Dita Ndërkombëtare e Muzeve u kujtua edhe në mjediset e Muzeut të Forcave të Armatosura, në kryeqytet.
Në këtë aktivitet ku morën pjesë nxënësit e shkollës 9-vjeçare “Gjon Buzuku”, ishin të pranishëm edhe nënkryetari i Bashkisë së Tiranës, z. Abaz Hado, drejtori i Shtabit të Përgjithshëm kolonel Ardian Bali, drejtoresha e QKMBMMSHP znj. Mirela Roshi, ushtarakë dhe ish-ushtarakë që kanë kontribuuar në ngritjen e këtij muzeu.
Pas përshëndetjeve të rastit nga kolonel Bali dhe znj. Roshi, nxënësit dhe mësuesit e shkollës 9-vjeçare “Gjon Buzuku”, vizituan mjediset e Muzeut të Forcave të Armatosura, ku panë nga afër armët dhe objektet e ekspozuara aty.
Në fund disa ushtarakëve dhe ish-ushtarakëve, iu dorëzuan certifikata mirënjohjeje për kontributin e dhënë në pasurimin me objekte të Muzeut të Forcave të Armatosura, në kuadrin e Ditës Ndërkombëtare të Muzeve. Data 18 maj është caktuar si Dita Ndërkombëtare e Muzeve në vitin 1977, me Rezolutën nr. 12 të Këshillit Ndërkombëtar të Muzeve (ICOM).
