Nis nga Forca Tokësore Rivlerësimi Strategjik i Mbrojtjes

e martë, 22 korrik 2025 15:59

Modernizimi i FA dhe përmbushja e objektivave të përcaktuara në Samitin e NATO-s në Hagë ishin në qendër të takimit të parë konsultativ, që ministri i Mbrojtjes, z. Pirro Vengu, zhvilloi në Forcën Tokësore, nga ku nisi zyrtarisht puna për Rivlerësimin Strategjik të Mbrojtjes (RSM).

Modernizimi i mjeteve, pajisjeve dhe sistemeve ushtarake përmes industrisë “Made in Albania” — nga municionet dhe armatimi i lehtë, te mjetet e blinduara, ato të emergjencave civile, artileria e rëndë, dronët luftarakë dhe sistemet kundër-ajrore nga njëra anë dhe zhvillimi dhe specializimi i burimeve njerëzore, përmes investimit në infrastrukturë të re akademike, rritjes së trajtimit financiar si dhe promovimit të karrierës ushtarake për të rinjtë shqiptarë nga ana tjetër, ishin dy përparësitë e evidentuara nga ministri Vengu në takimin ku mori pjesë edhe shefi i Shtabit të Përgjithshëm, gjeneralmajor Arben Kingji.