Dekorohen 24 efektivë që luftuan me zjarret

e mërkurë, 27 gusht 2025 15:48

Kryeministri Edi Rama dekoroi 24 efektivë të Forcave të Armatosura, Policisë së Shtetit, Agjencisë Kombëtare të Mbrojtjes Civile dhe shërbimeve zjarrfikëse, të cilët u dalluan në operacionet e fundit për shuarjen e zjarreve në disa zona të vendit.

Ai theksoi se Mekanizimi i Mbrojtjes Civile nga fshati më i largët deri tek qendra e Tiranës mundi dhe diti të jepte më të mirën.

Kryeministri konfirmoi se Shqipëria do të nisë ndërtimin e një flote të vetën, duke filluar me dy avionë zjarrfikës.

Me propozime të ministrit të Mbrojtjes Pirro Vengu dhe ministrit të Brendshëm Ervin Hoxha, u dekoruan 3 efektivë me Medaljen “Yllin e Mirënjohjes Publike”, 10 efektive me Medaljen e Artë për “Vlerësim Profesional”, 7 efektivë me Medaljen e Argjendtë për “Vlerësim Profesional” dhe 4 efektivë me Medaljen e Bronxtë për “Vlerësim Profesional”.

Të dekoruarit u nderuan për merita të veçanta dhe angazhim të jashtëzakonshëm gjatë operacioneve për shuarjen e zjarreve, duke rrezikuar jetën për mbrojtjen e qytetarëve.