Buxheti i Mbrojtjes 58,9 miliardë lekë ose 2,12% të PBB

Buxheti i Mbrojtjes për vitin 2026, u prezantua në seancën plenare të Kuvendit të Shqipërisë nga ministri i Mbrojtjes Pirro Vengu. Pas diskutimeve, buxheti u miratua në parim, duke shënuar një hap të rëndësishëm drejt zhvillimit të mbrojtjes kombëtare dhe forcimit të kapaciteteve operative me 83 vota pro dhe 32 kundër, më 20 nëntor 2025.

Buxheti synon një kthesë të rëndësishme në modernizimin e Forcave të Armatosura, ringritjen e industrisë ushtarake, forcimin e kapaciteteve të emergjencave civile duke rritur kontributit tonë në NATO dhe në sigurinë evropiane. Me një rritje prej 12% krahasuar me vitin 2025, duke arritur 58,9 miliardë lekë ose 2,12% të PBB.

Një pjesë e konsiderueshme e buxhetit, 13 miliardë lekë, shkon për personelin me uniformë, duke përfshirë rritje pagash, përmirësim të kushteve të jetesës dhe mundësi të reja karriere për të rinjtë.

16,3 miliardë lekë për rritjen e gatishmërisë operative, duke përfshirë pajisjet, logjistikën, stërvitjen dhe misionet ndërkombëtare.

Rreth gjysma e tij, 29 miliardë lekë, është e destinuar për investime kapitale që synojnë modernizimin teknologjik, zhvillimin e industrisë “Made in Albania” dhe dixhitalizimin e njësive të luftimit. Për herë të parë, Mbrojtja kthehet edhe në burim të ardhurash dhe zhvillimi: 326 vende të reja pune e miliona në ekonomi si prodhim, paga dhe investime.

Industria ushtarake po ringrihet duke prodhuar municione, dronë, sisteme anti-dron dhe mjete të blinduara.

Në fushën e emergjencave civile, janë planifikuar 4,3 miliardë lekë për ngritjen e dy qendrave të reja rajonale, blerjen e dy avionëve zjarrfikës dhe forcimin e kapaciteteve të parandalimit dhe reagimit ndaj krizave.

Ministri Vengu nënvizoi se buxheti reflekton vizionin për një shtet më të fortë dhe më të besueshëm.