Orkestra Frymore e FA nderohet me “Medaljen e Mirënjohjes”

e mërkurë, 27 dhjetor 2017 16:27

Fotogaleria

Në vigjilje të festave të fundvitit, Orkestra Frymore e Forcave të Armatosura (OFFA) u nderua me “Medaljen e Mirënjohjes” nga Bashkia Tiranë. 

Në praninë e dhjetëra artdashësve dhe simpatizantëve, Orkestra Frymore e FA performoi në sheshin "Skënderbej" disa nga pjesët më të pëlqyera.

E pranishme në këtë eveniment, ministrja e Mbrojtjes Olta Xhaçka falënderoi Orkestrën Frymore të FA dhe shprehu vlerësimin e saj. “Medalja e falënderimit që ju dorëzohet sot, është një gjest mirënjohjeje dhe nderimi, për të cilin absolutisht ne emër të të gjithë Forcave të Armatosura ju jemi shumë mirënjohës. Por ju që jeni fytyra e ushtrisë, prej kohësh e keni gjetur çelësin e zemrave të të gjithë shqiptarëve”, - u shpreh ministrja Xhaçka.

Kryetari i Bashkisë Tiranë, z. Erion Veliaj, shprehu mirënjohjen e tij për të gjithë efektivët nën uniformë. “Në ditë si sot ku në Tiranë dhe në të gjithë Shqipërinë festohet, ne kujtojmë që janë ata që janë me uniformë, qoftë kjo uniformë e ushtrisë, qoftë kjo uniformë e policisë, qoftë kjo uniformë e zjarrfikëses, qoftë kjo rroba e bardhë e mjekut, që këto festime dhe kjo harmoni nuk do të ishin të mundur nëse nuk do të kishim garancinë e atyre që shërbejnë”, - u shpreh Veliaj.

OFFA u themelua në tetor të vitit 1944 dhe për 73 vjet i ka shërbyer Republikës së Shqipërisë në një mënyrë krejt të veçantë, një shërbim midis ritmit dhe muzikës.