Intervista e ministres së Mbrojtjes, znj. Mimi Kodheli në emisionin “Top Story” në Top Channel

e premte, 02 Maj 2014 16:22

Ministrja e Mbrojtjes, znj. Mimi Kodheli, e ftuar në emisionin “Top Story” të gazetarit Sokol Balla, më datën 01 maj 2014, ka folur për akuzat ndaj ushtrisë për trafik droge, për përplasjet me presidentin e Republikës, projektligjin e ri për Forcat e Armatosura, etj.

Pyetje nga Sokol Balla: Sa avionë droge keni ulur këto ditë?

Ministrja Kodheli: Ushtria shqiptare, Forcat e Armatosura (FA) nuk janë të përfshira në këtë mision antiligjor, antikushtetues. FA dhe Ministria e Mbrojtjes (MM) që i drejton ato kanë një detyrim kushtetues shumë fisnik: mbrojtja e vendit dhe siguria e qytetarëve.

Balla: Si i përjetuat këto akuza si drejtuese e këtij dikasteri?

Kodheli: T’ju them të drejtën unë edhe e kam pritur pak. Unë besoj se kam qenë një nga ministrat e parë që kam dalë publikisht për të demaskuar nëpërmjet çuarjes në prokurori të disa dosjeve për afera korruptive, për keqpërdorim të FA. Jo vetëm kaq, nuk më ka shkuar kurrë nëpër mend që kjo paranojë e sëmurë të mund të mbërrinte deri këtu. Sepse për turpin e të gjithë atyre që e inskenuan, këtu nuk është dëmtuar vetëm MM, por edhe nderi i kombit shqiptar që janë FA. Janë dëmtuar FA që janë anëtare të NATO.

Balla: Si e shpjegoni ndryshimin e pozicionit të SHISH në lidhje me këtë ngjarje?

Kodheli: Kjo ishte një gjë e inskenuar politikisht për të hequr vëmendjen e publikut nga problemet që për fat të keq forca politike që është sot në opozitë ka në opinionin tim. Është një mënyrë për të tentuar për të balancuar atë çka zbulohej, atyre aferave që ju hiqej pluhuri, madje edhe ku investigohej, për të cilat ne mund të flasim në vazhdim të emisionit, për të mundësuar një ekuilibër duke përbaltur FA, të paqartë në këtë mënyrë sesi u organizua, ku një pjesë e shërbimeve bënte pjesë, u inskenua një situatë e cila për fat të keq përfundoi si një tullumbace nga ato që nuk i ka trembur as fëmijët. Megjithatë unë mendoj që ata, që e ngritën gjithë këtë baltë për turpin e tyre, duhet t’i kërkojnë të falur FA. Në fillim thanë që janë FA janë bërë pjesë e trafikut të lëndëve narkotike, pastaj u tha jo mjetet, pastaj u tha bazat. Në fakt, unë kam dalë publikisht në parlament dhe kam deklaruar se FA nuk janë të involvuara në asnjë nga këto gjëra dhe këtë nuk e kam bërë as për arsye politike, as për t’u mbrojtur personalisht, as për të mbrojtur qeverinë dhe as për të mbrojtur FA, por e kam bërë sepse kjo gjë ka qenë konkluzion i një kërkimi të thellë, një investigimi që është bërë, që nuk ka filluar vetëm me letrën e famshme të SHISH, por ka filluar shumë më përpara, sepse kemi qenë ne që kemi iniciuar disa të dhëna, të cilat sado të parëndësishme të duken në momentin e parë, ne i kemi vlerësuar dhe kemi kërkuar nga organet kompetente, duke përfshirë dhe SHISH, për të investiguar mbi një gjë, e cila ne sot na rezulton e pavërtetë dhe që FA, bazat e saj dhe MM nuk janë aspak të përfshira, përkundrazi kemi qenë në shërbim të SHISH, të Policisë nëpërmjet agjencisë tonë të shërbimit, nëpërmjet Policisë Ushtarake dhe të gjithë strukturës së FA për të investiguar mbi raste të mundshme që pastaj kanë rezultuar totalisht qesharake.

Balla: Në tetor të 2012 ka pasur sinjalizime të mbledhura nga Policia Ushtarake se baza   e Gjadrit përdorej për trafik?

Kodheli: Ka qenë një individ, i cili e ka pretenduar këtë gjë për ngjarje të ndodhura nga tetori 2012 deri në mars 2013, periudhë kur ministrinë e drejtonte tjetër kush dhe shpresoj se zotëria është informuar mbi këtë rast. Ajo çka unë di, nga letra padyshim, është që ky zotëri që informonte për raste të mundshme, për persona që nuk duhet të ishin në atë vend që quhet sot aerodromi i Gjadrit, është larguar nga puna dhe, me ardhjen në pushtet të qeverisë së re atij i është ringjallur shpresa për të thënë që në atë periudhë ndodhnin këto gjëra. Ne i kemi marrë seriozisht këto deklaratë dhe kemi filluar korrespondencat siç bëhet në këto raste.

Balla: SHISH u tërhoq nga pozicioni në lidhje me përfshirjen e FA në trafiqe, ndërkohë Policia Ushtarake vazhdon hetimet për këto deklarime të tetorit 2012?

Kodheli: Letra e prodhuar nga Shërbimi Informativ Shtetëror (SHISH), për fat të keq në opinionin tim, është një letër që nuk është prodhuar nga strukturat profesionale të SHISH, sepse ajo letër e quan shërbimin e inteligjencës së FA akoma SHIU, një emër që ky shërbim nuk e mban më, por quhet AIM. Ka një problem të madh, po ju them për çështjen e letrës dhe mënyrën se si është trajtuar… E rëndësishme është të ndajmë dy gjëra. MM dhe FA janë institucion serioz që dinë të ruajnë sekretin, dinë të ruajnë korrespondencën konfidenciale të koduara dhe klasifikuar dhe nuk do të jenë asnjëherë këtu për të ndarë publikisht një korrespondencë e cila është e klasifikuar e tillë.  Vetëm kur kjo korrespondencë deklasifikohet, ajo mund të bëhet publike.
Unë kam kërkuar të nesërmen e daljes publike që disa deputetë të PD të shkojnë në Prokurori dhe të nxjerrin dokumentacionin, të bëjnë me dije nga i kishin këto informacione dhe ia kam kërkuar me insistim Prokurorisë këtë gjë edhe 3-4 ditë më mbrapa, sepse unë kam qenë e hapur të bashkëpunoj me të gjitha institucionet për të rritur sigurinë e shqiptarëve. FA nuk duhet të prekeshin sepse ata që e ngritën këtë stuhi në gotë, e dinin shumë mirë që FA, bazat dhe mjetet e saj nuk ishin të përfshira, por për arsye që vetëm ata i dinë, por i di dhe publiku, u ngrit një përbaltje spektakolare, që në fund rezultoi vetëm një turp vetëm për ata që e bënë këtë gjë.

Balla: Sa rol kanë amerikanët në këtë zbythje të pozicioneve të opozitës dhe SHISH ndaj një akuze që po të ishte e vërtetë do të ishte shumë e rëndë dhe për pozicionin tuaj dhe të qeverisë?

Kodheli: Kam dy përgjigje për pyetjen tuaj. E para, ne jemi në kontakt të vazhdueshëm me partnerët tanë strategjikë SHBA, asistohemi nëpërmjet tyre dhe ju siguroj që ky kontakt ka qenë më intensiv në këtë rast sepse flitet për një vend të NATO. E dyta, edhe sikur të vërtetohej një aktivitet ilegal, nuk janë FA të përfshira në këtë gjë. Shqipëria ka trashëguar nga e shkuara e saj e “lavdishme militare" mbetje të të gjitha natyrave, duke filluar që nga qindra ton municione e armatime dhe deri tek qindra madje mijëra prona. Sot FA janë një forcë modeste, por që rritet profesionalisht çdo ditë, sepse që nga momenti kur Shqipëria u bë anëtar i NATO, ka ndryshuar komplet koncepti i mbrojtjes së Shqipërisë dhe shqiptarëve. Nga një mbrojtje individuale, ku Shqipëria duhet të ishte e gjitha e militarizuar dhe e betonizuar, sepse i kishim armiqtë nga të gjitha anët, në një mbrojtje kolektive. Shqipëria paguan një fee dhe, ka edhe disa objektiva të kërkuara nga NATO dhe të dakortësuara me NATO dhe, Shqipëria sot, në ajër mbrohet nga vendet aleate, monitorohet dhe policohet në ajër nga aleatët, pra Shqipëria është e sigurt, sepse këtë e bëjnë aleatët tanë në NATO. Por, ndaj Shqipërisë, ka dhe disa kërkesa dhe një ndër to është: Shqipëria dhe FA kanë për detyrim kushtetues të ruajnë bregun dhe e bën këtë në bashkëpunim edhe me institucione të tjera. Shqipëria kishte dy vjet e gjysmë që rrinte në errësirë të plotë, sepse radarët nuk punonin dhe ne e kemi bërë për dy muaj. I kemi vënë në funksion në fund të janarit. Kemi kuptuar në tetor që asnjë radar nuk funksiononte në Shqipëri.

Balla: Atëherë nëse këto avionë do kishin kaluar do të ishin kapur nga ato radarë?

Kodheli: Sistemi i radarëve që ruan detin është i ndryshëm nga sistemi i radarëve që ruajnë ajrin. Ajrin e ruajnë radarë të kategorive të ndryshme, por ndërkohë radarë kemi në Otranto, që mbulojnë Shqipërinë, kemi dhe në Kroaci, në Greqi dhe të gjithë këta në mënyrë të koordinuar mbulojnë edhe Shqipërinë.

Balla: Sa jemi ne vunerabël ndaj një trafiku të tillë?

Kodheli: Vendi ynë, si të gjithë vendet e tjera të Europës, është vunerabël ndaj asaj që ndodh përreth dhe ndaj asaj që ndodh brenda tij, prandaj shtetet, demokracitë dhe institucionet forcohen dhe perfeksionohen në mënyrë që e mira të mbizotërojë mbi të keqen dhe të ketë sa më pak aktivitete të paligjshme të kësaj natyre. Shqipëria mbetet një vend modest dhe vunerabël dhe ka ato mundësi të kufizuara, sidomos në kushtet financiare që ndodhet sot. Ka pasur disa studime që nga 2009, pra që nga momenti që Shqipëria u fut në NATO, ka dhe marrëveshje të cilat kanë tentuar t’i japin Shqipërisë me paratë e taksapagueve shqiptarë apo me paratë e tjetërkujt projekte për të kuptuar se ku Shqipëria duhet të rrinte me radarët të cilët mbulojnë një lartësi të caktuar ajrore.Unë nuk dua t’i hyj fare diskutimit që Shqipëria i ka pasur projektet dhe nuk i ka bërë, i ka pasur radarët dhe nuk i ka vënë në punë dhe që Shqipëria ka qenë totalisht në terr.

Balla: Ju thoni që puna nuk është bërë, po paratë a janë harxhuar?

Kodheli: Paratë janë harxhuar dhe puna nuk është bërë. Paratë kanë qenë dhe janë përdorur për të tjera gjëra.

Balla: Për çfarë?

Kodheli: Të ndryshme. Ka shumë për të parë tek ministria që unë drejtoj. E rëndësishme është që njerëzit duhet të jenë të bindur që FA janë krenaria e këtij vendi që djemtë dhe vajzat që venë jetën për ditë në rrezik që nga Afganistani e deri në Gjadër punojnë me përkushtim dhe nuk mund të preken nga përbaltja e përditshme e politikës që për shumë njerëz është kthyer në neveri. Ky është një kapitull i mbyllur dhe ne jemi të hapur të informojmë Parlamentin, Prokurorinë për të gjithë dokumentacionin edhe të pa bërë publik që ne kemi në dorë, ju siguroj se kemi të dhëna që vijnë nga qendrat që na monitorojnë nga jashtë vendit, ku thonë që nuk ka pasur asnjë avion renegat në atë ditë dhe në atë orë në atë pozicion që është pretenduar.

Balla: Në Divjakë ka një dëshmitar që ka parë avion të ulet?

Kodheli: Bota e emancipuar është plot me avionë sportive të të gjithave natyrave të ashtuquajtur renegatë. Shqipëria është një vend që po zhvillohet dhe do të ketë çdo dit e më shumë avionë renegatë, ashtu siç ka varka dhe jahte do të ketë dhe avionë dhe persona të apasionuar pas avionëve sportivë. Ajo që duhet të kemi parasysh është që ne duhet t’i monitorojmë, licencojmë dhe perfeksionojmë mënyrën sesi do të dimë nga ku nisen dhe ku shkojnë dhe kush i disponon dhe për çfarë arsyesh përdoren. E rëndësishme është që FA s’kanë të bëjnë me këtë pjesë. Shqipëria monitorohet, vëzhgohet, supervizionohet nga aleatët në çdo ditë, në çdo orë dhe javë të vitit. Qytetarët duhet të jenë të sigurtë se për pjesën që i takon FA dhe MM historia është kjo. Ky konkluzion ka dalë nga një punë e jashtëzakonshme që është bërë, pavarësisht nga balta që është hedhur. Institucioni jonë është një institucion serioz që nuk i nxjerr letrat lart e poshtë. SHISH duhet të jetë në bashkëpunim të ngushtë me SHIU, SHKB, policinë etj për një qëllim final, që nuk është ngritja e një stuhie në gotë për të goditur ministren e radhës të Mbrojtjes pse ka çuar ca dosje në Prokurori, apo për qeverinë që sapo ka filluar të qeverisë.

Balla: Keni pasur bashkëpunim me SHISH në përgjithësi?

Kodheli: Bashkëpunimi është i përditshëm dhe duhet të jetë i tillë, sepse brenda FA ka një shërbim që është shërbimi informativ i ushtrisë dhe ne e kemi kuadratin të mirëpërcaktuar dhe jemi të fokusuar tek siguria e FA brenda dhe jashtë vendit dhe padyshim bashkëpunimi dhe informacioni që duhet të shkëmbehet është i përditshëm, është pothuajse rutinë. Kjo është puna e këtyre institucioneve dhe duhet të funksionojë gjithnjë e më mirë e duhet të jetë në funksion të sigurisë së qytetarëve dhe jo politikës apo individëve të caktuar.

Balla: Është sot SHISH në këtë pozicion të diskutueshëm? A ka mbajtur SHISH një pozicion kushtetues dhe korrekt në këtë ngjarje?

Kodheli: Në gjykimin tim, jo. Nëqoftëse ministrit të Mbrojtjes i dërgohet një informacion i klasifikuar i kësaj natyre duhet të jetë produkt i një analize. Nuk mund të jetë deklarata e një individi. Ministrit i dërgohet informacioni i një pune profesionale, e cili në fund del me  një konkluzion të caktuar. Letra lë shumë për të dëshiruar, sepse informacioni, pavarësisht se është shqetësim i cunguar, është informacion që duhej ndarë me shërbimet respektive. Megjithatë ka shumë vend për t’u përmirësuar. Janë investuar shumë para nga partnerët tanë që ai shërbim të jetë i besueshme për homologët jashtë kufijve të vendit, sepse një nga gjërat e para që më është thënë nga përfaqësues të lartë të SHBA dhe Departamentit të Mbrojtjes ka qenë: “Zonjë ne nuk mund të ndanim me ju deri dje informacione, sepse për shkak të korrupsionit nuk keni qenë të besueshëm”.

Balla: Kjo do të thotë që niveli i mosbesimit dhe skepticizmit shkonte deri tek rangu i paraardhësit tuaj prej aleatëve tanë kryesore?

Kodheli: Por, në qoftë që shërbimet informative të Ushtrisë janë përdorur për të përgjuar opozitën këtë e kupton edhe një fëmijë.

Balla: Gjithë kjo zallamahi përfundoi sepse ndërhynë amerikanë. Po apo jo?

Kodheli: Falë zotit dhe falë qytetarëve shqiptarë që e kanë merituar të qenit e vendit të tyre një vend anëtar i NATO, ne kemi partner strategjikë të tillë që sa herë, për shkak të arsyeve krejt banale politike, FA dhe MM goditet me pa të drejtë ata janë aty për të thënë fjalën e tyre mbasi kanë vërtetuar që akuzat janë të padrejta.

Balla: Si e komentoni deklaratën e dy ditëve më parë të ish-ministrit të Mbrojtjes, z. Pandeli Majko për komisionin hetimor.

Kodheli: Për mua komisioni le të shpallet si të shpallet. E rëndësishme është që të ketë një konkluzion.

Balla: Thatë që Ministria e Mbrojtjes nuk e ka në kontroll Gjadrin…

Kodheli: Bazat ushtarake ajrore janë në Rinas dhe Farkë. Shqipëria ka trashëguar shumë mbeturina nga e kaluara. Forca sot është rreth 8500-9000, por do të rritet profesionalisht dhe të kemi përgatitur ato trupat, që NATO i paraqiten si forca të gatshme. Nuk i kërkohet të ketë më Forcë Ajrore, nuk ka më avionë. Sot ka disa helikopterë që kanë dy misione, operacione kërkim-shpëtimi dhe transport trupash sa herë të kenë nevojë. Gjadri ka qenë ish-pronë e ushtrisë dhe në 2012 u hoq nga Plani i Përhapjes. Po në 2012 u rikërkua për nostalgji të futej prapë në Planin e Përhapjes që të përdoret qoftë tunelet dhe pista për emergjencat civile në rast përmbytjesh apo fatkeqësive të tjera natyrore. Kur u rikthye u quajt qendër grumbullimi. Ne ruajmë tunelet dhe pistën në vëzhgim sepse duke qenë pronë e ushtrisë na takon. Por ushtria shqiptare nuk do të ketë më avionë, përsa kohë mbrohet nga aleatët. Gjadri nuk është një pistë funksionale. Atje ka disa kanale në pistë që nuk lejojnë disa avionë të ulen. Gjadri ka qenë i projektuar për t’u marrë nga Ministria dhe për t’u përdorur për emergjencat civile. Sot nuk ka asnjë funksion ushtarak. Megjithatë e kemi në kontroll, por me kapacitetet që kemi nuk mund ta kontrollojmë të gjithë hapësirën e Gjadrit pëllëmbë për pëllëmbë.

Balla: Sistemi primar i radarëve thatë që nuk ka qenë në funksion, ose është rivënë në funksion tani vonë. Për dy vjet e ca kemi qenë në errësirë? A ka qenë Aleanca në dijeni të këtij problemi, që radarët nuk funksiononin?

Kodheli: S’e di. Për këtë pyesni paraardhësin tim.

Balla: Po ju pyes juve.

Ministrja Kodheli: Për fat të keq i kemi thënë Aleancës shumë gjëra që nuk i kemi bërë dhe që mund t’i bënim, p.sh. Ne kemi shtyrë në kohë përgatitjen e Batalionit të Dytë të Këmbësorisë ndër vite, të cilin ne mund ta bënim dhe ende nuk e kemi bërë. Kemi thënë që në 2008 që duhet ta kishim gati, pastaj 2009..., por ne do ta plotësojmë brenda 2014-ës këtë.

Balla: A është harxhuar 2% e PPB-së që na kushtëzon anëtarësimi në NATO?

Kodheli: 2% është një target; jo domosdoshmërish të gjitha vendet anëtare e kanë realizuar për shkak të krizës financiare. Ne kemi gënjyer NATO duke thënë që 1.3 - 1.4% e PPB e kemi shpenzuar, por këtu ishin të përfshirë edhe fonde pensioni për ushtarakët në rezervë, që nuk i takon shpenzimeve të MM dhe FA. Ne, në dhjetor të vitit të kaluar, larguam këtë fond nga buxheti i MM dhe sot që flasim e kemi ulur në 0.2% të PPB.

Balla: Keni qenë e para që keni çuar në Prokurori disa dosje për shpërdorim detyre dhe korrupsion. Nuk e di realisht sa kanë qenë të motivuara politikisht dhe sa kanë qenë të bazuara në fakte?

Kodheli: Kam një profesion , titullin e të cilit e kam merituar, sepse kam djersitur. Jam financiere dhe e di ku të shkoj e të gjej se cilat kanë qenë abuzimet me paratë e taksapaguesve. Ka patur shumë të vërteta dhe vërtetësi në ato që kam çuar në prokurori. Unë besoj që Forcat e Armatosura në të kaluarën janë keqpërdorur duke shkelur misionin kushtetues të tyre. Po ju them dy raste, Forcat Speciale janë përdorur për të ruajtur një kampionat krejt banal mundjeje. Rasti tjetër është në Prokurori dhe unë mund të ndaj shumë pak me ty, janë përdorur Forcat Speciale, kanë blerë ca pajisje speciale për të kërkuar metale të çmuara në ca male.

Balla: Është e vërtetë kjo? Nuk është barcaletë?

Kodheli: Në fakt, nëse është e vërtetë është shkelje kushtetuese. Është keqpërdorim i pastër i Forcave të Armatosura. Ajo që më ka shqetësuar është fakti që Shërbimi Informativ Ushtarak bashkë me disa struktura të tjera është përdorur në mënyrë antikushtetuese për të përgjuar opozitën, mbase për të përgjuar diplomatët e huaj këtu... .

Balla: Është e rëndë që Ministria e Mbrojtjes të thotë që shërbimi i ushtrisë është përdorur për të përgjuar politikanët shqiptarë, por diplomatët e huaj?! Ky është fillimi i një skandali të përmasave ndërkombëtare që shërbimet tona të përgjojnë ambasadorë të huaj? A keni fakte që ta vërtetojnë.

Kodheli: Duhet pyetur opozita që me gjasë duhet të ketë ndonjë hard disk ku janë regjistruar këto dhe me gjasë e ka ndërruar hard diskun dhe sigurisht ajo pastaj i nxjerr këto skandale që ju flisni tani.

Balla: Në një vend si Shqipëria janë vendosur disa balanca ligjore, shërbimet sekrete nuk mund të përgjojnë në mënyrë të pavarur për shkak se sistemi është ngritur i tillë që diku do lënë gjurmë. Shërbimet e ushtrisë mund të kenë përgjuar, por do kishte gjurmë diku, do kishte një firmë diku, një vulosje diku, do kishte gjurmë diku.

Kodheli: Unë shpresoj dhe besoj te organet e pavarura që do të hetojnë drejt mbi një ndër aferat dhe skandalet më të mëdha, nëse do të verifikohet si e tillë, të përdorimit dhe keqpërdorimti antikushtetues të SHIU. Unë jam këtu për të denoncuar! Nuk jam prokuroria! Nuk jam gjykata!

Balla: Kjo dosje nëse vërtetohet është e tmerrshme për fatet e demokracisë shqiptare, por edhe përballë vendeve të aleancës? Kur ju pyeta a keni fakte, ju më thatë po. Si i keni gjetur këto fakte?

Kodheli: Jo brenda ministrisë. Shumë dokumenta mungojnë, shumë procedura ishin shkelur, shumë gjëra ishin bërë totalisht jashtë çdo rregulli, jashtë çdo morali dhe në shkelje të plotë të ligjit. Ne kemi një Drejtori Inspektimi dhe një Drejtori Auditimi që po merren me këto probleme, por kemi edhe mbështetjen e të gjitha Forcave të Armatosura që janë në anën e drejtë të skalionit, sepse ka qenë edhe vetë të interesuar të pastrohen nga një njollë, të cilën në shumicë ata nuk meritojnë ta kenë.

Balla: Ju keni patur dëshmi që kjo ka ndodhur, por thoni që faktet i keni marrë jashtë. Nga partnerët? Për çfarë bëhet fjalë, për biseda të regjistruara konkrete? U fol shumë për një pajisje shumë të shtrenjtë tejet të sofistikuar përgjimi, për këtë pajisje bëhet fjalë?

Kodheli: Bëhet fjalë për këtë pajisje, për të cilën janë shpenzuar 1.6 mln euro për një pajisje që janë përgjuar politikanët dhe diplomatët në këtë vend.

Balla: Sot, prokuroria ka prova që e vërtetojnë këtë?

Kodheli: Sipas meje po. Por duhet të ruaj konfidencialitetin derisa prokuroria të mbyllë hetimin e kësaj çështje.

Balla: Kush janë nën akuzë?

Kodheli: Të gjithë titullarët, ish-ministri i Mbrojtjes, ish drejtori i shërbimit...

Balla: A ka skandale të tjera që përfshihet ministria jonë e që nuk i shpëton do fokusit?

Kodheli: Unë nuk dua të flas për këtë gjë. Ajo është pjesë e punës që nuk do të ketë më keqpërdorim parash, që nuk do të ketë më abuzime, që paratë do të shpenzohen për të mirën e Shqipërisë dhe shqiptarëve. Do të shikojmë bazën ligjore që do të vijë si paketë në Kuvend. Risia është që do të ketë njerëz që do të bëjnë karrierë të mirëfilltë ushtarake dhe njerëz që do të bëjnë atë punë për aq vite sa i kanë caktuar dhe më pas do të lirohen. Kemi dalë në një konkluzion që drafti që ka kaluar në qeveri është ndër më të mirët.

Balla: Shpresojmë që t’ua miratojë Presidenti i Republikës?

Kodheli: Edhe unë shpresoj sepse me të vërtetë është ndër ligjet më të mira.

Balla: Ju keni dy rekorde, për herë të parë në historinë e Shqipërisë në krye të një dikasteri të tillë është vendosur një zonjë, nga ana tjetër jeni ministri i parë i Mbrojtjes që është futur në një konflikt, apo debat të ashpër, jo vetëm me presidentin, por edhe me komandantin e Forcave të Armatosura. Në këtë debat janë përfshirë gjeneralë dhe deri tek shefi i Shtabit të Përgjithshëm. Gjithë situata nuk është aspak e këndshme, që ka një debat të tillë publik tek ushtria….

Kodheli: Dua t’ju them që Ministria e Mbrojtjes dhe Shtabi i Përgjithshëm nuk kanë nxjerrë asgjë nga e gjithë ajo që ju e konsideroni debat. Asgjë që i kalon kufijtë e asaj që ne duhet të nxjerrim. Kam besuar dhe besoj që institucioni i Presidentit është ai që ekziston atje për të ruajtur dhe mbrojtur Kushtetutën. Më lejoni t’ju kujtoj që Shqipëria është një republikë parlamentare, jo presidenciale. Kemi disa reminishenca nga e kaluara lidhur me komandantin e Përgjithshëm të FA. Ai i dikurshmi shihte kudo armiq dhe vendoste për dislokimin e batalioneve, sa tunele do ndërtoheshin, sa bunkerë e me radhë dhe sot kemi gjithë këto vite që nuk pastrohemi dot nga reminishenca. Për aq kohë sa në 2009, më duhet ta theksoj, ka ndryshuar në mënyrë drastike në mënyra se si Shqipëria mbrohet, ne sot duhet të jemi në operativitet, sepse vendi në veri është vend partner i NATO, në jug vendi kufitar është vend anëtar i NATO, një nga vendet që policon ajrin e Shqipërisë. Pra, sot ne flasim për një mënyrë organizimi të reparteve, dislokimeve, mënyrës sesi këto lidhen me njëra-tjetrën, të asaj që quhet Plani i Përhapjes, është për arsye të mënyrës sa më të shpejtë të përgjigjes operacionale kur ne na kërkohet kjo gjë, duke mos harruar që ushtria është edhe pjesë e emergjencave civile.

Balla: A mund të quhet emergjencë pastrimi i mbeturinave anës rrugëve?

Kodheli: Është padyshim emergjencë. Ne e kemi bërë këtë edhe si një akt qortimi ndaj shoqërisë për të ndërgjegjësuar shoqërinë civile. Deri dje në ligj kanë qenë pjesë e reminishencave.

Balla: I referoheni pjesës që i heq Presidentit të drejtën për zgjedhjen e kreut të AIM?

Kodheli: Kjo vjen ngaqë ai, që është sot drejtor i AIM është i gradës gjeneral. Kjo ka të bëjë me mënyrën e re të perceptimit të këtij shërbimi. Ne kemi 8500 ushtarakë në divizë dhe një shërbim inteligjence prej 500 vetësh. Imagjinoni, kur kishim 70 mijë ushtarë, kishim vetëm 6 veta. Ne do ta reduktojmë, pasi ka shumë vende anëtare të NATO që e kanë në nivel drejtorie dhe, sot, ky nivel ekuivalentohet me nivelin e kolonelit. Në dijeninë time nuk ka asnjë shërbim informativ ushtarak që është në varësi të drejpërdrejtë të ndonjë presidenti të Republikës të ndonjë vendi të NATO.

Balla: Pse nuk informuat presidentin për zotin Gerveni në NATO dhe në bazë të ligjit, por informuat Gervenin për lirimin e tij?

Kodheli: Më 5 dhjetor unë kam njoftuar presidentin që në mes të janarit mbaronte mandati i Gërvenit, pastaj e kam njoftuar edhe në shkurt, e kam njoftuar edhe në mars për t’i thënë që zotërisë i ka përfunduar mandati. Më vjen keq që korrespondenca e atij zotërisë është bërë publike. Më vjen keq që korrenspondenca është bërë publike jo nga Ministria. Dokumentet zyrtare janë publikuar nga Presidenti dhe kjo për mua është e patolerueshme. Zotëria do të kthehet pas dekretimit të Presidentit.

Balla: Presidenti la të kuptohej se edhe ai nuk kishte ndërmend të pengonte zëvendësimin e Gervenit…Çfarë ndodhi?

Kodheli: Ka ndodhur. Gerveni e ka lënë detyrën, zëvendësuesi i tij pritet të ndodhë. Në rastin e gjeneral Zaimit, më vjen keq të them, por nëse jemi për shtetin e së drejtës dhe shtetin ligjor sepse ai ka fituar në të gjitha nivelet e gjykimit duke fituar të drejtën e tij me gradën gjeneralmajor, ai duhet të rikthehet. Ai është nxjerrë në rezervë vite më parë.

Balla: Duket sikur ligjet tuaja janë personale, vetëm sepse presidenti e ka emrin Bujar Nishani?

Kodheli: Nuk jam dakord me këtë që ju thoni. Gjërat ndodhin shumë shpejt dhe duhet të jemi dinamikë në vendimmarrje, siç e tregoi edhe rasti i Krimesë. Ne duhet t’i përgjigjemi kërkesave të NATO me dinamizëm.

Balla: Është një teleshikues që pyet për strehimin e ushtarakëve…

Kodheli: Jo vetëm strehimi, por edhe probleme të tjera të Forcave të Armatosura janë të trashëguara. Vetëm 40 përqind e pronave të ushtrisë janë të regjistruara. Shumë janë në procese gjyqësore. Këto situata bëjnë pjesë tek shqetësimi i madh që ka ardhur tek mënyra se si janë privatizuar pronat e ushtrisë apo se si janë menaxhuar ato. Është në parësinë time që të sigurohet strehimi i ushtarakëve.

Balla: Për SHQUP-in, keni hequr dorë besoj?

Kodheli: Fakti që presidenti nuk e firmos Planin e Përhapjes dhe strukturën e  re të ushtrisë që është bërë gjatë kohës kur ishte qeveria Berisha në pushtet…. Në atë plan SHQUP-i ishte një nga asetet kryesore të ushtrisë. U hoq pa propozimin e Shtabit, madje me kundërshtimin e tij, me një firmë të ministrit dhe presidentit, pa pyetur se si ishte strategjia e zhvillimit së ushtrisë. SHQUP-i do bëhej qendër rekreacioni.

Balla: Ka kaluar shumë kohë tashmë, po për armët kimike, u bë mirë apo keq?

Kodheli: Kam takuar shumë përfaqësues të lartë të DASH, të Departamentit të Mbrojtjes dhe mendoj që gjëja e fundit që partnerët tanë strategjikë mendonin ishte që t’i bënin dëm Shqipërisë dhe shqiptarëve. Ata do të kishin njerëzit e tyre. Shqipëria ishte e përgatitur për këtë gjë dhe do të kishte përfitime të konsiderueshme. Situata nuk u menaxhua si duhet as nga ana jonë, as nga përfaqësuesve të SHBA. Disa gjëra ishin aty, disa ishin të papërcaktuara mirë. Nuk dihej sa material kishte, çfarë ishte materiali, si do të dilte prej atje. Kishte shumë gjëra në zhvillim dhe ata vetë ishin të paqartë. Ne u munduam të bënim më të mirë në favor të qytetarëve shqiptarë.

Balla: Jeni përfolur që mund të jeni një nga emrat që plotësojnë kriteret për kandidate e Bashkisë së Tiranës, e keni menduar këtë?

Kodheli: Shpresoj që të jem konsekuente në gjërat që kam thënë. Jam një person i lindur dhe i rritur në Tiranë, e dua shumë si qytet. Kam patur fatin e madh të punoj krah Ramës në vitet kur Tirana transformohej në mënyrë drastike. E kam bërë pjesën time, e kam dhënë kontributin tim për qytetin tim, për mua kjo mjafton. Sot jam duke bërë një gjë tjetër sa fisnike aq edhe te vështirë dhe shpresoj të vlerësohem nga njerëzit, sepse unë gjërat i bëj me zemër së pari. Kaq mund të them sot, pas 1 viti do të shohim se çfarë do të diskutojmë bashkë.