Anija italiane patrulluese “Libra” i kalon Forcës Detare, ministri Vengu: Angazhim për Sigurinë dhe Mbrojtjen

e martë, 08 prill 2025 19:15

Anija italiane patrulluese “Libra” do t’i kalojë në përdorim Forcës Detare shqiptare. Në Durrës, u nënshkrua edhe Letra e Qëllimit, në prani edhe të kryeministrit z. Edi Rama, ministrit të Mbrojtjes së Italisë z. Guido Crosetti, ministrit të Mbrojtjes së Shqipërisë z. Pirro Vengu e përfaqësuesve të Forcës Detare e Marinës Italiane.

Ministri Vengu, në fjalën e tij, tha se dhurimi i anijes “Libra” është një simbol i marrëdhënieve të shkëlqyera dhe të thella që ekzistojnë ndërmjet Shqipërisë dhe Italisë. Sipas tij, kjo anije është një mundësi për Forcën tonë Detare që të ndërmarrë tranzicionin nga forcë me detyra rojeje bregdetare, në një forcë luftimi moderne. “Ky akt thekson angazhimin e përbashkët për sigurinë dhe mbrojtjen dhe forcimin e partneritetit tonë në fushën e Mbrojtjes, veçanërisht në hapësirë adriatiko-joniane. Dhurimi i anijes “Libra” do të kontribuojë në rritjen e kapaciteteve luftarake të Forcës Detare shqiptare, do të mundësoje përfshirjen e forcave ajrore në operacionet tona detare. Për efektivët e Forcës sonë Detare, kjo anije do të rikthejë mendësinë e operimit të anijeve me kapacitete ushtarake”, - u shpreh ministri Vengu.

Kryeministri Edi Rama e cilësoi këtë fryt të raporteve të shkëlqyera mes dy vendeve. Ndërsa, ministri italian i Mbrojtjes, Guido Crosetto deklaroi se Italia dhe Shqipëria do të forcojnë më tej bashkëpunimin e shkëlqyer që ekziston në të gjitha fushat, veçanërisht në Mbrojtje. Sipas tij: “Dhurimi i anijes “Libra” nuk përbën një pikëmbërritje, sikurse e tha ministri Vengu, por një pikënisje e një bashkëpunimi gjithnjë e më të fortë që ekziston mes vendeve tona. Gjithashtu edhe të bashkëpunimit mes Forcave tona të Armatosura dhe të gjithë sistemit industrial”, - nënvizoi Crosseto.

Autonomia e anijes “Libra”, prej 3300 miljesh detare dhe shpejtësia prej 17 nyjesh do të rrisin ndjeshëm aftësinë e Forcës Detare për të kryer operacione të ndërlikuara në distanca të mëdha dhe për periudha më të gjata kohore, pa varësi të madhe nga mbështetja logjistike.

Forca Detare, me anijen “Libra”, do të jetë e mundur që të kontribojë më shumë në operacionet rajonale të sigurisë detare, siç është ajo e iniciativës ADRION, por gjithashtu do të mund të kontribojë edhe në kuadër të Aleancës në operacionin Focus Operations (FOCOPS), pjesë e Operacionit Sea Guardian, jo vetëm me pjesëmarrje, por edhe duke e udhëhequr këtë operacion në Mesdheun Qendror.