Këto ditë, në mjediset e palestrës së garnizonit ushtarak “Skënderbej” u zhvillua aktiviteti sportiv “Kupa Petrit Murzaku” në volejboll për femra. Ky aktivitet u zhvillua në nderim të figurës së shquar sportive dhe ushtarake, Petrit Muzaku, Mjeshtër i Merituar i Sportit dhe nder i sportit shqiptar.
Aktiviteti sportiv u zhvillua nën kujdesin e znj. Mirela Roshi, drejtoreshë e Qendrës së Kulturës, Medias, Botimeve të Mbrojtjes, Muzeut dhe Shtëpive të Pushimit (QKMBMMSHP) dhe të Ministrisë së Mbrojtjes.
Të pranishëm në këtë aktivitet ishin figura të shquara të sportit shqiptar si: Vangjel Koja, Sokol Morina, Muhamet Përmeti, Njazi Lleshi, Qemal Shalsi, Vasil Bimo, Agim Fagu, Shaban Uka, Ajet Toska, Isa Tare, Gazmend
Çaçi, Mimoza Usha, si dhe mjaft emra të tjerë të njohur të sportit shqiptar.
Në fjalën që mbajti me këtë rast, drejtoresha e QKMBMMSHP, znj. Mirela Roshi, falënderoi të gjithë
pjesëmarrësit në aktivitet dhe në mënyrë të veçantë mjeshtrin Petri Murzaku për vlerat e mëdha sportive dhe kontributin që ai ka dhënë ndër vite për rritjen dhe zhvillimin
e sportit në Shqipëri në përgjithësi dhe veçanërisht në FA. Më tej, znj. Roshi foli edhe për aktivitetet që janë zhvilluar dhe do të zhvillohen në të ardhmen nga qendra që
ajo drejton, për të kujtuar dhe vlerësuar sidomos figurat e shquara dhe të njohura jo vetëm të sportit në FA dhe atij shqiptar, por edhe në fushat e tjera dhe për t’i transmetuar brezave të rinj
vlerat e gjeneratave që kanë bërë histori në vendin tonë.
Pjesëmarrëse në këtë aktivitet sportiv ishin katër skuadra dhe fituese e kupës “Petrit Murzaku” në
volejboll për femra u shpall ekipi “Dardania” i fëmijëve të ushtarakëve të FA. Kupa për ekipin “Dardania”, fitues të kësaj gare sportive, iu dorëzua nga mjeshtri Petrit Murzaku.
Ndërsa kupa për lojtaren më të mirë u dorëzua nga drejtoresha e QKMBMMSHP, znj. Mirela Roshi.
Në fund, pjesëmarrësit në këtë aktivitet i përshëndeti, z. Petrit Murzaku,
i cili falënderoi organizatorët e kësaj gare sportive, si dhe i uroi suksese të gjithë ekipeve pjesëmarrëse në aktivitete të tjera.
