Forca Tokësore pajiset me sistemin raketor kundërtank “Javelin”

Forca Tokësore e Shqipërisë u pajis me sistemin raketor kundërtank “Javelin”, në kuadër të bashkëpunimit ushtarak me Shtetet e Bashkuara përmes programit Foreign Military Sales (FMS). Në ceremoninë e zhvilluar në Zall-Herr, ministri i Mbrojtjes Pirro Vengu e cilësoi këtë si një moment të rëndësishëm për forcimin e kapaciteteve mbrojtëse dhe si një “mesazh qartësie strategjike” në partneritetin me SHBA, duke theksuar se Shqipëria investon në Mbrojtje për parandalim dhe jo për agresion.

E ngarkuara me punë e SHBA në Tiranë, Nancy VanHorn, e vlerësoi furnizimin me “Javelin” si dëshmi të përkushtimit për sigurinë rajonale dhe forcimin e aleancës së NATO.

Sistemi “Javelin” është teknologji e avancuar amerikane, e aftë për goditje nga lart kundër mjeteve të blinduara, dhe përfaqëson një hap në strategjinë afatgjatë të modernizimit të Forcave të Armatosura të Shqipërisë.