Ermal Nufi merr drejtimin e Mbrojtjes, modernizimi i FA dhe rijetëzimi i industrisë ushtarake prioritet

Ministri i Mbrojtjes, Ermal Nufi, mori zyrtarisht detyrën në krye të Ministrisë së Mbrojtjes.

Gjatë ceremonisë së marrjes së detyrës, ministri Nufi vlerësoi përgjegjësinë e institucionit për sigurinë kombëtare dhe për rolin e Shqipërisë në arkitekturën e sigurisë ndërkombëtare, duke shprehur mirënjohje për besimin e dhënë nga kryeministri Rama dhe duke vlerësuar kontributin e paraardhësit të tij Vengu, në drejtimin e institucionit dhe mbështetjen ndaj Forcave të Armatosura.

Ministri i Mbrojtjes theksoi se siguria kombëtare ndërtohet mbi profesionalizmin dhe përkushtimin e efektivëve në uniformë, të komandantëve dhe të strukturave institucionale që garantojnë funksionimin e sistemit të mbrojtjes edhe në kohë sfidash.

Ai nënvizoi se prioritetet kryesore të ministrisë do të përqendrohen në modernizimin e kapaciteteve mbrojtëse, zhvillimin e industrisë ushtarake, rritjen e kapaciteteve për përballimin e emergjencave civile dhe nxitjen e inovacionit në fushën e mbrojtjes, në përputhje të plotë me standardet e NATO.

Në përmbyllje, ministri Nufi rikonfirmoi angazhimin e Shqipërisë si një aleate aktive dhe e besueshme në kuadër të Aleancës, duke theksuar se NATO mbetet garancia kryesore për sigurinë dhe stabilitetin e vendit.