Politikat e Sigurisë Të tjera nga MM Kulturë Promovohet libri “Yjet e gjeneralëve” i studiuesit ushtarak Vangjel Kasapi
Sot paradite, në sallën e Komandës së Doktrinës dhe Stërvitjes u zhvillua promovimi i librit më të fundit të studiuesit të mirënjohur ushtarak, dr. shk. Vangjel Kasapi, “Yjet e gjeneralëve”, botim i Shtëpisë Botuese “Botart”. Në këtë aktivitet kulturor ishin të pranishëm shefi i Shtabit të Përgjithshëm i FA, gjeneralmajor Jeronim Bazo, gjeneralë dhe ushtarakë të tjerë të Ministrisë së Mbrojtjes, Shtabit të Përgjithshëm, Komandës së Doktrinës dhe Stërvitjes, historianë ushtarakë dhe mjaft të ftuar të tjerë.
Promovimi i librit u realizua në formë diskutimi rreth vlerave dhe mesazheve që përcillen nëpërmjet personazheve-gjeneralë dhe ushtarakë të lartë të lidershipit ushtarak në mëse një shekull shtet shqiptar, duke i parë dhe analizuar ata në kontekstin historik dhe politik të kohës apo periudhës ku punuan.
Referatin kryesor e mbajti prof. asoc. Bernard Zotaj, drejtor i Qendrës së Librit dhe Mbështetjes me Informacion në Komandën e Doktrinës dhe Stërvitjes, në të cilin u bë një pasqyrim i gjerë i vlerave historike dhe bibliografike që mbart ky botim serioz dhe voluminoz. Më pas, drejtori i Shtëpisë Botuese “Botart”, ish-gazetari ushtarak dhe botuesi i librit, Ylli Molla, foli rreth bashkëpunimit me autorin për botimin e kësaj vepre. Ndërsa gazetari dr. Albert Hitoaliaj do të ndalej sidomos në vlerat e librit dhe të publicistikës së Vangjel Kasapit.
Në fund të kësaj veprimtarie, dr. shk. Vangjel Kasapi, autori i librit ka shprehur falenderimet e tij për vlerësimin që iu bë punës dhe krijimtarisë së tij në fushën historisë ushtarake dhe sidomos librit të tij më të fundit “Yjet e gjeneralëve”, një përmbledhje kjo mjaft dinjitoze për lidershipin ushtarak shqiptar.
Historia e Shqipërisë është një histori e lavdishme lufte dhe qëndrese për liri e pavarësi, e mbushur po kështu, me figura të lavdishme komandantësh dhe ushtarakësh, të cilët kanë drejtuar me dinjitet të rrallë beteja heroike, por edhe kanë ngritur, forcuar e modernizuar jo vetëm mendimin ushtarak shqiptar, por edhe strukturat tona ushtarake. Dhe padyshim një vend të veçantë nderi e krenarie zënë edhe figurat e gjeneralëve dhe të ushtarakëve të shquar, që studiuesi Vangjel Kasapi i ka qëmtuar, përzgjedhur dhe pasqyruar me kujdes e përkushtim në këtë libër. “Yjet e gjeneralëve”, i cili radhitet i 26-ti në kolanën e librave dhe botimeve të tij, sjell me plot freski, profesionalizëm dhe vërtetësi 73 figura të lidershipit ushtarak shqiptar, që nga dita e shpalljes së Pavarësisë dhe deri në ditët tona, të cilat mbartin dhe përcjellin vlerat e historisë së FA shqiptare për brezat e sotëm dhe të atyre që do të vijnë.
