Korridori 8 përfshihet zyrtarisht në infrastrukturën kritike ushtarake të NATO, ministri Vengu: Shqipëria, nyje strategjike e sigurisë euroatlantike

Korridori 8, me pikënisje në kompleksin portual Durrës - Porto Romano dhe dalje në Detin e Zi është përfshirë zyrtarisht në planet dhe infrastrukturën kritike ushtarake të NATO, duke u njohur si korridor sigurie për mbrojtjen kolektive të Aleancës. Vendimi u bë i ditur nga ministri i Mbrojtjes Pirro Vengu, në përfundim të Ministerialit të Ministrave të Mbrojtjes të vendeve anëtare, të mbajtur në Bruksel.

Ky zhvillim e pozicionon Shqipërinë në një nyje strategjike të arkitekturës së sigurisë euroatlantike dhe e vendos vendin në qendër të planeve rajonale dhe infrastrukturave, ku NATO do të përqendrohet në vitet në vijim.
Ministri i Mbrojtjes Pirro Vengu deklaroi se, përfshirja e Korridorit 8 është rezultat i “një pune disa vjeçare të disiplinuar, të qartë, të qëndrueshme”.

"Kjo është një arritje konkrete, që e pozicionon Shqipërinë në zemrën e të gjitha planeve rajonale dhe në zemrën e të gjitha infrastrukturave, ku Aleanca do përqëndrohet në vitet në vijim", - nënvizoi ministri Vengu.
Në fokus të Ministerialit ishte edhe e ardhmja e operacioneve, ku Shqipëria kontribuon, veçanërisht misioni i KFOR në Kosovë. Sipas ministrit: "Shqipëria do rrisë kapacitetet e saj dhe përfshirjen në këtë mision, për herë të parë edhe me Forcën e saj Ajrore. Ndërkohë që në partneritet të ngushtë me Shtetet e Bashkuara të Amerikës dhe Komandën Amerikane në Europë po bëhen të gjitha rivlerësimet e nevojshme për të ardhmen e këtij misioni, çka përbën edhe një okazion shumë të mirë për qeverinë e re të sapozgjedhur në Kosovë që të rrisë bashkëpunimin cilësor gjithnjë e më të ngushtë me Aleancën", - sqaroi ministri i Mbrojtjes.

Një tjetër pikë e diskutimeve ishte rritja e investimeve në Mbrojtje dhe ristrukturimi i Industrisë Ushtarake në vendet aleate: “Shqipëria e ka nisur me vendosmëri këtë rrugë dhe çdo ditë po krijojmë kapacitete të reja përsa i përket industrisë tonë me disa kontrata të lidhura dhe disa kontrata në negocim e sipër”, - u shpreh ministri Vengu, duke shtuar se këto zhvillime u mirëpritën nga aleatët.

Ndërkohë, kanë nisur edhe përgatitjet për Samitin e NATO-s që do të mbahet në Tiranë në vitin 2027, në bashkëpunim me palën turke dhe Sekretariatin e Aleancës në Bruksel.

Artikuj nga Newsroom