Policia Ushtarake teston kapacitetet në stërvitjen “Bashkëpunimi për siguri”

Për disa ditë rresht, në rajonin stërvitor të Bizës efektivat e kompanisë operacionale të Policisë Ushtarake dhe të togës NATO Response Force (NRF), zhvilluan stërvitjen e koduar “Bashkëpunimi për siguri”. Kjo stërvitje kishte si qëllim rritjen e kapaciteteve të Policisë Ushtarake për operacione të mbështetjes së paqes, të mbrojtjes kolektive, si dhe në përgjigje të katastrofave humanitare brenda vendit. Nëpërmjet kësaj stërvitjeje, trupat pjesëmarrëse testuan aftësitë operacionale të procedurave të punës në shtabet e nivelit taktik, si dhe të njohurive për planëzimin dhe ekzekutimin e operacioneve.

Në Ditën e Vizitorëve të Shquar, efektivat e Policisë Ushtarake u inspektuan nga shefi i Shtabit të Përgjithshëm të FA, gjeneralmajor Jeronim Bazo dhe disa drejtorë drejtorish të Shtabit të Përgjithshëm. Pas paraqitjes së një brifingu nga drejtuesi i kësaj stërvitjeje, trupat e Policisë Ushtarake kanë demonstruar një kompleks elementësh stërvitor që i përgjigjeshin temës dhe qëllimit të kësaj stërvitjeje, si: sigurimin e rrugëkalimeve; sigurimin e bazës ushtarake dhe kundërveprimi ndaj sulmeve të grupeve terroriste; shoqërimi dhe sigurimi i personave të rëndësisë së veçantë etj.

Gjeneralmajor Jeronim Bazo ka përgëzuar trupat e Policisë Ushtarake për ato çka kanë arritur gjatë këtyre ditëve, duke ngritur në një nivel më të lartë imazhin dhe dinjitetin e tyre, si dhe ka kërkuar një angazhim maksimal për përvetësimin e programeve stërvitore dhe standardizimin e procedurave të veprimit në tërë procesin stërvitor.

Në këtë stërvitje morën pjesë edhe 7 vajza efektiv të Policisë Ushtarake, të cilat treguan aftësi dhe përkushtim të lartë në zbatimin e detyrave, përkrah kolegëve të tyre.