Ministeriali SHBA - Karta e Adriatikut (A-5) në Sarajevë

Ministri i Mbrojtjes, Pirro Vengu, mori pjesë në Ministerialin e SHBA–Karta e Adriatikut (A-5) në Sarajevë, një forum që bashkon SHBA dhe vendet e Ballkanit Perëndimor.

Ai theksoi se rajoni përballet ende me sfida të trashëguara dhe kërcënime të reja, të cilat kërkojnë bashkëpunim më të ngushtë, investime në kapital njerëzor, mbrojtje kibernetike, industri dhe pajisje të përbashkëta.
Ministri theksoi se Nisma A-5 është një platformë thelbësore për forcimin e qëndrueshmërisë së vendeve anëtare dhe se anëtarësimi i Kosovës në këtë iniciativë përbën një nevojë strategjike.

Iniciativa A-5 është krijuar në vitin 2003 nga SHBA, Shqipëria, Kroacia dhe Maqedonia e Veriut për të mbështetur integrimin në NATO, ndërsa në vitin 2008 iu bashkuan Mali i Zi dhe Bosnje - Hercegovina.