Newsroom Incidenti në uzinën e Gramshit, ministri i Mbrojtjes viziton në spital dy ushtarakët e lënduar
Ministri i Mbrojtjes, Niko Peleshi vizitoi sot në QSUT dy efektivët e Forcave të Armatosura, që mbetën të lënduar një ditë më parë gjatë incidentit në uzinën e Gramshit, ku tre shtetas të huaj, me pasaporta ruse dhe ukrainase tentuan të futeshin brenda ambienteve të uzinës.
“Unë sapo vizitova dy ushtarakët, Aldon dhe Ardianin, të cilët prej ditës së djeshme janë shtruar në pavijonin e toksikologjisë. Gjendja e tyre shëndetësore është e mirë, kanë kaluar një natë të qetë dhe sot janë gati për të dalë”, - tha ministri Peleshi.
Ministri i Mbrojtjes kërkoi që të bëhet durim deri në zbardhjen e plotë të ngjarjes, për të cilën po punojnë të gjitha strukturat, që nga Inteligjenca Ushtarake, Policia Ushtarake, Shërbimi Informativ Shtetëror, Policia e Shtetit dhe Antiterrori: “Tre shtetas të huaj u janë afruar ish-Uzinës Ushtarake të Gramshit. Them ish, sepse prej vitesh ajo uzinë nuk ka aktivitet. Një prej shtetasve të huaj ka kapërcyer rrethimin në mënyrë të paligjshme. Në këtë moment dy ushtarakët duke u ngritur në nivelin dhe përgjegjësinë e detyrës e kanë parandaluar. Shtetasi rus ka reaguar fizikisht, ka përdorur edhe një spray, që ka shkaktuar edhe lëndim, por, pavarësisht lëndimit, dy ushtarakët kanë njoftuar Policinë e Shtetit. Policia ka reaguar shumë shpejt dhe ka bërë të mundur ndalimin dhe arrestimin e këtij shtetasi të huaj. Më pas, jo shumë larg nga uzina e Gramshit, janë ndaluar edhe dy shtetasit e tjerë, të cilët ndodheshin në një makinë. Padyshim që, e vendosur edhe në kontekstin e gjerë rajonal edhe në kontekstin politik, duhet vlerësuar dhe nuk mund të kalojë si një incident i zakonshëm, por ne nuk mund të nxitohemi të nxjerrim konkluzione, por gjithsesi fakti që është reaguar dhunshëm nga këta shtetas të huaj na bën të jemi më të vëmendshëm për ta hetuar deri në fund. Janë shumë struktura që do të punojnë që nga Inteligjenca jonë ushtarake, Policia Ushtarake, Shërbimi Informativ Shtetëror, Policia e Shtetit, Antiterrori. Tani janë në pyetje dhe hetim që të tre shtetasit e huaj që siç e thashë mbajnë pasaporta ruse dhe ukrainase”, - deklaroi z. Peleshi pas vizitës në QSUT.
Ministri theksoi se ngjarje të tilla duhen trajtuar me përgjegjshmëri: “Është jonormale që ngjarje të tilla ti trajtojmë sikur të ishte politika lokale e ditës. Sepse këto janë kritike sidomos edhe deklarime sidomos të faktorëve politikë, deklarime të institucioneve shtetërore vërehen, analizohen, komentohen dhe mund të kthehen edhe në një problem shumë më të madh se vetë ngjarja”, - tha z. Peleshi.
