Fillon Kampionati i Futbollit në Forcat e Armatosura

e hënë, 19 Maj 2014 16:18

Foto Galeri

Përmes një ceremonie të veçantë ka nisur sot Kampionati i Futbollit në Forcat e Armatosura. Ky është një aktivitet sportiv që organizohet nga Ministria e Mbrojtjes dhe Shtabi i Përgjithshëm i FA, i cili tashmë ka filluar një traditë të përvitshme, duke përfshirë në të ekipet më të mira të futbollit nga strukturat kryesore të Forcave të Armatosura. Sivjet do të përballen me njëri-tjetrin 8 ekipe futbolli, që përfaqësojnë Forcat Tokësore, Forcat Ajrore, Forcat Detare, Komandën e Doktrinës dhe Stërvitjes (KDS), Brigadën Logjistike, Brigadën e Mbështetjes Rajonale, Policinë Ushtarake dhe Regjimentin e Mbështetjes. Në këtë kampionat do të aktivizohen mbi 100 futbollistë që të gjithë efektivë ushtarakë dhe civilë të Forcave tona të Armatosura.

Në këtë ceremoni ishin të pranishëm: shefi i Shtabit të Përgjithshëm të FA, gjeneralmajor Jeronim Bazo, kryetari i Komitetit Olimpik Shqiptar, z. Viron Bezhani, komandantët e Forcave dhe të njësive mbështetëse, gjeneralë, ushtarakë dhe punonjës civilë të FA. Fjalën e hapjes së këtij evenimenti të bukur sportiv e hapi drejtori i Drejtorisë së Operacioneve dhe Stërvitjes në Shtabin e Përgjithshëm, kolonel Idriz Haxhia.
Të pranishmit i përshëndeti edhe shefi i Shtabit të Përgjithshëm, gjeneralmajor Jeronim Bazo, i cili e vlerësoi këtë veprimtari si një ngjarje të rëndësishme për FA dhe i uroi suksese gjithë pjesëmarrësve në këtë aktivitet sportiv.
Pas demonstrimit që zhvilloi grupi i karatesë me fëmijët e ushtarakëve dhe grupi i këngës nga fëmijët që përgatiten në Qendrën e Kulturës, Medias dhe Botimve të Mbrojtjes, kampionati nisi me ndeshjen e parë midis ekipit të Forcës Detare dhe ekipit të KDS.
Kampionati i Futbollit në Forcat e Armatosura përfundon ditën e premte, 23 maj 2014.