Rikthim në Forcat e Armatosura të Republikës së Shqipërisë

Ushtarakët në rezervë rikthehen në shërbimin aktiv në rastet e shtimit të numrit të përgjithshëm të personelit dhe kur kërkohen specialitete që ndikojnë në ruajtjen e operacionalitetit të Forcave të Armatosura

VKM nr. 292, datë 28.5.2025 përcakton procedurat mbi mënyrën dhe rregullat për rikthimin e ushtarakëve në Rezervë në Shërbimin Aktiv të FA të RSH.

Udhëzimi Nr. 4619, datë 08.08.2025 përcakton rolin dhe përgjegjësitë e strukturave të Ministrisë së Mbrojtjes dhe Forcave të Armatosura për zbatimin e procedurave të rikthimit të ushtarakut në rezervë në shërbimin aktiv, mënyra dhe procedura e aplikimit, komisionet e vlerësimit të kandidatëve, përgjegjësitë dhe procedurat e punës së tyre, si dhe rititullimi dhe emërimi në detyrë në shërbim aktiv.

1. Kriteret e përgjithshme për rikthim në shërbim aktiv.

Për rikthimin në shërbim aktiv, kandidatët duhet të plotësojnë kriteret e mëposhtme:
a) të jetë shtetas shqiptar.
b) të ketë qenë ushtarak aktiv të Forcave të Armatosura si oficer, nënoficer ose ushtar/detar aktiv.
c) të mos jetë dënuar.
d) të mos jetë në ndjekje penale dhe në proces gjykimi.
e) të mos jetë larguar nga administrata publike për shkelje disiplinore (në rastet e punësimit).
f) të jetë i aftë nga ana shëndetësorë.
g) të ketë rezultuar pa probleme gjatë verifikimit të kushtit të sigurisë të kryer nga strukturat përgjegjëse të sigurisë.
h) të kenë moshë të tillë që mundëson lidhjen e të paktën një kontrate shërbimi ushtarak me afat 3 vjeçar.

2. Procedurat e aplikimit për rikthim në shërbim aktiv.

a) Kandidati/aplikanti (ushtaraku në rezervë) për rikthimin në shërbim aktiv në FA si oficer, nënoficer dhe ushtar/detar aktiv, aplikon nëpërmjet platformës “e-Albania”, dhe/ose në hard-copy pranë seksioneve të rekrutimit në qarqe dhe në Qendrën e Personel Rekrutimit duke plotësuar formularin e aplikimit për rikthimin e ushtarakëve në rezervë në shërbim aktiv dhe dokumentacionin e nevojshëm sipas kërkesave të shpallura, brenda 10 (dhjetë) ditëve nga data e publikimit të njoftimit në faqen zyrtare elektronike të Ministrisë së Mbrojtjes.
b) Kandidati/aplikanti (ushtaraku në rezervë) për rikthim në Forcat e Armatosura, duhet të paraqesë nëpërmjet platformës “e-Albania”, sistemit AMS dhe/ose në hard-copy në Qendrën e Personel Rekrutimit dokumentacionin shoqërues të saj, origjinal apo të njësuar me të, si më poshtë:
i. Formulari i vetëdeklarimit në zbatim të ligjit nr.138/2015.
ii. Jetëshkrimi.
iii. Vërtetimi i gjendjes gjyqësore.
iv. Vërtetimi nga prokuroria që kandidati nuk është në procedim penal.
v. Vërtetimi nga gjykata e rrethit gjyqësor që kandidati nuk është në proces gjyqësor penal.
vi. Vërtetimi që kandidati të mos jetë larguar për shkelje disiplinore nga administrata publike.
vii. Vërtetimi mjekësor (dokumenti i aftësisë për punë i qendrës shëndetësore të lëshuar nga mjeku i familjes).
viii. Fotokopje e noterizuar e dokumentit zyrtar (diplomës) që vërteton përfundimin e arsimimit përkatës së bashku me listën e notave, për kohën që ka qënë jashtë Forcave të Armatosura, nëse ka.
ix. Fotokopje e noterizuar e kualifikimeve të nevojshme për specialitetin që kërkohet rikthimi në shërbimin aktiv, nëse ka.

3. Formularë, Anekse dhe Kontrata

- Formulari nr. 1, “Formulari i vlerësimit të dokumenteve të kandidatëve oficer nga çdo anëtar i komisionit”.
- Formulari nr. 1/1, “Formulari i vlerësimit të dokumenteve të kandidatëve nënoficer dhe ushtar/detar aktiv nga çdo anëtar i komisionit”.
- Formulari nr. 1/2, “Formulari i vlerësimit të dokumenteve të kandidatëve oficer nga komisioni”.
- Formulari nr. 1/3, “Formulari i vlerësimit të dokumenteve të kandidatëve nënoficer dhe ushtar/detar aktiv nga komisioni”.
- Formulari nr. 2, “Formulari i vlerësimit të intervistës me gojë për oficer nga çdo anëtar komisioni”.
- Formulari nr. 2/1, “Formulari i vlerësimit të intervistës me gojë për oficer nga komisioni”.
- Formulari i Aplikimit për rikthim në shërbimin aktiv në Forcat e Armatosura.
- Formulari Vetëdeklarimi.
- Formulari Vetëdeklarimi për zbatimin e ligjit nr.138/2015, “Për garantimin e integritetit të personave që zgjidhen, emërohen, ose ushtrojnë funksione publike”
- Aneksi C, “Formulari vetëdeklarimi për gjendjen shëndetësore të kandidatit për rikthim në Forcat e Armatosura”.
- Formulari i Pranimit të dokumentacionit të aplikantit për rikthim në shërbim aktiv në Forcat e Armatosura.
- Aneksi D, Vlerësimi i kandidatëve për intervistën.
- Kontratë për shërbimin ushtarak aktiv për ushtarakët e rikthyer në Forcat e Armatosura.