Newsroom Ministri në media Intervistë e ministres së Mbrojtjes Kodheli në emisionin “Studio e hapur” në News 24
Në mbrëmjen e datës 18 mars 2014, ministrja e Mbrojtjes, znj. Mimi Kodheli ishte e ftuar në emisionin “Studio e hapur” të gazetares Eni Vasili në News 24. Më poshtë, intervista e plotë e ministres Kodheli:
Pyetje: Si ju duket kjo ministri në këto 6 muajt e parë, nga auditorët akademike, bashkia e Tiranës dhe tani në një strukturë pak rixhide për një zonjë të hijshme si ju?
Znj. Kodheli: Në fakt nuk është një strukturë rixhide është një strukturë e disiplinuar, një strukturë që funksionon bazuar në disa rregulla dhe parime madje dhe në një kod moral, bazohet në kornizën e vet kushtetuese dhe ligjore, bazohet në betimin që bën kur bëhesh pjesë e asaj strukture dhe të gjitha këto e bëjnë strukturën paksa të veçantë, por jo domosdoshmërish rixhide.
Në hitparade-t e zonjave të hijshme të politikës juve zini vendin e parë; së fundmi kam lexuar një gjë të tillë?
Znj. Kodheli: Unë shpresoj shumë që të vlerësohem për atë çka transmetoj tek publiku, sigurisht që diku mund ta transmetoj edhe nëpërmjet kësaj që ju thoni. Më lejoni të ndaj me ju një opinion timin mjaft modest: besoj shumë që politika nuk është një profesion, politika është një shërbim dhe për aq kohë që unë do të jem në shërbim të njerëzve besoj se do mbetet e tillë.
Prej vitit 2009 Shqipëria është anëtare e NATO dhe të gjithë jemi të vetëdijshëm që nuk kemi standardet e Aleancës. Flitej për reformë para se të anëtarësoheshim, flitet për reformë në ushtri edhe tani. Pse nuk jemi ende në standardet e duhura?
Edhe në 2009 NATO ishte e ndërgjegjshme që Shqipëria nuk kishte standardet për të cilat ju po flisni, por ky është një proces transformimi dhe ridimensionimi, rritje në profesionalizëm, kjo e caktuar me disa etapa dhe afate. FA kanë marrë një certifikatë të transformimit vitin që kaloi dhe kjo e bën tashmë forcën të transformuar dhe integruar plotësisht, por jo domosdoshmërish në standardet që NATO kërkon. Në fakt dhe NATO vetë është në një proces transformimi. Shqipërisë i duhet shumë shumë më tepër për të mbërritur tek niveli i duhur i gjithçkaje që kjo fjalë përmban. Megjithatë fakti që Shqipëria është pjesë e misioneve ndërkombëtare siç është ai ISAF në Afganistan, ai i KFOR në Kosovë apo ALTHEA e bën Forcën e Armatosur të denjë për të qenë pjesë e këtyre strukturave dhe i vendos ato sot në nivelin profesionalisht të nevojshëm për të qenë i barabartë midis të barabartëve. Kjo duhet shtrirë shumë më shumë se sa kaq, por unë besoj që ka pasur një proces në të cilin FA kanë kaluar, proces transformimi i cili mbetet i nevojshëm edhe në të ardhmen. Modernizimi i FA është ajo çka ne duhet të kuptojmë. Është folur shumë dhe më konkretisht. Modernizimi është një fjalë që përmbledh brenda shumë gjëra, madje edhe buxhetimin, si, dhe sa para harxhohen, efiçenca me të cilën harxhohen, niveli arsimimit, niveli i përgatitjes fizike, niveli i edukimit, por padyshim niveli i armatimit, i mjeteve që përdoren, niveli kërkimit që bëhet për të arritur rezultate më të mira; të gjitha këto janë pjesë e modernizimit. Ajo çka i kërkohet sot FA është të paktën realizimi i një grup batalioni që quhet batalioni i Dytë i Këmbësorisë, i cili duhet të jetë në nivelin e modernizimit, stërvitjes, edukimit i atillë që mund të jetë ajo pjesë le të themi reale e paketës së kapaciteteve që i kërkohet sot NATO. NATO ka ndryshuar mënyrën se si është shprehur lidhur me kërkesat që ka ndaj vendeve anëtare. Fillimisht filluan me objektiva force, janë quajtur të tilla deri në qershor të vitit të kaluar, sot është kaluar tek paketa e kapaciteteve. Ne i themi NATO që jemi në gjendje të ofrojmë ty si organizëm këtë gjë dhe ne duhet t’i përgjigjemi bazuar në atë çka i kemi ofruar, sigurisht që kjo shpesh herë ka ndryshuar. Vite më përpara është kaluar nga kërkesa e Forcës Tokësore të këtij batalioni të famshëm të Dytë të Këmbësorisë që duhet modernizuar dhe pajisur tek blerja e helikopterëve, sepse në atë kohë qeveria mendoi që duhet të ishte ky prioriteti dhe duhet të ishte kjo paketa që duhet t’i ofrohej NATO. Sigurisht NATO ka thënë “OK” dhe e ka ditur mirë se sa ka qenë në gjendje qeveria shqiptare me buxhetin e saj modest për ta ofruar këtë gjë dhe kjo gjë i është kërkuar që të bëhej deri në vitin 2018, por me insistimin e qeverisë së atëhershme kjo mund të plotësohej deri në 2014. Sot kjo e vështirëson pak buxhetin e FA. Ne duhet të ecim me hapat e duhura. Ne do ta respektojmë këtë kontratë deri në fund. Janë bërë të gjitha përgatitjet që ato mjete që ne do të blejmë, ata helikopterë që janë akoma në proces për t’u porositur dhe blerë do të mund t’i shërbejnë FA si në proceset e kërkim-shpëtimit, si në proceset e transportimit të trupave, ashtu dhe çdo herë që do të jetë e nevojshme që ata të jenë prezent në shërbim të qytetarëve shqiptarë dhe në shërbim të forcave NATO, qoftë kjo në rastet e emergjencave civile, qoftë në raste të fatkeqësive të ndryshme, ashtu siç edhe kërkon edhe vetë ligji dhe nevoja në të gjitha herët që kjo bëhet prezente tek FA.
14 miliardë Lek është buxheti. Ju e keni cilësuar si të drejtë në raport me kushtet reale. Këtu brenda janë edhe paratë e helikopterëve?
Janë edhe paratë e atyre helikopterëve që nuk janë porositur akoma. Dua të ndaj me ju miqësisht diçka. Në fakt nëqoftëse ju do t’i shikoni shpenzimet në raport me zhvillimet e sivjetshme buxhetore, në raport me prodhimin kombëtar, janë pak më të ulëta sesa ato të vitit 2013. Në vitin 2006 u mendua që mënyra më e mirë për të rritur përqindjen e shpenzimeve për Mbrojtjen në raport me PBB të realizohej duke marrë fondet e pensioneve të ushtarakëve të liruar dhe duke i futur brenda fondeve të shpenzimeve buxhetore për Mbrojtjen. Kjo është një artificë e përdorur për t’ju hedhur pak hi syve zotërinjve në Bruksel, ku është qendra e NATO, për të treguar që ne jemi duke shpenzuar shumë për Mbrojtjen. Që në ditët e para kur unë kam marrë detyrën, Sekretari i Përgjithshëm, Rasmussen, ka kërkuar që të largohet fondi i pensioneve të ushtarakëve nga shpenzimet e Mbrojtjes, në mënyrë që NATO të kuptojë që sa shpenzon ti realisht, sepse fondi i pensioneve i takon fondit të përgjithshëm të pensioneve, pavarësisht se thjesht ke bërë ushtarakun apo një profesion tjetër.
Që nga 2006 ky fond është përdorur pa pëlqimin e NATO?
Ky fond është përdorur dhe, është thënë që ne kemi këtë fond për shpenzime. NATO nuk ndërhyn në këto detaje, ajo thotë që ju keni një target siç e kanë të gjitha vendet anëtare që duhet të jetë 2% e BBP për Mbrojtjen. Këtë target sot e realizojnë SHBA dhe Britania e Madhe, e ka pasur në këto nivele edhe Turqia, Greqia, por e kanë ulur shumë, ndërsa shumica e vendeve e kanë në nivelin që dhe ne e kemi sot 1%, madje disa vende, siç janë ato baltike, e kanë 0,7%-0,8% të produktit kombëtar. Kjo varet nga buxheti dhe nevoja. Por ajo çka është e rëndësishme është që publiku të kuptojë se sot ne jemi gati t’i përgjigjemi kësaj pakete të prioriteteve të kërkuara nga NATO modestish sepse në fakt përfitojmë shumë më tepër nga vendet anëtare dhe që janë më të fuqishme, duke filluar nga policimi ajror që i bëhet qiejve të Shqipërisë, të cilin nuk e bëjmë dot vetë dhe nga gjithë asistenca që jepet qoftë nga partnerët tanë strategjikë, SHBA në arsimin, në edukimin e oficerëve tanë, e kështu me radhë. Ndërsa fondi i pensioneve ka shkuar në vendin që i takon, d.m.th., nuk është më pjesë e shpenzimeve të ushtrisë. Është e përcaktuar 14.2 miliard dhe ky është vetëm dhe ekskluzivisht për ushtrinë.
A ju ka bërë Rasmussen ndonjë kërkesë të ngjashme kur keni marrë detyrën?
Kërkesa e parë ishte: Zonjë ju duhet ta largoni fondin.
Flasim për depolitizimin e ushtrisë. Ku është politizimi i ushtrisë dhe pse duhet ta depolitizojmë, cilat janë segmentet e politizuara?
Në fakt nuk do ta shikoja kaq ngushtë. Politizimi është edhe kur një ushtarak nuk i përgjigjet detyrimeve të tij kushtetuese, rregulloreve të brendshme, detyrimeve të tij ligjore, por i përgjigjet për shkak të konjukturave titullarit të tij, që në fakt duhet t’i përgjigjet, por jo kur kjo është pa meritë. Ushtria është përballur vitet e fundit me një sistem, i cili është një nga më të korruptuarit në Shqipëri për sa i përket marrjes së gradave, promovimit, trajnimeve sidomos atyre jashtë, përsa i përket mënyrës se si janë nxjerrë njerëzit jashtë FA pa arsye, përsa i përket të gjitha procedurave të mirëpërcaktuara në raste të tilla, por të pazbatuara. Një ndër gjërat për të cilat më është folur dhe kërkuar më shumë nga të gjithë protagonistët ndërkombëtarë që unë kam pasur në tavolinë, duke filluar që nga sekretari i Përgjithshëm i NATO, duke vazhduar tek zëvendësndihmëssekretarja e Shtetit për Mbrojtjen, tek kolegët ministra të partneritetit brenda NATO, ka qenë korrupsioni: luftoni, luftoni korrupsionin, madje është shkuar deri atje ku ata janë shprehur që ne nuk mund të ndajmë informacion të klasifikuar me ju, sepse nuk është besimi mjaftueshëm prej institucioneve tuaja. Ju nuk mund ta imagjinoni sa keq jam ndjerë kur kjo më është thënë mua në ministerialin e parë të Mbrojtjes, sidomos në atë pozicion dhe në atë tryezë. Një kolegu yt të thotë: nuk mund të ndajmë informacion me ju për shkak të trashëgimisë korruptive që keni pasur. Për fat të mirë gjërat po ndryshojnë.
Si po ndryshojnë?
Besoj se ne i kemi dhënë provat. Më së pari, duke ndryshuar shefin e Shtabit disa muaj më parë. Ajo çka është më e rëndësishme nëpërmjet të gjithë procesit të inspektimit dhe auditimit, të mund të tregojmë që ndryshimi ka filluar, kohët kanë ndryshuar. Nuk ka më kohë dhe nuk ka më vend për korrupsion dhe abuzim.
Pra largimi i shefit të Shtabit është bërë pasi ai ishte i korruptuar?
Largimi i shefit të Shtabit është bërë për disa arsye. Ai është larguar duke dhënë dorëheqjen, por lidershipi i ri i FA është një zotëri me virtyte, cilësi dhe background shumë të mirë dhe kjo e bën atë një figurë model të ushtrisë tonë, gjë që për ushtrinë është shumë e rëndësishme.
6 muaj që e keni marrë Ministrinë e Mbrojtjes. Me këtë situatë që ju thoni, sa i takon korrupsionit, ju thoni që ka ndryshuar. Ju, jeni e vetmja ministre, që keni çuar një dosje për paraardhësin tuaj në prokurori. Nëse niveli i korrupsionit është i tillë do presim dosje të tjera? Në fakt keni bërë dhe një takim me prokurorin e përgjithshëm, nuk e di nëse ke ndonjë gjë për të thënë?
Në fakt takimi me prokurorin ka qenë një takim në vazhdën e takimeve që ministri i Mbrojtjes bën me institucionet e pavarura me të cilat ka lidhje të ngushta pune. Ne jemi në procesin e ndryshimit të paketës ligjore që rregullon marrëdhënien e Ministrisë së Mbrojtjes dhe FA dhe kjo implikon edhe institucione, duke përfshirë edhe Prokurorinë e Përgjithshme. Prandaj dhe ndarja e mendimeve dhe një takim i parë zyrtar me të është më se normale sidomos për një ministër Mbrojtje dhe, për marrëdhënien e ngushtë që kanë këto dy institucione. Ju siguroj që, përveçse kam dalë publikisht për të thënë që po, unë e çoj këtë dosje në hetuesi sepse besoj akoma tek institucionet e pavarura ashtu siç besoj edhe tek materialet, të cilat kanë dalë si konkluzion i inspektimit dhe auditimit në atë institucion. Është abuzuar me paratë e taksapaguesve, është punuar në mënyrën më të keqe të mundshme, ku paratë e modernizimit kanë shkuar për të bërë publicitet, trukimin e qeverisë, ku paratë kanë shkuar për festivalin e këngës popullore, kur paratë e modernizimit janë shpenzuar në mënyrë frenetike për një event që modestisht mund të bëhej ndryshe. Shqipëria nuk është një vend i pasur, duhet t’i bësh modestish gjërat, nuk ka nevojë për megalomanira, sepse shqiptarët kanë akoma nevojë për punë, janë akoma të varfër. Lexova, jo më larg se sot, se nga 2008 shqiptarët janë bërë 36% më të varfër dhe kjo është gjëja që duhet të na bëjë më shumë merak sesa publiciteti dhe makiazhi i cili është i nevojshëm, por jo në kurriz të një force, e cila duhet të jetë në nivelin dhe standardin e duhur, përndryshe edhe në atë tryezë ku jemi të barabartë mes të barabartëve të konsiderohemi gjithmonë si lojtarë të kategorisë së dytë apo më keq se kaq.
Në luftën tuaj ndaj korrupsionit në institucionin që ju drejtoni, do vazhdoni ta trajtoni në të njëjtën mënyrë, pra të çoni dosje të tjera në prokurori?
Është në detyrimin tim kushtetues dhe ligjor që ta bëj këtë gjë, por është edhe në detyrimin tim moral ndaj forcës politike që më ka votuar, por dhe ndaj të gjithë qytetarëve që kanë votuar ose jo, PS. Shqipëria duhet të shkëputet njëherë e mirë nga një sëmundje siç është ajo e korrupsionit. Nëse ne nuk e fitojmë betejën me korrupsionin, ne nuk do të mundemi asnjëherë dhe nuk do ta kemi të lehtë të ecim drejt BE, as nuk do ta kemi të lehtë rrugën drejt prosperitetit për të gjithë qytetarët.
Ju kanë akuzuar për hakmarrje në momentin që ju keni dërguar në Prokurori dosjen e Arben Imamit.
Hakmarrja nuk ka asnjë lidhje me personin tim, as edhe një lidhje.
Do ta shtrini edhe më tej në nivele të tjera të ministrisë që ju drejtoni këtë proces?
Ministria dhe FA janë një makinë shumë e madhe dhe ka aktivitete nga më të ndryshmet, ku njerëzit janë duke punuar qetësisht. Nuk ka asnjë shtytje nga ana ime për të nxjerrë në pah një gjë që nuk është e nevojshme dhe e domosdoshme të nxirret, sepse nuk ka asgjë mbrapa asaj gjëje, ndaj ne vazhdojmë punën normalisht. Ka një mal me gjëra për të inspektuar, për të audituar akoma. Ne vazhdojmë punën, unë vazhdoj punën time, nëse gjykohet në çka ata ofrojnë, dhe dosje të tjera duhet të shkojnë në prokurori. Ky është një proces që duhet të vazhdojë nga sot dhe deri sa kjo gjë të jetë e pastër në dritën e diellit: pse këto para janë shpenzuar; si janë shpenzuar; a janë shpenzuar në vendin e duhur, kohën dhe mënyrën e duhur; a janë respektuar procedurat; ajo çka është më e rëndësishme: a janë respektuar paratë e publikut e të taksapaguesve, që paguajnë për të marrë shërbime, paguajnë që të jenë të sigurtë dhe, nëqoftëse këto para shkojnë në një drejtim tjetër, ose shpenzohen pa asnjë dashamirësi për t’u respektuar, para të tilla sikur të ishin paratë e tua, ne nuk kemi bërë asgjë. Kjo është në detyrimin tim dhe unë do të vazhdoj e vendosur ta bëj këtë gjë, sepse jam në rrugën time ligjore dhe në moralin tim në raport me publikun shqiptar.
Çfarë mund të themi për Strategjinë Kombëtare të Sigurisë? A mund të ri shihet ajo dhe nëse po, në ç’drejtim konkretisht?
Strategjia Kombëtare është një dokument i cili daton që në vitin 2004. Shqipëria ka hyrë në NATO në vitin 2009, pra ka ndryshuar mjedisi mbi të cilin kjo strategji ishte ngritur deri dje. Vetë mjedisi gjeopolitik ka ndryshuar, vetë Ballkani ka ndryshuar në këto 10 vjet. Ngjarje të mëdha gjeopolitike madje dhe traumatike në disa raste e kanë bërë të domosdoshëm ndërtimin dhe shkruarjen e një dokumenti të ri, i cili për hir të së vërtetës u tentua të ndryshohej një vit më parë bazuar në një dokument tjetër, i cili ishte Rishikimi i Strategjisë së Mbrojtjes, por dështoi me qeverinë tjetër. Sot që flasim ne kemi një komision të ngritur ndërministrorë të drejtuar nga Ministria e Punëve të Jashtme dhe kemi mbaruar pothuajse draftin të pa bërë në vite. Ky është një dokument bazë shumë i rëndësishëm që kalon në Parlament dhe bazuar në këtë draft ndërtohen edhe disa dokumente të tjerë. Një ndër këto dokumente është edhe Strategjia Ushtarake, një dokument ky i rëndësishëm që daton nga 2007 dhe është larg të qenit me elementë të NATO. Ai duhet të ishte riparë dhe ribërë sepse nga 2009 deri në 2013 kur PS-ja fitoi zgjedhjet me koalicionin e majtë ishte kohë e mjaftueshme për të shkruajtur një strategji. Me asistencën e zyrës së sekretarit të Mbrojtjes së SHBA-së në dy vjet rresht u punua që të nxirrej një dokument, i cili do të ndihmonte këto dokumentet e tjerë për t’u përmirësuar, e cila është e famshmja Rishikimi i Strategjisë së Mbrojtjes. Është një bazë e mirë, ku ne jemi mbështetur tek të gjitha propozimet që ne i kemi çuar presidentit. Në strategjinë ushtarake është e përcaktuar limiti fundor i sipërm i ushtrisë shqiptare të jetë 14 mijë veta. Që në momentin kur kjo është përcaktuar, kjo është e miratuar në Parlament dhe ushtria shqiptare kishte rreth 12 mjë e 300, pra nuk kishte 14 mijë, sepse është një kufi limit, jo domosdoshmërish duhet ta mbërrish atë, por atë nuk duhet ta tejkalosh. Ushtria Shqiptare sot ka 9200 njerëz. Ne si ministri bashkë me Shtabin e Përgjithshëm propozojmë që ky numër, bazuar në një dokument të bërë jo nga qeveria e sotme por nga një qeveri e mëparshme, të shkojë 8500, që ka qenë edhe një shqetësim i presidentit. Kjo do të thotë që nga 9200 veta që janë sot, tek 8500 duhet të mbërrijmë në fund të vitit tjetër. Kjo nuk ka asnjë problem, sepse vetëm sikur të largohen nga ushtria njerëzit që do të dalin në lirim për shkak të qëndrimit në gradë dhe pamundësisë për t’u rritur në gradë, pra për shkak të detyrimit ligjor për të dalë jashtë saj, janë rreth 700 veta, kështu që i bie që ne ta plotësojmë këtë numër që na është kërkuar, i zvogëluar tashmë, vetëm duke nxjerrë njerëzit në lirim sipas ligjeve që janë në fuqi sot. Është e thjeshtë: kostoja sociale është zero, sepse ligjet ekzistojnë dhe funksionojnë ashtu siç kanë qenë dhe janë, pavarësisht se duhen ndryshuar, siç e thashë, pasi njëri daton në vitin 2000 dhe tjetri në vitin 2004, ndërkohë që shumë gjëra kanë ndodhur deri sot, por nuk ka një efekt negativ social. Kësaj i bashkëngjitet edhe mënyra sesi njësitë ushtarake janë të përhapura nëpër Shqipëri. Por ndodh që, dokumentet që ne hartojmë. na kërkohet nga institucioni i Presidentit që nuk mund t’i miratojë këto dokumente, sepse duhet miratuar kjo Strategjia Ushtarake, e cila daton që në 2007. Duhet ta kishin bërë ndërkohë, por, nuk e kanë bërë sepse kishin disa gjëra më të rëndësishme për të bërë ndërkohë. Mirëpo zotëria ka bërë disa ndryshime në Planin e Përhapjes, në mënyrën se si dhe ku janë të vendosura të gjitha njësitë e repartet ushtarake në vendin tonë, ka bërë disa ndryshime pa ndryshuar strategjia, e cila daton në 2007. Dhe ju them se cilat: njëra është Spitali Ushtarak, tjetra Qendra e Kulturës e Ushtarakëve, ish - SHQUP-i; po kështu Qendra e Riparimeve të Mjeteve të Ushtrisë ...
Ku është problemi midis Presidentit dhe ministrit të Mbrojtjes për planin e FA?
Në ligj, ministri i Mbrojtjes propozon, presidenti miraton pasi të jepen shpjegime. Ai dokument është i gjatë, i mundimshëm për të arritur deri më sot. Kemi kërkuar të zvogëlojmë komandat, ta bëjmë ushtrinë më efiçente, më të gatshme për t’iu përgjigjur misionit të saj, por edhe më pak të korruptuar.
Si do ta bëni më të vogël duke hequr ata që do të dalin në lirim?
Në ushtri janë futur ushtarë profesionistë. Ka qenë një proces në vite i dëmtuar qëllimisht për të abuzuar sa më shumë. Të gjitha këto do të kenë një fund. Ka një mënyrë dhe një përqasje tjetër për të bërë një ushtri tjetër.
A keni folur në Këshillin e Sigurisë?
Kam folur 45 minuta në Këshillin e Sigurisë. Kam thënë se ku jemi asistuar, cilët kanë qenë zyrat që na kanë asistuar për të mundësuar një dokument, një propozim të strukturës së re dhe Planin e Përhapjes.
Pse presidenti nuk e pranon si plan kur është më i miri?
Nuk di t’iu them. Presidenti ka kërkuar shpjegime teknike, se duhen sjellë dokumentet e sigurisë ushtarake. Ndërkohë në këtë të fundit janë bërë ndryshime drastike më parë.
Po a ka konflikt Ministria e Mbrojtjes me Institucionin e Presidentit?
Nuk dua ta besoj që Institucioni i Presidentit pengon ristrukturimin e Forcave të Armatosura.
Cili është qëllimi? Sipas jush është politik?
Besoj se është politik për të treguar që mazhoranca sot nuk mund të respektojë dot institucionet e pavarura, siç edhe thotë vazhdimisht.
Ju e keni një vizion të qartë si do i transformoni FA?
Kam një vizion sesi mund të transformohen Forcat e Armatosura, por atë që lanë ata deri dje në FA, është turp. Kanë abuzuar dhe i kanë shërbyer familjes biologjike dhe politike që i ka drejtuar deri dje. Dhe atyre u është folur dhe nga NATO për korrupsionin dhe për mënyrën sesi janë trajtuar Forcat e Armatosura.
Po ju nuk e keni ditur, sepse edhe opozita ka qenë pjesë e tryezave të NATO?
E dini ju që opozita nuk është futur kurrë në ministrinë e Mbrojtjes? Sepse nuk është lejuar. Ne jemi munduar të sigurojmë të dhëna dhe të vërtetojmë se ky Institucion ka punuar në mënyrë të paligjshme.
Strategjia, të flasim më thjesht. Cilat janë pasojat konkrete nëse nuk votohet kjo strategji për mbrojtjen?
E para, prek moralisht ata që brenda Forcave të Armatosura bëjnë çdo ditë detyrat e tyre. Ne do punojmë për të realizuar strategjinë dhe ndryshuar strategjinë ushtarake të pabërë prej vitesh, të përmirësojmë kornizën ligjore mbi të cilën duhet të bazohet nesër kjo marrëdhënie dhe të vijojmë përpara, se Shqipëria ka nevojë për siguri, shpresë e inovacion. Ne duhet të ecim me hapin e të tjerëve dhe këtë nuk e bëjmë dot me slogane, dogma, por duhet bërë me gjëra konkrete.
Por për Shërbimin Informativ të Ushtrisë sepse tani ka emër tjetër, Agjencia Inteligjente e Mbrojtjes (AIM)?
Gjërat janë në proces, në auditim, e vetmja gjë që mund të ndaj me publikun sot është se unë jam besimplotë se do të hidhet shumë dritë në një anë shumë të errët.
Mund të thoni ndonjë gjë më shumë për përgjimet?
Ajo çka mund të them është se me atë agjenci është abuzuar dhe shkelur ligji me të dyja këmbët.
Auditimi, edhe sa mbetet?
Në gjëra të komplikuara dhe që kërkojnë një konfidencë të caktuar. Po flasim për inspektim të dokumentave që janë të klasifikuara, shtohet detyrimi për ata që duhet ta zbardhin këtë deri në fund.
Ka surpriza të tjera?
Edhe mund të ketë, por është vetëm gjykimi im se është një dosje që ia vlen të ndahet me organet kompetente për të parë çfarë ka ndodhur me atë që ka ndodhur, me përgjimin e opozitës nga një agjenci që nuk e ka fare për detyrë këtë.
Po përplasja mes mazhorancës dhe opozitës për SHISH, si e shihni?
Shumë interesante fakti që opozita flet sot për gjëra që i ka bërë dje në mënyrë fare trimëroshe duke mos pasur frikë ndaj ligjit. Unë ju siguroj se gjërat kanë ndryshuar thellësisht. Këtij shërbimi (SHISH) i është kërkuar të informojë policinë, të bëjë detyrën, arsyen se përse ekziston. I është thënë që duhet të informohemi. Duhet të jemi seriozë, siguria është gjë serioze, e njerëzve shumë seriozë. Kemi vullnetin e mirë politik për ta bërë Shqipërinë inovative dhe ajo që duhet është që vullneti politik ta mundësojë këtë gjë.
A do tentojë mazhoranca shkarkimin e kreut të SHISH?
Do bëjë atë që është ligjore e kushtetuese, as më shumë as më pak.
A jemi të kërcënuar nga mungesa e sigurisë?
Jemi gjithë kohën të pasigurtë, shqiptarët ndihen të pasigurtë në shëndetësi, rrugë, ilaçe, ndaj duhet të punojmë fort tek siguria, tek të bërit fort të gjërave.
Si është situata me pronat e ushtrisë?
Një skandal. E them shumë sinqerisht
Kjo e pronave është një tjetër akuzë që i keni ngritur opozitës.
60% të pronave nuk janë regjistruar për shkak të abuzimeve që janë bërë me pronat. Është një fillim dëshpërues, por jo e pamundur për t’u zgjidhur. Shembulli më i spikatur është, të paktën kjo është në opinionin tim, dhe nuk është në konkluzionin tim, Spitali Ushtarak, kaloi në varësi të Ministrisë së Shëndetësisë pa procesverbal, dokumenta, auditim, i shkoi Ministrisë së Shëndetësisë, ndërkohë që forcat ushtarake kërkojnë një shërbim specifik. Vendi ka nevojë për atë spital si Spital i Traumës, por ushtria ka nevojë për një spital, pra duhet ta zgjidhim dhe ta bëjmë sipas procedurave.
Pse e quani një akt korruptiv?
Në rastin më të parë është një akt i padrejtë. E miratoi qeveria dhe hyri në fuqi më 24 dhjetor 2012, në vigjilje të Krishtlindjve dhe Vitit të Ri, ndërsa në prill për këtë del dekreti i presidentit. Duhet të kishte ndodhur e kundërta....Ju e shihni se si u shkel ligji në të dyja rastet, ndaj më lind e drejta të them që është akt korruptiv.
Po çdo bëni me pronat e tjera?
I kam çuar presidentit të Republikës një akt për një ngrirje të pronave. Nuk do ketë asnjë zhvillim. As proces ankandi, sepse më duhet të mësoj cilat janë pronat, ku janë. Janë më shumë se 700 prona të ushtrisë në proces privatizimi dhe me to merret Ministria e Financave dhe ajo e Ekonomisë, ndërsa ne do mundësojmë listimin dhe inventarizimin e pronave që nuk dihet ende nëse i kemi aty, pasi janë të pahipotekuara.
A ka projekt kjo mazhorancë për krijimin e xhandarmërisë?
E ka projektin. Jemi duke e vlerësuar. Ka vende që figurën e xhandarmërisë e kanë shumë të theksuar në publik, edhe ne po e vlerësojmë. Po e vlerësojmë dhe është një reformë që kërkon kohën e nevojshme për t’u bërë në mënyrë pozitive.
A po vazhdon Ministria tregtinë e armëve?
Për standardet në NATO, Shqipëria duhet të ketë disa armatime ndryshe. Ne kemi disa armatime që janë ndryshe me NATO. Forcat e Armatosura duhet të blejnë disa armatime. Këto që kemi duhet t’i shesim ose të blejmë të tjera. Ky është një standard që e kërkon NATO.
A bëhet publike për mediat tregtia e armëve?
Ka informacion të klasifikuar.
Çfarë procesi keni gjetur për demontimin e armëve?
Është një nga sukseset e FA. Me asistencën e SHBA dhe donatorëve që Shqipëria ka, do të largojmë armatimin e panevojshëm dhe të rrezikshëm që ka mbetur pa u demontuar. Jemi pothuajse në fund të demontimit të armatimeve të panevojshme. Ne kemi nevojë të kërkojmë mënyra të tjera që procesi të vazhdojë. Të gjitha procedurat do të vlerësohen ashtu siç e përcakton ligji. Një institucion si OSBE ka asistuar Shqipërinë në pastrimin e mbetjeve dhe armëve kimike të ambalazhimeve të disa lëndëve të rrezikshme. Qeveria shqiptare duhet të jetë e kujdesshme që këto mbetje të jenë larg vendeve të banimit dhe të realizojmë kështu pastrimin e Shqipërisë.
Ka një datë për përfundimin e demontimit?
Duhet të kishte përfunduar në fund të vitit që kaloi, por për dy-tre muaj Shqipëria do të ketë përfunduar procesin e demontimit të armëve.
A mund të përdoret Ministria e Mbrojtjes për pastrim?
Është në detyrimin ligjor që ushtria të përdoret në emergjencë. Ne jemi në një situatë emergjence për pastrimin. Me qindra ton hedhurina janë pastruar. Është një proces që do vazhdojë, nuk e kemi mbyllur me kaq. Ne do te kemi një veprim tjetër të kësaj natyre kur të vijë sezoni i verës, duke u angazhuar në pastrimin e plazheve.
Qeveria e majtë mbushi 6 muaj, a ka ecur me ritmin e duhur?
Unë shpresoj të jem objektive, ju them krejt me modesti që qeveria ka bërë dhe po bën maksimunim për të mos zhgënjyer asnjë shqiptar, për atë qe kemi premtuar. Ne e kemi gjetur vendin më keq se sa e kemi menduar. Siguria e qytetarëve është një gjë e rëndësishme, punësimi po ashtu. Ne jemi të hapur për të marrë gjykimin e qytetarëve shqiptarë. Jam shumë e kënaqur se çfarë ka bërë qeveria deri më sot.
Ju jeni tek hyrjet e reja në PS, ka kontribues më të vjetër se sa ju. A duhej të ishin përfshirë edhe ata në qeveri si persona të rëndësishëm në parti?
Nuk e ndjej pakënaqësinë e tyre. Ndjej suportin e tyre miqësor dhe profesional. Fjala e tyre në Parlament dëgjohet sa është dëgjuar edhe më parë. Erion Braçe vazhdon të dëgjohet në Parlament siç është edhe dëgjuar, po kështu edhe shumë deputetë të tjerë të nderuar. Nuk gjej asnjë arsye dhe nuk e shikoj këtë gjë që ju thoni.
Juve keni shumë vota në Parlament, kryeministri përmendi shumë herë se ka 1 milion vota, a ka një risk kur ju tregoheni autoritarë?
Nuk kam parë një frymë arrogante në PS dhe nuk është për të treguar arrogancë, por është një përgjigje për t’i treguar atyre që qeverisën më parë se nuk kanë qeverisur mirë.
Po flitet për një ngërç me LSI.
Jo nuk ka asnjë gjë të vërtetë. Por është vetëm një bisedë mediatike dhe vetëm kaq.
Do të doja të shkoja në Krime. Çfarë pasojash sjellin vendimet e sotme?
Mua më duhet ta ndjek situatën orë pas ore. Shqipëria është një vend në NATO dhe vendimi i Shqipërisë është i njëjtë me çdo shtet tjetër të NATO. Ne kemi një qëndrim zyrtar. Jemi krah partnerëve tanë dhe demokracive më të mëdha. Referendumi është një proces i paligjshëm. Rusia ka hyrë në një rrugë që nuk e nderon. Shpesh trajton çështjen e Kosovës edhe pse nuk ka asnjë lidhje me ndërhyrjen në Kosovë. Jemi duke e ndjekur situatën nga afër, besoj se Shqipëria është në anën e të drejtëve.
A do të ketë zgjidhje?
Situata atje është e komplikuar edhe për shkak background-it historik, interesat ekonomike etj. Të gjitha këto ngërthehen me një skenar. Unë besoj se kjo situatë e rënduar do të parandalohet, tryeza e bisedimeve do të arrijë në një zgjidhje që është një zgjidhje më e drejtë për ne të gjithë.
