Kolonel Leonard Çoku i njohu gjimnazistët me mundësitë dhe përfitimet që ata do të kenë nëse i bashkohen radhëve të FA. "Puna është e fokusuar në fushatat promovuese, me grupet e interesit, mbi mundësinë që ofrojnë FA për një karrierë dhe jetë të sigurtë për të rinjtë e të rejat që dëshirojnë të bëhen pjesë e jona. Anëtarësimi i Republikës së Shqipërisë në NATO, kalimi në një ushtri tërësisht profesioniste, ka krijuar hapësira dhe avantazhe për të gjithë shtetasit.
Kjo i ka bërë Forcat e Armatosura të jenë më tërheqëse për të rinjtë e të rejat, për faktin se nëse rekrutohesh dhe bëhesh pjesë e FA, përftimet dhe mundësitë janë më të mëdha, pasi bëhet pajisja me një kontratë pune të rregullt dhe të sigurtë, përfitohet shërbim shëndetësor falas për vete dhe familjen, krijohet mundësi arsimimi dhe kualifikimi brenda e jashtë vendit pa pagesë, fitohen aftësi të reja profesionale, bëhet pajisja me vlerën e ushtarit profesionist, i cili përfiton të gjitha të drejtat që parashikon Statusi i Ushtarakut të Republikës së Shqipërisë.
Çdo shtetas që dëshiron të bëhet pjesë e FA, do të shërbejë në një institucion serioz ku njerëzit respektohen dhe vlerësohen për kontributin e tyre", u shpreh ndër të tjera ai. Më tej kolonel Çoku nënvizoi se: "Takimi i parë që u zhvillua me ju ishte mjaft frytdhënës dhe kërkesat për t’ju bashkuar radhëve të FA u shtuan shumë pas këtij takimi. Personat që testuam në muajin shtator sot ndjekin Stërvitjen Individuale në Bunavi, Vlorë, si fitues të garës dhe do fillojnë punë në Forcat e Armatosura, dikush si specialist, dikush në Policinë Ushtarake, dikush për karrierë ushtarake dhe në muajin mars të vitit që vjen do të jenë pjesë e kontingjentit që do të shkojnë në Shtetet e Bashkuara të Amerikës për t’u promovuar oficer".
Në përfundim të këtij takimi, gjimnazistëve iu shpërndanë çanta dhuratash, të cilat përmbanin një bluzë, një kapele dhe një stilolaps me logon e Qendrës së Personel Rekrutimit me moton “Bëhu edhe ti pjesë e Forcave të Armatosura”, përgatitur nga Sektori i Marketingut në Qendrën e Kulturës, Medias, Botimeve, Muzeut dhe Shtëpive të Pushimit.
