Festohet Dita e Luleve

e shtunë, 10 Maj 2014 11:57

Foto Galeri

Në kuadër të Ditës Ndërkombëtare të Mjedisit, në mjediset e Ministrisë së Mbrojtjes, Qendra e Kulturës, Medias dhe Botimeve të Mbrojtjes (QKMBM) organizoi sot një aktivitet me temë “Dita e luleve”, me pjesëmarrjen e fëmijëve të ushtarakëve, që ndjekin kurset artistike pranë sektorit të Rekreacionit të QKMBM.

Fillimisht fëmijët e kurseve artistike pranë QKMBM kanë performuar krijimin e kolazhit artistik floreal në sheshin qendror.

Aktivitetin e ka hapur drejtori i Përgjithshëm i QKMBM, z. Jakin Marena. Në fjalën e tij, z. Marena ka theksuar se, sot është një ditë e bukur lulesh, kjo ditë nuk është vetëm një festë, por është dhe një angazhim i juaji për të mbajtur një mjedis sa më të bukur dhe sa më të pastër. “Shpresojmë që të gjithë së bashku, duke pasur ju në pararojë ta mbajmë mjedisin të pastër jo vetëm këtu, por edhe aty ku jetoni për të dhënë një shembull sa më të mirë për të gjithë fëmijët e vendit”, - ka përfunduar fjalën e tij z. Jakin Marena.

Në vijim të aktivitetit janë shpërndarë disa certifikata mirënjohjeje për fëmijët e kursit të pikturës. Më pas fëmijët dhe të ftuarit në këtë aktivitet kanë mbjellë lule të shumta në lulishten pranë sheshit kryesor të Ministrisë së Mbrojtjes. Në fund të aktivitetit të pranishmit kanë vizituar ekspozitën “Piktura Floreale” me punime të krijuara nga fëmijët e kursit të pikturës të QKMBM.