Hapet një kapitull i ri për Mbrojtjen Civile

Sezoni i zjarreve të kësaj vere ka nxjerrë mësime të rëndësishme për përballimin e emergjencave natyrore.

Projekti i qeverisë për një transformim të thellë të Forcës Zjarrfikëse hap një kapitull të ri të Mbrojtjes Civile. Nga një takim me përfaqësues të FA, Forcave Zjarrfikëse si dhe Policisë së Shtetit, u prezantuan hapat konkretë për forcimin e reagimit në të ardhmen.

Gjatë fjalës së tij, kryeministri Edi Rama nënvizoi se për të gjithë qytetarët e prekur nga zjarret e kësaj vere, dëmshpërblimi do të jetë i plotë.

Ndryshimet ligjore do të nxisin sigurimin e shtëpive dhe bizneseve kundër fatkeqësive natyrore.
Përforcimi i legjislacionit penal për zjarrvënësit do të përfshijë ndalimin e çdo lloj leje ndërtimi për 30 vite.
Zjarrfikësit do të përfshihen në formulën e rritjes së pagave të Forcave të Armatosura.

Ministri i Mbrojtjes Pirro Vengu theksoi se kapitulli i dedikuar për Mbrojtjen Civile do të ndërtohet mbi tre shtylla kryesore:

1. Kapitali Njerëzor: si fuqizim i zinxhirit reagues nga bashkia dhe krijimin e qendrave rajonale të emergjencave.
2. Inovacioni: përdorimi i teknologjisë,
3. Efiçenca e përdorimit të instrumenteve financiare, që bashkitë kanë në dispozicion.

Në fokus është sistemi i menaxhimit të emergjencave, që duhet të rijetëzohet dhe të mbulojë të gjithë territorin e vendit për të garantuar sigurinë dhe përgjigjen e duhur në kohë reale ndaj çdo rreziku të mundshëm.