Ministrja e Mbrojtjes dhuron 1900 libra për 70 - vjetorin e Çlirimit

e enjte, 13 nëntor 2014 13:03

Foto Galeri

Kodheli: Stereotipi i vetëm që duhet të jetë udhëheqësi juaj është, të mësuarit fort!

Në kuadër të festimeve për 70 - vjetorin e Çlirimit, ministrja e Mbrojtjes, znj. Mimi Kodheli ka ndërmarrë një fushatë dhurimi librash artistikë për shkollat pranë rajoneve të dislokimit të Forcave të Armatosura. Kjo fushatë nisi në shkollën e mesme “Mustafa Kemal Ataturk” në Zall - Herr, së cilës iu dhuruan 490 libra të letërsisë artistike shqiptare dhe botërore. Librat i takojnë periudhës së pasçlirimit deri në fund të viteve ‘90.

Ato i përkasin autorëve të njohur të letërsisë shqipe si: Dritëro Agolli, Jeronim De Rada, Asdreni, Mitrush Kuteli, Naim Frashëri, Dhimitër Shuteriqi etj. Në këtë fond gjenden gjithashtu edhe botime të karakterit historik dhe edukativ që nxisin dhe forcojnë ndjenjën e atdhedashurisë së brezit të ri.

Në fjalën e saj ministrja Kodheli u shpreh: “Vetëm mësimi, libri ju bën të keni sukses në jetë. Asnjë stereotip tjetër që shoqëria shqiptare krijon ‘që mund të bëhesh pa bërë dhe pa mund’ nuk mund të jetë ideali juaj, nuk mund të jetë heroi juaj. Stereotipi i vetëm që duhet të jetë udhëheqësi juaj është të mësuarit, fort madje, është të pasurit e një shoku shumë të mirë, që nuk do t’ju tradhtonte asnjëherë dhe ky është libri. Edhe në ditën tuaj më të keqe, ju siguroj që, ngushëllimi që do t’ju japë një libër, një poezi, një pjesë historie, një pjesë biografie e një njeriu të shquar është shumë më e mirë se çdo ngushëllim tjetër, është gjithmonë një dritare. Shpeshherë rinia jonë sot udhëhiqet nga modele që jo domosdoshmërish janë ato nga të cilat shoqëria duhet të udhëhiqet, aq më pak rinia, janë të gjitha të gënjeshtërta. Bëhet, kush bën mund; bëhet, kush punon; bëhet, kush mëson! Vetëm atëherë bëheni dinjitozë, vetëm atëherë keni të drejtën që të kërkoni. Edhe ne kemi detyrimin që t’ju vemë në vend dinjitetin sa herë që ky është i munguar, sa herë që ky nuk është i vlerësuar, por vetëm mbasi të keni mësuar ashtu siç duhet”, nënvizoi znj. Kodheli.

Ministrja e Mbrojtjes duke folur për dhurimin e këtyre librave, tha se ato janë libra të cilët kanë një gamë të gjerë autorësh si Naim Frashëri, Migjeni, Fishta e deri tek Xhuvani, titanë të letërsisë shqipe. “Do kisha dashur të përmendja Migjenin, që është poeti im i zemrës. Migjeni thotë ‘qeshu rini qeshu, bota është e jotja”, bota është e juaja, por duhet të kalojë nëpërmjet librit. Shumë suksese ju uroj”, përfundoi ministrja e Mbrojtjes.

Fushata e dhurimit të librave do të vijojë edhe në ditët në vazhdim të muajit nëntor në shkolla të tjera, jo vetëm në kryeqytet, por edhe në rrethe të tjera të vendit.

Fjala e plotë e ministres Kodheli në shkollën “Mustafa Kemal Ataturk”