Ceremoni përkujtimore me rastin e 70 – vjetorit të Artistit të Merituar, Kujtim Laro. Koçi: duhej nderuar me “Nderi i Kombit”

e premte, 19 Maj 2017 15:38

Fotogaleria

Me rastin e 70 - vjetorit të lindjes së kompozitorit dhe udhëheqësit artistik të Ansamblit të Forcave të Armatosura, Artistit të Merituar Kujtim Laro, u mbajt sot në mjediset e Ministrisë së Mbrojtjes një aktivitet përkujtimor.

Të pranishëm në aktivitet ishin zëvendësministri i Mbrojtjes, Petro Koçi, zëvendësshefi i Shtabit të Përgjithshëm të FA gjeneral brigade Dedë Prenga, gjeneralë, drejtorë, ushtarakë, të afërm, miq dhe bashkëpunëtorë, në mes të të cilëve edhe regjizori i madh Dhimitër Anagnosti dhe aktorja Roza Anagnosti.

Në fjalën e tij përshëndetëse zëvendësministri i Mbrojtjes, Petro Koçi kujtoi jetën e Kujtim Laros që nga vegjëlia e deri në kontributin e tij si kompozitor dhe drejtues në Ansamblin e Ushtrisë. “Vitet 1975 - 1993, kur punoi në Ansamblin e Ushtrisë, i çuan më tej rezultatet e afirmimit profesional gjithnjë në rritje. Kujtimi mbajti lart emrin dhe dinjitetin e institucionit që u rrit më tej bashkë me të. Ky institucion jo vetëm mbajti famën e madhe të kohës së Gaqo Avrazit por ravijëzoi më tej portretin e vet artistik me bashkëveprimin harmonik të strukturave të tij, nën udhëheqësinë profesionale të Kujtimit”, - deklaroi z. Koçi.

Zëvendësministri i Mbrojtjes vlerësoi veprat dhe orkestrimin e Kujtim Laros, si një pasuri e jashtëzakonshme e kulturës muzikore shqiptare dhe i cilësoi ato si pjesët më të mira të traditës së saj. Më tej zëvendësministri i Mbrojtjes foli për karrierën e tij në Trupën Artistike të Forcave të Armatosura dhe vlerësoi kontributin e tij. “Kujtimi, si asnjë artist tjetër në Shqipëri, për gati 30 vjet (1975 - 2004), punoi në trupat artistikë të Forcave të Armatosura dhe dha një kontribut shumë të rëndësishëm nëpërmjet krijimtarisë dhe personalitetit të tij. Duke e ndjerë veten sa artistist dhe kuadër ushtarak deri në gradën nënkolonel, ai e pati në qendër të vëmendjes, të kujdesit dhe të krijimtarisë së vet jetën e ushtrisë, dedikim për ushtarakët dhe artistët në Forcat e Armatosura”, - tha z. Koçi.

Zëvendësministri i Mbrojtjes nënvizoi faktin se “ndaj artistit të madh, shteti shqiptar është debitor, për arsye se Kujtim Laro për kontributin e madh që ka dhënë në muzikën shqiptare duhej të ishte nderuar me titullin Nderi i Kombit”. 

Fjalë të ndjera për Kujtim Laron thanë dhe miqtë dhe bashkëpunëtorët të cilët ngritën lartë vlerat e tij njerëzore dhe ato profesionale.

Ndërkohë që QKMBMMFA, në nder të tij kishte përgatitur një dokumentar me muzikën, kolonat zanore të filmave më të arrirë, mes të cilëve “Lulëkuqe mbi mure”, këngët fituese të festivaleve kombëtare, intervista të dhëna më parë nga vetë kompozitori që s’jeton më dhe intervista të bashkëpunëtorëve të tij, i cili u shfaq dhe krijoi emocione për të pranishmit.

Ndërsa Banda Frymore e Forcave të Armatosura luajti muzikën e Kujtim Laros, të shoqëruar dhe nga këngëtarja Paola Kotani.

Kujtim Laro lindi në 1947 dhe gjithë jeta e tij iu kushtua pentagramit. Ai është autori i muzikës së 35 filmave artistikë dhe dhjetra këngë festivalesh, të përcjella nga zëri i pakrahasueshëm i Vaçe Zelës dhe këngëtarëve të tjerë të njohur.