Ministri Vengu në Ministerialin e NATO: Korridori 8 futet në infrastrukturën ushtarake të NATO

Korridori 8, që nis nga kompleksi portual Durrës - Porto Romano dhe shtrihet drejt Detit të Zi, është përfshirë zyrtarisht në infrastrukturën kritike ushtarake të NATO, duke u njohur si korridor sigurie për mbrojtjen kolektive të Aleancës. Lajmi u bë i ditur nga ministri i Mbrojtjes Pirro Vengu pas Ministerialit në Bruksel.

Ky është rezultat i një pune disa vjeçare dhe e vendos Shqipërinë në qendër të planeve rajonale të sigurisë, duke e forcuar rolin e saj si nyje strategjike në arkitekturën euroatlantike.

Shqipëria pritet të rrisë përfshirjen në misionin e KFOR në Kosovë, për herë të parë edhe me Forcën Ajrore, në koordinim me Shtetet e Bashkuara dhe komandat përkatëse.

Gjithashtu, në takim u trajtua rritja e investimeve në mbrojtje dhe forcimi i industrisë ushtarake shqiptare, me kontrata të reja dhe projekte në negocim.
Ndërkohë, kanë nisur përgatitjet për Samitin e NATO që do të mbahet në Tiranë në vitin 2027.