Rriten fondet për Mbrojtjen Civile, më shumë siguri për qytetarët dhe pronën

Qeveria shqiptare, nëpërmjet Ministrisë së Mbrojtjes ka rritur ndjeshëm vëmendjen dhe mbështetjen financiare ndaj Sistemit të Mbrojtjes Civile dhe përballimit të emergjencave, duke parashikuar fonde të dedikuara për parandalimin dhe menaxhimin e fatkeqësive natyrore në buxhetin e vitit 2026.

Në zbatim të ligjit nr. 87/2025 “Për buxhetin e vitit 2026”, janë parashikuar:

- 1 miliard lekë në formën e transfertës së kushtëzuar, e cila ndahet në 500 milionë lekë për investime si dhe 500 milion lekë për kompensimin e qytetarëve të prekur në raste zjarresh apo përmbytjesh.
- Ndërsa 1,5 miliard lekë janë parashikuar për financimin e projekteve që lidhen me parandalimin e fatkeqësive natyrore dhe 300 milionë lekë për financimin e projekteve për digat dhe rezervuarët.

Fondet e parashikuara për Mbrojtjen Civile synojnë rritjen e sigurisë përballë fatkeqësive natyrore, garantimin e kompensimit për qytetarët e prekur si dhe forcimin e masave parandaluese për reduktimin e rreziqeve në të ardhmen.

Ministria e Mbrojtjes mbetet e angazhuar në forcimin e sistemit të Mbrojtjes Civile dhe në koordinimin ndërinstitucional për garantimin e sigurisë së qytetarëve përballë fatkeqësive natyrore.