Fëmijët e ushtarakëve vizitë në Muzeun Kombëtar “Gjergj Kastrioti Skënderbeu”

e diel, 18 Maj 2014 11:17

Foto Galeri

Në kuadër të Ditës Ndërkombëtare të Muzeve, fëmijët e ushtarakëve, të cilët janë pjesë e kurseve të arteve pamore që organizon sektori i Rekreacionit të Drejtorisë së Aktiviteteve dhe Marrëdhënieve me Komunitetin në Qendrën e Kulturës, Medias e Botimeve të Mbrojtjes, zhvilluan një vizitë në Muzeun Kombëtar “Gjergj Kastrioti Skënderbeu” në Krujë. Drejtori i këtij muzeu dhe punonjësit e tij u treguan të gatshëm për t’i ofruar fëmijëve të ushtarakëve dhe familjarëve që i shoqëronin në këtë aktivitet, gjithë informacionin e nevojshëm për të njohur luftën dhe veprën e lavdishme të Heroit tonë Kombëtar. Me këtë rast, artistët e vegjël, të frymëzuar nga historia dhe objektet e trashëgimisë kulturore të këtij muzeu, zhvilluan një konkurs për vizatimin e shumë prej këtyre objekteve, ku për më të mirët u ndanë pesë çmime: 1 çmim i parë, 2 çmime të dyta dhe 3 çmime të treta. Gjithashtu fëmijët zhvilluan edhe një vizitë në objektet rreth muzeut, si dhe në pazarin e vjetër të Krujës.

Muzeu Kombëtar “Gjergj Kastrioti Skënderbeu” është një nga më të vizituarit në Shqipëri. Përurimi i tij është bërë më 1 nëntor të vitit 1982 në Kështjellën e Krujës, kryeqendra e shtetit të Arbërit dhe personifikim i një qëndrese për rreth 25 vjet rresht kundër ushtrive otomane, në shekullin XV. Në këtë muze janë të ekspozuara mjaft objekte, dokumente dhe bibliografi origjinale, riprodhime autentike që flasin qartë për historinë e popullit shqiptar në shekullin XV e më gjerë. Në pavijonet e këtij muzeu, siç është ai i antikitetit dhe mesjetës së hershme, i principatave shqiptare, i pushtimit osman dhe përballimit të këtij pushtimi, i qëndresës shqiptare, i kancelarisë së Skënderbeut, i bibliotekës, i sallës së princave etj, janë ekspozuar objekte prej qeramike, bronzi, hekuri, bakri, faksimile të ndryshme, ikona origjinale, shkrime, një kambanë e vitit 1462, shpata origjinale të shekullit XV, etj.

Ky aktivitet u realizua me mbështetjen Shtabit të Përgjithshëm të FA, duke vënë në dispozicion një autobus dhe Policinë Ushtarake për sigurimin e udhëtimit të fëmijëve të ushtarakëve.