Politikat e Sigurisë Të tjera nga MM Kulturë Çelet ekspozita “Kalatë dhe Fortesat shqiptare”
Në kuadër të veprimtarive me rastin e 70 - vjetorit të çlirimit të Atdheut, në hollin e auditorit të Ministrisë së Mbrojtjes, u çel ekspozita me temë: “Kalatë dhe Fortesat shqiptare” e piktorit Leka Rudha. Çelja e kësaj ekspozite u iniciua nga Qendra e Kulturës, Medias, Botimeve, Muzeut dhe Shtëpive të Pushimit të Forcave të Armatosura. Në punimet që paraqiten në këtë ekspozitë janë përfshirë peizazhe nga kalatë më karakteristike dhe më të njohura të vendit. Gjithashtu janë përfshirë edhe bunkerët e socializmit.
Në historinë e çdo kombi kalatë dhe fortesat janë pjesë përbërëse e saj. Ato qëndrojnë hijerëndë, si gjurmë të rënda të përpjekjeve dhe luftërave shekullore për mbijetesë dhe që me madhështinë e tyre ngjallin sot admirim për çdo vizitor. Secila prej tyre përmban nga një copëz historie trimërie dhe pavdekësie të brezave paraardhës, duke fshehur edhe ndonjë sekret, çka i bën ato më intriguese. Pikërisht këto monumente janë tema e kësaj ekspozite të realizuar nga një këndvështrim artistik me nota impresionuese nga piktori Leka Rudha.
Ekspozita qëndroi e hapur gjatë gjithë pasdites së djeshme dhe u vizitua nga shumë drejtues të Ministrisë së Mbrojtjes dhe Shtabit të Përgjithshëm të FA, si dhe nga shumë ushtarakë dhe punonjës civilë të garnizonit “Skënderbej”.
Leka Rudha, është një piktor i mirënjohur dhe ka titullin “Mjeshtër për dekor dhe portret”. Ai është pjesëmarrës në 14 ekspozita kolektive, nga të cilat 3 të organizuara nga ambasada italiane. Gjithashtu ai ka hapur edhe disa ekspozita personale në Greqi, Gjermani etj.
