Agjencia e Industrisë së Mbrojtjes

 Misioni i Agjencisë së Industrisë së Mbrojtjes

Të rregullojë, mbikëqyrë dhe nxisë prodhimin, tregtimin, transportin, magazinimin, si dhe kërkimin e zhvillimin e armatimit ushtarak në përputhje me standardet kombëtare dhe ndërkombëtare me qëllim forcimin e kapaciteteve mbrojtëse dhe zhvillimin ekonomik të RSH.

Detyrat Kryesore të Agjencisë së Industrisë së Mbrojtjes

1. Rregullimi dhe Licencimi
Lëshon, rinovon, pezullon dhe revokon licencat për subjektet që operojnë në prodhimin, tregtimin dhe zhvillimin e armatimit ushtarak.
Vendos standarde dhe kritere për testimin, certifikimin dhe sigurinë e produkteve ushtarake para hyrjes në treg.

2. Mbikëqyrja dhe Zbatimi i Ligjit
Monitoron dhe garanton përputhshmërinë e subjekteve të licencuara me ligjet dhe detyrimet ndërkombëtare.
Kryen inspektime të rregullta për të siguruar respektimin e standardeve të sigurisë, cilësisë dhe etikës.
Merr masa administrative dhe sanksione ndaj shkelësve të ligjit.

3. Regjistrimi dhe Gjurmimi
Mban dhe përditëson regjistrin e subjekteve të licencuara dhe të armatimit ushtarak të prodhuar, tregtuar dhe magazinuar.
Zbaton sisteme të markimit dhe gjurmimit të armëve për të garantuar kontrollin dhe sigurinë e zinxhirit të furnizimit.

4. Bashkëpunimi Kombëtar dhe Ndërkombëtar
Koordinon me institucionet shtetërore dhe partnerët ndërkombëtarë për mbikëqyrjen e industrisë së mbrojtjes.
Angazhohet në marrëveshje bashkëpunimi ndërkombëtar për shkëmbimin e informacionit, praktikat më të mira dhe forcimin e kapaciteteve mbikëqyrëse.
Merr pjesë në borde, nisma dhe forume ndërkombëtare që lidhen me zhvillimin dhe bashkëpunimin në fushën e industrisë së mbrojtjes.

5. Nxitja e Inovacionit dhe Teknologjisë
Mbështet kërkimin dhe zhvillimin e teknologjive të reja në industrinë e mbrojtjes.
Bashkëpunon me Qendrën e Inovacionit të Sigurisë dhe Mbrojtjes dhe aktorë të tjerë për zhvillimin e kapaciteteve teknologjike.

6. Siguria, Transparenca dhe Përgjegjësia
Siguron transparencë dhe llogaridhënie duke publikuar raporte dhe analiza mbi gjendjen e industrisë së mbrojtjes.
Mban regjistrin e subjekteve të përjashtuara për shkelje të ligjit dhe sigurisë kombëtare.
Promovon praktika etike dhe standarde të larta të sigurisë në industrinë e mbrojtjes.

7. Funksioni si “One-Stop Shop”
Vepron si një qendër e unifikuar për trajtimin e çështjeve, kërkesave dhe problematikave të industrisë së mbrojtjes.
Ofron mbështetje për subjektet e licencuara dhe lehtëson koordinimin ndërinstitucional.