Fëmijët e Qendrës Rekreative festojnë Ditën Botërore të Kafshëve

e hënë, 07 tetor 2013 13:57

Kjo është një ditë për të reflektuar mbi marrëdhënien ndërmjet njeriut dhe miqve të tij me katër këmbë. Aktiviteti erdhi si një veprimtari për të ndërgjegjësuar opinionin publik mbi rëndësinë e respektimit të të gjithë krijesave të gjalla që ndërveprojnë me ne dhe që shpesh mbeten dhe viktima të indiferencës së njerëzve.

Gjatë kësaj dite fëmijët dhe familjarët patën mundësinë të vizitonin Pezën, ku fillimisht vizituan shtëpinë muze “Konferenca e Pezës”. Këtu u mbajt dhe fjala përshëndetëse nga përfaqësia e QKMBM, nga drejtori i Drejtorisë së Aktiviteteve dhe Marrëdhënieve me Publikun, z. Aleksandër Gjonaj, i cili falënderoi të gjithë pjesëmarrësit për përfshirjen dhe praninë në këtë aktivitet, si dhe bëri një prezantim të historikut të kësaj banese karakteristike shqiptare. Më tej pjesëmarrësit patën mundësinë të shijonin natyrën dhe të argëtoheshin me kafshët që gjendeshin rrotull kësaj zone, si dhe të miqësoheshin me kuajt e fushës së hipizmit të Pezës. Ajo që spikati gjatë këtij aktiviteti ishte afeksionimi i menjëhershëm i fëmijëve me kafshët e zonës duke iu dhuruar përkëdhelitë dhe duke ushqyer dhentë, qentë e kuajt. Me tej aktiviteti u transferua ne një tjetër zonë të hapur në natyrë ku fëmijët kënduan këngë të ndryshme për kafshët, si dhe recituan vjersha e poezi dedikuar atyre, nën udhëheqjen e specialisteve të QKMBM. Sipas programit u zhvillua dhe ora e hapur e pikturës në natyrë gjatë së cilës fëmijët vizatuan kafshë të ndryshme, peizazhe të zonës apo imagjinatë të lirë.

Nuk munguan në këtë ditë dhe lojërat argëtuese, pikniku në natyrë si dhe ushtrimi i hipizmit nga fëmijët e prindërit të cilët i shoqëronin. Ky aktivitet synoi sensibilizimin dhe ndërgjegjësimin e njeriut mbi faktin se nuk është i vetëm në këtë bote, ndaj dhe duhet të mësojë dhe të respektojë ekzistencën dhe prezencën e çdo gjëje të gjallë, të cilat edhe pse të paafta për t’u shprehur në të njëjtën gjuhë, sërish ekziston mundësia që midis palëve të vendoset një gjuhë e simbolikës, për t’u kuptuar.
Gjithashtu, synoi ndërgjegjësimin mbi rëndësinë e pranisë të kafshëve dhe të shpendëve, mbi masat qe duhen marrë për parandalimin e zhdukjes, e cila vjen jo vetëm në mënyre të drejtpërdrejtë, por edhe si pasojë e të gjithë veprimeve të njeriut mbi natyrën.