Firmoset bashkëpunimi me kompaninë izraelite për rihapjen e Akademisë së Aviacionit në Vlorë, ministri Vengu: Investim në kapitalin njerëzor

e diel, 27 prill 2025 17:50

Shkolla e Aviacionit do të rikthehet në Vlorë. Kjo falë bashkëpunimit të kompanisë shtetërore KAYO dhe kompanisë prestigjoze izraelite Elbit Systems Ltd. Memorandumi mes dy kompanive u firmos pikërisht në Vlorë, në prani edhe të kryeministrit Edi Rama, zëvendëskryeministres Belinda Balluku, ministrit të Mbrojtjes Pirro Vengu dhe shefit të Shtabit të Përgjithshëm të FA gjenerallejtënant Arben Kingji.

Ky bashkëpunim do të ndihmojë në ngritjen e kapaciteteve për ofrimin e programeve të edukimit dhe trajnimit të pilotëve dhe të kontrollorëve të fluturimit, duke i siguruar Forcave të Armatosura kapacitete të qëndrueshme në këtë sektor.

Në fjalën e tij, kryeministri Edi Rama tha se: "Marrëveshja për krijimin e kësaj akademie aviacioni është një hap jashtëzakonisht i rëndësishëm në funksion të mbështetjes, qoftë të aviacionit civil, qoftë të Forcave tona të Armatosura Ajrore me një kapital njerëzor të kualifikuar cilësisht për kohën që jetojmë”. “Jemi në një proces diskutimesh në disa drejtime, por thelbi është që ne duam të rilindim industrinë tonë të mbrojtjes dhe industrinë tonë të prodhimit ushtarak”, - theksoi kryeministri Rama.

Në fjalën e tij, ministri i Mbrojtjes u shpreh se, kjo është një marrëveshje shumë e rëndësishme për rithemelimin e Shkollës së Aviacionit në Vlorë, në Aeroportin e Vlorës, një shkollë e cila do të gjenerojë, jo vetëm pilotë ushtarakë, por edhe pilotë civilë.
"Në dhjetë vitet e ardhshme investimet në Mbrojtje në Republikën e Shqipërisë janë dhjetëfishuar, nga 13 milion në 138 milion euro. Sigurisht, Shqipëria në përmbushje të të gjithë detyrimeve si vend anëtar i NATO ka investuar në infrastrukturë kritike ushtarake, por jo vetëm dhe, ndërkohë që ne ndërmarrim një hap tjetër ambicioz për të çuar edhe më lart se 2% të Prodhimit të Brendshëm Bruto, Buxhetin e Mbrojtjes në tërësi, përpiqemi që gjithmonë këto investime të kenë një impakt në ekonominë e vendit, një vlerë të shtuar në ekonominë e vendit", - nënvizoi ministri i Mbrojtjes.

Teksa përmendi investimet në infrastrukturë, ministri Vengu theksoi si një pikë të rëndësishme edhe investimin në kapitalin njërëzor.
"Na duhet të stërvisim inxhinierë navalë, inxhinierë armatimi, kontrollorë ajrorë, pilotë, e kështu me radhë. Në të gjithë ciklin e investimeve publike, ne na duhet të ndërtojmë një gjeneratë ekspertize, profesionistë të rinj, të cilët mirëmbajnë këtë infrastrukturë kritike dhe e zhvillojnë më tej", - u shpreh ministri Vengu.

KAYO, pas nisjes së bashkëpunimit të suksesshëm me Fincantieri për ndërtimin e anijeve në Pashaliman, po merr përsipër edhe këtë projekt të rëndësishëm me Elbit Systems, kompania prestigjoze që sjell teknologji të përparuar, si simulatorë të fluturimit në kushte të vështira dhe pajisje moderne trajnimi.

Ngritja e Akademisë së Aviacionit do të sjellë ulje të kostove, certifikim të qëndrueshëm dhe të pavarur si edhe rritje të kapaciteteve kombëtare në mbrojtje dhe aviacion civil.