Në kuadër të festimeve me rastin e 70-Vjetorit të çlirimit të atdheut, u zhvillua në ambientet e palestrës së lojërave, pranë Ministrisë së Mbrojtjes kupa e volejbollit për vajza “Petrit Murzaku”.
Të pranishëm në këtë aktivitet ishin: zëvendësministri i Arsimit dhe Sportit, z. Rauf Dimraj, drejtoresha e Qendrës së Kulturës, Medias, Botimeve, Muzeut dhe Shtëpive të Pushimit (QKMBSHP), znj. Mirela Roshi si dhe mjaft të ftuar të tjerë.
Në fjalën e saj me këtë rast, znj. Mirela Roshi, pasi ka falenderuar të gjithë pjesëmarrësit në aktivitet dhe në mënyrë të veçantë mjeshtrin, Petri Murzaku, u shpreh: “Ky është një aktivitet me rastin e festimeve të 70-Vjetorit të çlirimit të atdheut dhe për mua është aktiviteti i parë. Ky aktivitet më bën të mendoj që ne ta zhvillojmë dhe zgjerojmë më tej aktivitetin që ka të bëjë me Forcat e Armatosura. Le të jetë kjo një nisje e parë edhe për mua si drejtoreshë e re e QKMBSHP si një pikënisje e re për të sjellë dhe risi të tjera, jo vetëm në volejboll, por dhe në sporte të tjera.
Në këtë aktivitet sportiv morën pjesë ekipet e volejbollit për vajza të klubit Tirana, Partizani, Sh.Uka dhe ekipi Dardania i Forcave të Armatosura. Takimi i parë u luajt midis ekipit Sh.Uka dhe ekipit Partizani, i cili përfundoi me rezultatin 2-0 për ekipin Sh.Uka. Takimi i dytë u luajt midis ekipit të Dardanisë dhe ekipit të Tiranës, i cili u fitua nga ekipi Dardania i Forcave të Armatosura. Ndërsa takimi final u luajt mes ekipit Dardania dhe ekipit Sh.Uka, i cili u fitua nga ekipi Sh.Uka, i cili u shpall edhe ekipi kampion i këtij kompeticioni. Kupën e fitores ia dorëzoi ekipit Sh.Uka mjeshtri i Volejbollit, Petrit Murzaku. Në fjalën e tij z. Murzaku falenderoi organizatorët e këtij aktiviteti si dhe i uroi suksese të gjitha ekipeve pjesëmarrëse në këtë aktivitet.
© Ministria e Mbrojtjes 2024 - Të gjitha të drejtat e rezervuara.