Politikat e Sigurisë Të tjera nga MM Kulturë Ministrja Kodheli feston 1 Qershorin me fëmijët e ushtarakëve
Ministrja Kodheli: Nuk duhet të rreshtim së punuari për rritjen dhe edukimin e fëmijëve tanë, për t’i dhënë atyre dinjitetin që meritojnë, të ardhmen që meritojnë, të ardhmen europiane.
Në kuadër të 1 Qershorit, Ditës Ndërkombëtare të Fëmijëve, në mjediset e Ministrisë së Mbrojtjes, Qendra e Kulturës, Medias dhe Botimeve të Mbrojtjes (QKMBM) organizoi sot një aktivitet me pjesëmarrjen e fëmijëve të ushtarakëve që ndjekin kurset artistike pranë kësaj qendre. Në këtë veprimtari ishin të pranishëm: ministrja e Mbrojtjes, znj. Mimi Kodheli, shefi i Shtabit të Përgjithshëm i FA, gjeneralmajor Jeronim Bazo, drejtorë dhe ushtarakë të Ministrisë së Mbrojtjes dhe Shtabit të Përgjithshëm, fëmijë të ushtarakëve, prindër dhe të afërm të tyre, etj.
Fillimisht, ministrja Kodheli dhe të pranishmit e tjerë ndoqën një demonstrim sportiv nga fëmijët e grupeve sportive të karatesë dhe të lojërave me dorë të QKMBM, ndërsa më pas vizituan nga afër ekspozitën me punime nga fëmijët e grupit të pikturës. Në vijim, grupet e fëmijëve të këngës, instrumenteve, recituesve etj., dhanë në sallën e shfaqjeve një koncert. Me këtë rast, drejtori i Përgjithshëm i QKMBM, z. Jakin Marena përshëndeti të pranishmit dhe falënderoi ministren Kodheli dhe gjeneralmajor Bazon për pjesëmarrjen në këtë veprimtari kushtuar fëmijëve të ushtarakëve në ditën e festës së tyre.
Ministrja e Mbrojtjes Kodheli, duke i uruar fëmijëve të ushtarakëve gëzuar 1 Qershorin, theksoi se, çdo fëmijë është më shumë se një engjëll, është diçka që i tejkalon kufijtë e humanes, që të lidh me një diçka që është shumë e rëndësishme, që është trashëgimia që kemi lënë nëpërmjet dashurisë që transmetojmë për të rritur fëmijët qytetarë të denjë të shoqërisë dhe kjo është gjëja që nuk duhet të na mungojë kurrë. Më tej, znj Kodheli nënvizoi se, puna që unë bëj, mundi që jap, rrjedh nga një nënë që e di se ç’është e ardhmja për fëmijët. Prandaj, u shpreh ajo, nuk duhet të rreshtim së punuari për rritjen dhe edukimin e fëmijëve tanë, për t’i dhënë atyre dinjitetin që meritojnë, të ardhmen që meritojnë, të ardhmen europiane.
Koncerti artistik ishte ndërtuar si një mozaik i bukur me plot interpretime këngësh, recitimesh, pjesësh instrumentale, ku mund të veçohen: kënga për 1 Qershorin, këngët për nënat dhe gjyshet, për shkollën, pjesët me kitarë dhe piano, kolazhe me këngë të njohura për fëmijët ndër vite etj. Me shumë interes u ndoq edhe kënga “Bashkë me fëmijët” kënduar nga këngëtari Kozma Dushi së bashku me grupin e këngëve, si dhe kënga “Për mbi shtregull kolovitem” kënduar nga këngëtari Ervin Bushati me fëmijët. Kremtimi i festës së 1 Qershorit dhe koncerti i bukur që u shfaq është shprehje e punës dhe i kujdesit që tregon Ministria e Mbrojtjes dhe QKMBM për kremtimin e ditë festave të rëndësishme, si dhe për pasurimin e jetës kulturore në Forcat tona të Armatosura.
