Aktivitete me rastin e Ditës Ndërkombëtare kushtuar Sportit për Zhvillim e Paqe

e premte, 06 prill 2018 13:00

Fotogaleria

Më 23 gusht 2013, OKB-ja vendosi që data 6 prill të jetë Dita Ndërkombëtare e Sportit për Zhvillim e Paqe. Njëkohësisht kjo datë përkon edhe me ditën e hapjes së Lojërave Olimpike Moderne, që u zhvilluan në Athinë, në vitin 1896.

Në kuadër të kësaj dite, në garnizonin “Skënderbej” u organizuan një veprimtari masive, e cila përkon edhe me axhendën e Ministrisë së Mbrojtjes për Vitin Mbarëkombëtar të Gjergj Kastriotit, Skënderbeu.

Në hapje të kësaj veprimtarie, nënkampionja e Evropës, njëkohësisht edhe pjesëtare e FA, i dorëzon në mënyrë simbolike flakën olimpike shefit të Shtabit të Përgjithshëm të FA, gjeneral brigade Bardhyl Kollçaku, i cili më pas ia dorëzoi grupit të fëmijëve si shenjë vazhdimësie.

Të ftuar në këtë ditë ishin ekipe të ndryshme nga FA si dhe nga jashtë, të cilët performuan në futboll, volejboll, basketboll, mundje, atletikë, karate, shah, etj.
6 prilli, si Dita Ndërkombëtare e Sportit për Zhvillim e Paqe, midis të tjerave, ka si qëllim promovimin e mënyrës së shëndetshme të jetës dhe inkurajimin e Lëvizjes Olimpike Ndërkombëtare që përqendrohet në lejimin e qasjes në sport të sa më shumë njerëzve që të jetë e mundur.

Kjo datë, e konsideruar si event i ri vjetor, shërben për promovimin e sportit dhe aktivitetit fizik, si gjuhë universale dhe mjet për edukimin, shëndetin, përfshirjen sociale, zhvillimin e rinisë dhe ndërtimin e një mjedisi bashkëpunues e paqësor.

Aktiviteti i sotëm u organizua nga Qendra e Kulturës, Mediave, Botimeve të Mbrojtjes e Muzeut të Forcave të Armatosura.

VIDEO: