Newsroom Ekspertë nga Brukseli trajnim për emergjencat në Tiranë, pas anëtarësimit të Shqipërisë në Mekanizmin Evropian të Mbrojtjes Civile
Një grup ekspertësh të DG-Echos nga Brukseli ndodhen në Tiranë, për të marrë pjesë në një workshop dyditor, të organizuar nga AKMC dhe në bashkëpunim me strukturat operacionale, ministritë e linjës, dy prefekturat, Agjencinë Shtetërore të Informacionit dhe Gjeohapësirës, Institutin e Gjeoshkencës, Agjencinë e Menaxhimit të Burimeve Ujore, si dhe agjenci të tjera, që kanë rolin e tyre në Mbrojtjen Civile. Ky bashkëpunim vjen pak kohë pas anëtarësimit të Shqipërisë në Mekanizmin Evropian të Mbrojtjes Civile.
Në fjalën e tij, në nisje të këtij workshop, drejtori i Përgjithshëm i Agjencisë Kombëtare të Mbrojtjes Civile, Haki Çako, duke i uruar mirëseardhjen ekspertëve të Mekanizmit të Mbrojtjes Civile vuri në dukje faktin se prej tre vitesh punë intensive në gjenezë të Sistemit të Mbrojtjes Civile, qeveria shqiptare i është nënshtruar një reforme të thellë në sistemin e menaxhimit të fatkeqësive, duke e zhvendosur vëmendjen nga një menaxhim pasiv i situatave, në një menaxhim proaktiv, të orientuar në parandalim dhe gatishmëri, si dhe qëndrueshmërinë e Sistemit të Mbrojtjes Civile si një mekanizëm gjithëpërfshirës dhe funksional.
Drejtori i Përgjithshëm i AKMC përmendi hapat kryesorë, duke filluar nga miratimi i ligjit për Mbrojtjen Civile, krijimin e Agjencisë Kombëtare të Mbrojtjes Civile, hartimin e 16 akteve nënligjore në funksion të Ligjit 45, tre dokumentet strategjikë si dhe
Planin Kombëtar të Emergjencave që pritet të miratohet brenda këtij viti.
Drejtori i Përgjithshëm i AKMC përmendi edhe misionin e parë të Shqipërisë nën koordinimin e Mekanizmit Evropian të Mbrojtjes Civile, në mbështetje të situatës së tmerrshme të krijuar nga tërmeti në Turqi.
