Festohet "Dita Ndërkombëtare e Muzeve"

e diel, 18 Maj 2014 12:38

Foto Galeri

Sot paradite në mjediset e Muzeut të Forcave të Armatosura është zhvilluar një ceremoni e veçantë me rastin e festimit të “Ditës Ndërkombëtare të Muzeve”. Data 18 maj është caktuar si Dita Ndërkombëtare e Muzeve në vitin 1977, me Rezolutën nr. 12 të Këshillit Ndërkombëtar të Muzeve (ICOM).
Muzeu i Forcave të Armatosura synon të nxisë mirëkuptimin dhe vlerësimin e historisë së ushtrisë shqiptare tek publiku kombëtar dhe ndërkombëtar, si dhe të inkurajojë dialogun midis qytetarëve dhe ushtarakëve, mbi të kaluarën, të tashmen dhe të ardhmen e Forcave të Armatosura.

Të pranishëm në ceremoninë e organizuar me këtë rasti ishin: zëvendësministri i Kulturës, z. Zef Çuni, drejtori i Qendrës së Kulturës, Medias dhe Botimeve të Mbrojtjes, z. Jakin Marena, përfaqësues të Muzeut të FA, ushtarakë, nxënës shkollash si dhe mjaft të ftuar të tjerë.
Fjalën e hapjes në këtë ceremoni e mbajti përgjegjësi i Muzeut të Forcave të Armatosura, z. Gjergj Vladi.

Ndërsa, zëvendësministri i Kulturës, z. Zef Çuni në fjalën e tij përshëndetëse u shpreh: “Ndihem i lumtur që shoh kaq shumë të rinj dhe të reja që kanë ardhur për të vizituar Muzeun e FA, i cili është shumë i rëndësishëm që brezi i ri të njohë historinë tonë, të njohë gjithashtu se çfarë është ushtria , mbrojtja dhe lufta”. Sot, ne jemi anëtarë të NATO dhe jemi një vend i sigurtë. Nëpërmjet këtij muzeu shumë të bukur, ne mund të vlerësojmë edhe më tepër lirinë që kemi dhe të jemi qytetarë që të respektojmë ligjet dhe ta shfrytëzojmë këtë liri në dobi të atdheut tonë.

Më pas të pranishmit kanë vizituar nga afër ambientet e Muzeut të Forcave të Armatosura.