Newsroom Mbylli mandatin, Peleshi pret komandantin e KFOR, gjeneralmajor Angelo Michele Ristuccia
Ministri i Mbrojtjes, z. Niko Peleshi, priti sot gjeneralmajor Angelo Michele Ristuccia me rastin e përfundimit të mandatit të tij si komandant i Misionit të KFOR.
Ministri Peleshi nënvizoi rëndësinë e prezencës së KFOR në Kosovë si kontribues në garantimin e sigurisë dhe stabilitetit në rajon si dhe vlerësoi rolin e gjeneralmajor Ristuccia në drejtimin e këtij misioni.
Ministri i Mbrojtjes dhe gjeneralmajor Ristuccia diskutuan mbi situatën aktuale të sigurisë në rajon dhe ndanë shqetësimet mbi trazirat e ndodhura së fundmi në Kosovë.
Z. Peleshi falënderoi gjeneralmajorin për rolin aktiv në menaxhimin e situatës dhe parandalimin e përshkallëzimit të mëtejshëm. Ministri i Mbrojtjes nënvizoi edhe njëherë rëndësinë e zbatimit të marrëveshjeve të Brukselit dhe Ohrit si dhe riaktivizimin e dialogut si e vetmja mënyrë për normalizimin e marrëdhënieve dhe gjetjen e zgjidhjeve afatgjata politike midis Kosovës dhe Serbisë.
Në fund të takimit ministri i Mbrojtjes i dorëzoi gjeneralmajor Angelo Michele Ristuccia “Medaljen e Mirënjohjes”, për përkushtimin e tij në mbarëvajtjen e sigurisë dhe stabilitetit në Republikën e Kosovës dhe mbështetjen e tij të pakursyer ndaj kontingjentit ushtarak shqiptar që shërben në Misionin e KFOR.
