Përfundon Kampionati i Futbollit në Forcat e Armatosura

e premte, 23 Maj 2014 12:54

Foto Galeri

Shpallet kampion i Forcave të Armatosura ekipi i futbollit i Policisë Ushtarake

Për pesë ditë rresht në kompleksin sportiv të Komandës së Doktrinës dhe Stërvitjes u zhvillua Kampionati i Futbollit në Forcat e Armatosura, veprimtari e cila u organizua nga Ministria e Mbrojtjes dhe Shtabi i Përgjithshëm i FA.

Sipas një grafiku të miratuar u zhvilluan takimet midis 8 ekipeve pjesëmarrëse nga strukturat kryesore të Forcave të Armatosura: Forca Tokësore, Forca Ajrore, Forca Detare, Komanda e Doktrinës dhe Stërvitjes (KDS), Brigada Logjistike, Brigada e Mbështetjes Rajonale, Policia Ushtarake dhe Regjimenti i Mbështetjes. Në takimet midis këtyre skuadrave spikati jo vetëm shpirti i garës, përgatitja e lartë fizike dhe tekniko-profesionale, por edhe fryma e bashkëpunimit, respektit dhe e mirësjelljes midis futbollistëve që vinin nga radhët e efektivave ushtarakë dhe civilë të Forcave tona të Armatosura.

Në ndeshjen finale u përballën dy ekipet më të mira, ekipi i Komandës së Doktrinës dhe Stërvitjes dhe ai i Policisë Ushtarake. Pas një ndeshje të fortë dhe të ekuilibruar, e cila përfundoi 0-0, gjuajtja e penalltive përcaktoi fitues ekipin e Policisë Ushtarake. Ndeshja u drejtua nga një treshe gjyqtarësh të njohur, kryesor Lorenc Jemini, arbitër ndërkombëtar i FIFA dhe dy asistentët, Bledar Mesi dhe Renato Dorzi, arbitra të superligës shqiptare.

Në përfundim të këtij takimi u organizua ceremonia e përfundimit të Kampionatit të Futbollit të FA për vitin 20014. 8 ekipet pjesëmarrëse në kampionat dhe të pranishmit e shumtë që ndoqën këtë veprimtari i përshëndeti drejtori i Drejtorisë së Operacioneve dhe Stërvitjes në Shtabin e Përgjithshëm, kolonel Idriz Haxhia. Me këtë rast ai i dorëzoi kupën e kampionatit ekipit të Policisë Ushtarake. Në vend të dytë u shpall ekipi i Komandës së Doktrinës e Stërvitjes dhe në vend të tretë ekipi i Komandës së Forcës Tokësore. Ndërsa futbollistëve të dy skuadrave të para iu shpërndanë medalje.