Politikat e Sigurisë Të tjera nga MM Kulturë Koncert artistik për fëmijët e ushtarakëve të FA
Në vigjilje të festave të fundvitit, Krishtlindjeve dhe Vitit të Ri, Qendra e Kulturës, Medias, Botimeve të Mbrojtjes, Muzeut dhe Shtëpive të Pushimit (QKMBMMSHP) organizoi dje pasdite në sallën e kinemasë së garnizonit “Skënderbej” një koncert artistik me fëmijët e ushtarakëve dhe të punonjësve civilë të FA-së. Në këtë festë të bukur të fëmijëve të ushtarakëve ishin të pranishëm, shefi i Shtabit të Përgjithshëm të FA, gjeneralmajor Jeronim Bazo, drejtori i Kabinetit të ministrit të Mbrojtjes, z Gjergj Teneqexhiu, drejtoresha e Përgjithshme e QKMBMMSHP, znj. Mirela Roshi, drejtues të tjerë të strukturave të Ministrisë së Mbrojtjes dhe Shtabit të Përgjithshëm, fëmijë, prindër dhe familjarë të tyre etj.
Në fjalën e saj të hapjes të kësaj veprimtarie festive, znj. Mirela Roshi, pasi falënderoi pjesëmarrësit në koncert, tha se këta fëmijë, falë kujdesit të Ministrisë së Mbrojtjes, kanë privilegjin që përveç angazhimit në shkollë të ndjekin edhe kurse të ndryshme trajnimi pranë Qendrës së Kulturës të Forcave të Armatosura. Fëmijët e ushtarakëve që ndjekin këto kurse gjatë gjithë vitit janë të shumtë. Ata vijnë dhe trajnohen me plot dëshirë, për të zhvilluar më tej talentin e tyre, në fusha të ndryshme të artit, muzikës, pikturës, arteve marciale etj. Por sot është një ditë e veçantë, është festa e tyre, është festa e fundvitit.
Koncerti festiv ishte ndërtuar me plot këngë, valle, recitime, numra cirku etj, një program festiv, tërësisht i krijuar nga vetë fëmijët. Ai u hap me këngën “Merry Christmas”. Pastaj në skenë erdhën recituesit e vegjël, me recitimet e tyre më të ndjeshme dhe me vjersha të përzgjedhura me kujdes, ndërsa kori i fëmijëve këndoi këngën e “Vitit të Ri”. Nuk i kanë munguar këtij koncerti këngëtarët e mirënjohur Redon Makashi dhe Kozma Dushi, por edhe miqtë e tyre të vegjël, grupi i valltarëve të Qendrës Kombëtare Kulturore të Fëmijëve, një grup fëmijësh i Liceut Artistik, artistët e cirkut të Tiranës, të cilët me interpretimin e tyre të guximshëm i mahnitën të gjithë.
Momente të bukura dhe prekëse krijuan sidomos fjalët e moderatores, kur artikuloi para të pranishmëve një falënderim të veçantë për ushtarakët që shërbejnë në misionet paqes jashtë atdheut.
Në fund të këtij koncerti me vlera të larta artistike, fëmijëve të ushtarakëve dhe punonjësve civilë të FA iu shpërndanë dhuratat e Vitit të Ri, duke krijuar një atmosferë të gëzueshme dhe festive për të gjithë.
