e shtunë, 08 shkurt 2014
Menjëherë pas vendimit të marrë nga Komisioni Ndërministror për shpalljen e emergjencës civile për gjendjen e mjedisit, Ministria e Mbrojtjes dhe Shtabi i Përgjithshëm i Forcave të Armatosura u angazhuan në zonën Lezhë-Shkodër në akset nacionale si: Hani i Hotit - Shkodër; Muriqan - Shkodër; Ura e Bunës - Shirokë; Shkodër – Lezhë - Milot. Gjatë kësaj dite nga puna e efektivëve të Forcave të Armatosura janë pastruar 76 km rrugë dhe mbetjet e nxjerra janë transportuar me mjetet e FA për në vendgrumbullimet e tyre.
Për më tepër ndiqni linkun: Ministria e Mbrojtjes angazhon 1000 forca dhe 76 mjete në funksion të pastrimit të territorit
e shtunë, 15 shkurt 2014
Ministrja Kodheli, dhe shefi i Shtabit të Përgjithshëm të FA, gjeneralmajor Jeronim Bazo, kanë inspektuar nga afër fazën e dytë të aksionit të FA për pastrimin e territorit. Ata janë ndalur në pikën doganore të Morinës, kaluan gjithë akset rrugore nga Morina deri në Tiranë: Dogana Morinë - Ura e Drinit, Kukës (20 km); Milot - Rubik (12 km); Milot-Kukës (32 km); Kamëz - Vorë (12,5 km) dhe Kashar-Aeroporti i Rinasit (7 km). Në total janë pastruar 83,5 km rrugë kombëtare dhe mbetjet e nxjerra janë transportuar me mjetet e FA për në vendgrumbullimet e tyre. Në këtë ditë aksioni janë angazhuar 1000 forca të FA dhe 80 mjete.
Për më tepër ndiqni linkun: Ministrja e Mbrojtjes Kodheli inspekton aksionin e FA për pastrimin e territorit nga mbetjet
e shtunë, 22 shkurt 2014
Gjatë fazës së tretë të aksionit të pastrimit të territorit nga mbetjet janë pastruar akset rrugore nga Kapshtica deri në Tiranë. Në fjalën e saj ministrja Kodheli u shpreh: “Sot është faza e tretë e një beteje me papastërtinë. Siç e shikoni, si në Morinë ashtu edhe në Kapshticë pamja që shikojmë nuk është aspak dinjitoze”.Në vijim ajo ka theksuar se duhet një bashkëpunim mjaft i ngushtë me qytetarët, pushtetin lokal dhe biznesin për pastrimin dhe mbajtjen pastër të territorit.
Gjatë aksionit pastrimit Forcat e Armatosura kanë gjetur pranë Vorës edhe 3 predha artilerie të kalibrit 85 mm.
Aksioni përfshiu pastrimin e akseve rrugore: Aeroporti "Nënë Tereza" - kryqëzimi i Fushë Krujës (10 km); Aksi rrugor Vorë - Porti Durrës (të dy krahët e autostradës, 42 km); Aksi rrugor Elbasan - Përrenjas (47 km); Aksi rrugor Pogradec - Korçë (5 km në Qafë Plloçë); Qafë Thanë - Rrajcë (9 km) dhe Korçë - Kapshticë (30 km). Në total gjatë ditës u pastruan 143 km rrugë kombëtare dhe mbetjet e mbledhura janë transportuar me mjete të FA për në vendgrumbullimet e tyre. Gjatë fazës së tretë të aksionit të pastrimit u angazhuan 1300 efektivë të FA dhe 86 mjete.
Për më tepër ndiqni linkun: Ministrja Kodheli ndjek nga afër fazën e tretë të aksionit të FA për pastrimin e territorit
e shtunë, 01 mars 2014
E shtuna e katërt rresht që Forcat e Armatosura, në kuadër të shpalljes së emergjencës civile për gjendjen e mjedisit nga Komisioni Ndërministror, janë angazhuar në operacionin për pastrimin e territorit në shkallë vendi. 1100 trupa dhe mbi 100 mjete të strukturave të FA u përqendruan përgjatë akseve nacionale Fier – Levan – Tepelenë – Gjirokastër - Kakavijë. Operacioni i efektivëve të Forcave të Armatosura për pastrimin e këtyre akseve nacionale është ndjekur nga afër nga ministrja e Mbrojtjes, znj. Mimi Kodheli dhe shefi i Shtabit të Përgjithshëm të FARSH, gjeneralmajor Jeronim Bazo.
Ky vend ka nevojë për projekte, por edhe për të forcuar më shumë sanksionet dhe frymën qortuese, për ngritjen e opinionit dhe të aksionit të gjithsecilit prej nesh - ka theksuar ministrja e Mbrojtjes Kodheli.
FA të përfshira në operacionin e ditës kanë bërë të mundur pastrimin e 127 km rrugë dhe transportimin me mjetet e ushtrisë të mbetjeve të nxjerra për në vendgrumbullimin e tyre.
Për më tepër ndiqni linkun: Forcat e Armatosura në javën e katërt të aksionit kombëtar të pastrimit
© Ministria e Mbrojtjes 2024 - Të gjitha të drejtat e rezervuara.