqësore ndaj Aleancës.

Mesazhi ishte: ne jemi gati, ne jemi të unifikuar. Qëndrimi i shteteve është njëzëri në raport me atë që thamë dhe diskutuam.

Pse nuk u ritheksua?! U tha në Hagë, u rikonfirmua edhe sivjet: samiti i ardhshëm do të bëhet në Tiranë.

A do të jetë brenda vitit 2027 apo do të jetë në fillim të vitit 2028, kjo varet nga çfarë do të vendosin liderët e shteteve.

Ajo që është mesazh dhe ajo që unë po e rithem sot është mesazhi që jepet duke u zhvilluar një samit në Ankara dhe duke u vendosur një samit në Tiranë.

Ky është një mesazh. Ky nuk është thjesht një location dhe thjesht një vendndodhje.

Mesazhi është: Aleanca është kudo. Aleanca është në Hagë, në zemër të Europës. Aleanca është në Ankara, në kufijtë e Aleancës. Aleanca është në Tiranë, në shtete që dikur ishin pjesë e një blloku tjetër, por që sot ndajnë vlera të përbashkëta me Europën, ndajmë vlera të përbashkëta me Aleancën tonë transatlantike dhe me Aleancën që ne sot po forcojmë akoma dhe më shumë edhe me vendet e Indo-Paqësorit, që janë po ashtu vende demokratike dhe që ndajnë të njëjtat vlera.

Gazetari: Zoti ministër, se e di që keni angazhime, kam edhe një pyetje të fundit, dy pyetje më saktë.

Pyetja e fundit, por duhet të dal pak nga samiti i NATO-s. Dua të shkoj pak, meqë përmendët edhe Lindjen e Mesme, në çfarë faze jemi, nëse mund të thuhet, lidhur me dërgimin e trupave shqiptare në Gaza? Sepse u pa që një grup ka shkuar për rikonjicion pak kohë më parë, së bashku me kolegët e FSK-së. Mund të themi diçka lidhur me këtë proces?

Ministri Nufi: Patjetër. Sot jemi në gjendje të themi diçka më shumë.

Herën e fundit që jam deklaruar, kemi qenë në kohën që kemi mbyllur rikonjicionin dhe kanë ardhur oficerët tanë në Tiranë dhe kanë bërë raportin. Shtabi ka vendosur se cili do të jetë niveli i angazhimit në misionin tonë në Gaza, në misionin ndërkombëtar në Gaza.

Nga pala shqiptare do të dërgohen oficerë shtabi fillimisht, për t’u bërë pjesë e shtabit të forcave ndërkombëtare në Gaza.

Në momentin që këta oficerë do të jenë atje, do të vijojmë edhe me fazën e dytë të konkretizimit se cilët do të jenë nga trupat që do të shkojnë atje, në varësi edhe të nevojës dhe të situatës që do të lindë në terren.

Por ajo që është marrë vendim dhe ajo që u vendos, do t’i paraqesim aktet nënligjore Këshillit të Ministrave dhe Qeverisë për miratim, që ne të dërgojmë oficerë shtabi që të jenë pjesë e trupës ndërkombëtare stabilizuese për Gazën.

Shqipëria ngelet e angazhuar, në përputhje me atë që Kryeministri ka deklaruar në Bordin e Paqes. Do të dërgojmë trupat tanë në Gaza, duke filluar fillimisht me oficerët e shtabit dhe, pas vlerësimit të tyre, do të vazhdojmë edhe më tej.

Por ky është lajmi që ne mund të ndajmë sot, pas këtij rikonjicioni që trupat tanë kanë zhvilluar atje: do të dërgojmë oficerët e shtabit, që të bëhen pjesë e forcës ndërkombëtare stabilizuese dhe më tej do të shikojmë.

Gazetari: Kemi një numër, zoti ministër, dhe një afat kur do të shkojnë këta trupa apo do të jetë gjithçka e koordinuar, dërgimi atje? Pra, do të jetë e koordinuar me gjithë Bordin?

Ministri Nufi: Besoj se do të koordinohet me Komandën e Trupave të ISF-së.

Do ta bëjmë publike në momentin që do të miratohet vendimi i Këshillit të Ministrave. Do ta bëj unë publike dhe do të them konkretisht sa oficerë shtabi do të çojmë atje fillimisht dhe pastaj se si do të vazhdojmë konkretisht me hapat e tjerë që do të ndërmerren, përsëri sipas vlerësimit të Shtabit në raport me dërgimin e trupave.

Gazetari: Faleminderit që e ndatë këtë lajm në studion time, zoti ministër, se është hera e parë që artikulohet ky lajm, pra dërgimi i oficerëve të Shtabit për në Gaza. E vlerësoj shumë që e ndatë në studion time. Në fund, zoti ministër, duke u kthyer edhe njëherë te djemtë dhe vajzat e Forcave të Armatosura, çfarë premtimi keni për ta sot?

Se unë thashë, unë i vlerësoj shumë ata djem dhe vajza që punojnë te Forcat e Armatosura. Për fat të mirë, gjatë mandatit të kaluar ata kanë pasur një deputet, Denis Deliun, që ka qenë përfaqësuesi i tyre në Parlament dhe ka bërë shumë nisma për Forcat e Armatosura, që nga rritja e pagave, projektligji për rezervistët dhe gjithçka tjetër.

Pra, ka pasur një vëmendje të shtuar për Forcat e Armatosura. Cili është plani juaj si ministër për Forcat e Armatosura? Rritje pagash? Nuk e di çfarë keni ju personalisht si objektiv për Forcat e Armatosura, që në fund të mandatit tuaj, kurdo që të jetë ai, të mbaheni mend që Ermal Nufi në këtë post arriti të bënte këtë gjë për Forcat e Armatosura?

Ministri Nufi: Unë kam një qasje pak më ndryshe, Thimi. Unë dua që të mbahen mend Forcat e Armatosura të Republikës së Shqipërisë, jo Ermal Nufi.

Ermal Nufi është kalimtar. Është sot i ngarkuar me detyrën e rëndë të shërbejë si Ministër i Mbrojtjes i Republikës, detyrë që unë mundohem ta kryej me shumë përulësi.

Unë jam krenar që ju shërbej në detyrën time qytetarëve shqiptarë, Forcave të Armatosura, specifikisht djemve dhe vajzave që ne kemi, për një punë të vështirë, një punë që e bëjmë me sakrificë, me vendosmëri.

Sot kishim një ceremoni diplomimi për oficerët e lartë. Fjalët që ndava aty janë fjalë që do t’i them përsëri.

Është një investim personal i tyre, por që kolektivisht është për sigurinë e të gjithë qytetarëve shqiptarë. Puna që ata kryejnë është një punë e paçmueshme dhe angazhimet e qeverisë shqiptare mbeten kurdoherë me vëmendje të plotë për gjithsecilin prej tyre.

Është vëmendja e Kryeministrit Edi Rama, qoftë për pagesat e tyre, qoftë për shpërblimet e tyre, qoftë për statusin e ushtarakut, në të cilin jemi ndoshta në ditët e fundit të punës në raport me paketën ligjore të miratimit, e cila do të çimentojë përfundimisht trajtimin e Forcave të Armatosura me nderim dhe respekt për sakrificat e tyre, për sakrificat që ata bëjnë në familjet e tyre, për sakrificat që ata bëjnë për çdo qytetar shqiptar.

Nderimi është për ta, puna është për ta. Dua që të mbahen mend ata, dua që të mbahet mend sakrifica e tyre.

Nuk ka gjë më të bukur sesa të shikosh dhe t’u shërbesh njerëzve në uniformë, njerëzve që çdo ditë sakrifikojnë për qetësinë dhe për sigurinë e vendit tonë.

Por edhe të rikthehet statusi i ushtarakut nga Qeveria Shqiptare, sipas premtimit të Kryeministrit Rama.

Gazetari: Zoti ministër, shumë faleminderit. Shumë kënaqësi! OK, këtë e keni on camera këtu, kështu që padyshim e kemi të regjistruar. Zoti ministër, shumë faleminderit. E vlerësoj shumë. Të përshëndes dhe të uroj punë të mbarë. Faleminderit shumë, zoti ministër.

Ministri Nufi: Me kënaqësi. Shumë faleminderit!