Nënshkruhen dy marrëveshje bashkëpunimi ndërmjet institucioneve shqiptare të Mbrojtjes dhe atyre hungareze

Një pjesë e rëndësishme e diskutimeve në Budapest iu kushtua bashkëpunimit në fushën e Mbrojtjes dhe Industrisë Ushtarake.

Në këtë kuadër, palët nënshkruan dy marrëveshje: një për intensifikimin e bashkëpunimit në Mbrojtje në nivel civil dhe një tjetër mes institucioneve përgjegjëse për Inovacionin në Mbrojtje, me synimin për të përfituar më shumë financime nga programet europiane.

Marrëveshja e Bashkëpunimit ndërmjet Institutit hungarez për Kërkim dhe Inovacion në Mbrojtje (VIKI) dhe Qendrës së Inovacionit të Sigurisë dhe Mbrojtjes (QISM) shënon një hap të rëndësishëm drejt forcimit të partneritetit strategjik në fushën e Sigurisë dhe Mbrojtjes. Kjo marrëveshje parashikon bashkëpunim në kërkim dhe zhvillim (R&D), shkëmbim ekspertize, ngritje kapacitetesh nëpërmjet programeve të dedikuara të trajnimeve si edhe ndarjen e përvojave dhe praktikave për rritjen e efektivitetit të qendrave të testimit dhe programeve përshpejtuese për inovacion.

Ky partneritet hap një kapitull të ri bashkëpunimi me synimin për të forcuar ekosistemin e inovacionit në fushën e Sigurisë dhe Mbrojtjes në nivel ndërkombëtar.